قازاقستان رەسپۋبليكاسى پرەزيدەنتى اكىمشىلىگىندە پرەزيدەنت كومەكشىسى تامارا دۇيسەنوۆانىڭ توراعالىعىمەن مەملەكەت باسشىسىنىڭ 2024 جىلعى 2 قىركۇيەكتەگى جولداۋىن ىسكە اسىرۋ بارىسى، ونىڭ ىشىندە مەكتەپكە دەيىنگى ءبىلىم بەرۋدە ۆاۋچەرلىك قارجىلاندىرۋ مەحانيزمىن ەنگىزۋ ماسەلەسى قارالدى.

جوبانى تولىق ەنگىزۋ وسى جىلدىڭ 1 تامىزىنا جوسپارلانعان.

قازىرگى تاڭدا جوباعا 2,3 مىڭنان استام مەكتەپكە دەيىنگى ۇيىم قاتىسۋدا جانە 276,5 مىڭ بالاعا ۆاۋچەرلەر بەرىلدى.

سۋرەت: gov.kz سايتىنان الىندى.

وتكەن جىلى جوبا تاراز، شىمكەنت، تۇركىستان جانە ورال قالالارىندا سىناقتان ءوتتى، ال اعىمداعى جىلدىڭ باسىنان باستاپ استانا قالاسىنىڭ بالاباقشالارى، ناۋرىز ايىنان باستاپ قاراعاندى، سەمەي، وسكەمەن، جەزقازعان قالالارى جانە جامبىل وبلىسىنىڭ بايزاق، تۇركىستان وبلىسىنىڭ سارىاعاش اۋداندارىنىڭ بالاباقشالارى جوباعا قوسىلدى.

ۆاۋچەرلىك جۇيە ارتىقشىلىقتارى:

• بىرىنشىدەن، مەكتەپكە دەيىنگى ۇيىمداردىڭ قولجەتىمدىلىگى. بۇرىنعىداي كونكۋرس نەگىزىندە ەمەس، ءبىلىم باسقارمالارى مەملەكەتتىك تاپسىرىسقا ءوتىنىم بەرىپ، بەلگىلەنگەن تالاپتارعا ساي كەلەتىن بالاباقشالاردان ءتىزىمدى قالىپتاستىرادى.
• ەكىنشىدەن، ادىلدىك. اتا-انالار مەملەكەتتىك ۆاۋچەر الادى جانە ونى تىزىمگە ەنگىزىلگەن كەز كەلگەن بالاباقشادا قولدانا الادى. بۇل اتا-انالارعا تاڭداۋ ەركىندىگىن بەرەدى جانە بالاباقشالاردىڭ كورسەتىلەتىن قىزمەت ساپاسىن ارتتىرۋىنا سەرپىن بولادى.
• ۇشىنشىدەن، ساپانى باقىلاۋ. بالاباقشالاردىڭ قىزمەتىن باعالاۋعا دەگەن جاڭا كوزقاراس ەنگىزىلدى. ءبىلىم بەرۋ ساپاسىن ەندى اتا-انالار باعالايدى، بۇل سۋبەكتيۆتىلىكتى جويادى جانە قىزمەت ساپاسىن ارتتىرادى. سونىمەن قاتار، جوبا نارىققا جاڭا قاتىسۋشىلاردىڭ كەلۋىنە جول اشادى، بۇل باسەكەلەستىكتى ارتتىرىپ، ساپانى ەداۋىر جاقسارتادى.
• تورتىنشىدەن، اشىقتىق. قاراجات ەندى بالاعا بايلانىستى بولىنەدى. جەرگىلىكتى ورگانداردىڭ ءار بالاباقشاعا مەملەكەتتىك تاپسىرىس كولەمىن بەكىتۋى جويىلدى. بالا ءبىر بالاباقشادان ەكىنشىسىنە اۋىسقاندا، ۆاۋچەر دە بىرگە اۋىسادى.
• بەسىنشىدەن، بيۋدجەت قاراجاتىن ماقساتتى ءارى ءتيىمدى پايدالانۋ. قارجىلاندىرۋ مەكتەپكە دەيىنگى ۇيىمدارعا بالالاردىڭ ناقتى بارۋىنا بايلانىستى جۇزەگە اسىرىلادى، بۇرىنعىداي ءتىزىم بويىنشا ەمەس.

سۋرەت: gov.kz سايتىنان الىندى.

جاڭا جۇيەنىڭ تيىمدىلىگىن پيلوتتىق جوبانىڭ الدىن الا قورىتىندىلارى راستادى. پيلوتتىق جوبا جۇزەگە اسىرىلعان قالالاردا كەزەك ايتارلىقتاي قىسقاردى، ال كەيبىر قالالاردا (تاراز، تۇركىستان، ورال) بالاباقشاعا كەزەكتە تۇرعان بارلىق بالالار ورنالاستىرىلدى.

«ءولى جانداردى»، قايتالانعان جانە بىرنەشە بالاباقشادا تىركەلگەن بالالاردى الىپ تاستاۋ ەسەبىنەن جوبانى ىسكە اسىرۋ باستالعالى 27 ملرد تەڭگەدەن استام قاراجات ۇنەمدەلدى.

سۋرەت: gov.kz سايتىنان الىندى.

وسى ۇنەمدەلگەن قاراجاتتىڭ 25 ملرد تەڭگەسى بۇرىن كەزەكتە تۇرعان بالالاردى ورنالاستىرۋعا، ال 2 ملرد تەڭگەسى جاڭادان كەزەككە تۇرعان، 2 جاسقا تولعان بالالارعا باعىتتالدى.

كەزدەسۋ بارىسىندا شىمكەنت جانە قاراعاندى قالالارىنداعى كەزەك ماسەلەلەرى قارالدى. سونداي-اق ۇلىتاۋ وبلىسىنىڭ اكىمدىگىنە كاسىپكەرلەرمەن جاڭا مەكتەپكە دەيىنگى ۇيىمداردى اشۋ بويىنشا جۇمىس جۇرگىزۋ تاپسىرىلدى، بۇل كەزەكتە تۇرعان بالالاردى قامتۋ ماسەلەسىن شەشۋگە مۇمكىندىك بەرەدى.

Abai.kz