اقش-تىڭ ەلۋدەن استام شتاتىندا وتكەن ەل پرەزيدەنتى ترامپقا قارسى نارازىلىق اكتسيالارىنا ونداعان مىڭ ادام قاتىستى.

ۇيىمداستىرۋشىلاردىڭ ايتۋىنشا، بۇل وقيعا پرەزيدەنت دونالد ترامپ پەن ونىڭ ميللياردەر وداقتاسى يلون ماسكقا قارسى ەڭ اۋقىمدى ءبىر كۇندىك نارازىلىق بولماق.

«قولىڭدى تارت!» دەپ اتالاتىن نارازىلىق اكتسيالارى اقش-تىڭ بارلىق 50 شتاتىنداعى 1200-دەن استام جەرىندە جالعاستى. ونى 150-دەن استام ازاماتتىق قۇقىق قورعاۋ ۇيىمدارى، كاسىپوداقتار، قوعام بەلسەندىلەرى، ارداگەرلەر جانە سايلاۋ پروتسەسىن باقىلاۋشىلار ۇيىمداستىرعان.

Reuters اگەنتتىگىنىڭ مالىمەتىنشە، ۆاشينگتونداعى ۇلتتىق ساياباقتان باستالعان قارسىلىق ەرەۋىلىنە 20 000-نان استام ادام قاتىسادى دەپ جوسپارلانعان.  ماسساچۋسەتستەگى بوستون كوممونعا دەيىنگى شەرۋلەردە نارازىلار ترامپ پەن ماسكتىڭ جۇمىس ورىندارىن قىسقارتۋ، ەكونوميكا، يمميگراتسيا، جۋىرداعى تاريفتەر مەن ادام قۇقىقتارىنا قاتىستى ارەكەتتەرىن قاتاڭ سىنادى.

CNN اقپاراتتىق ورتالىعى بۇل تۋرالى بىلاي دەپ جازدى: «ميلليونداعان امەريكالىق سەنبى كۇنى ەل ىشىندەگى 50 شتاتتا جانە الەم بويىنشا دونالد ترامپ پەن يلون ماسكقا قارسى نارازىلىق اكتسيالارىنا قاتىستى. بۇل وقيعالار دەموكراتيانى قولدايتىن قوزعالىس تاراپىنان ۇيىمداستىرىلىپ، ولار مۇنى «جاۋلاپ الۋ» جانە امەريكالىق قۇقىقتار مەن بوستاندىقتارعا جاسالعان شابۋىل رەتىندە سيپاتتادى. 1400-دەن استام تۇرعىن «قولىڭدى تارت!» اتتى جاپپاي نارازىلىق اكتسياسىنا قاتىسقان بۇل شەرۋ شتاتتىق اكىمدىكتەردە، فەدەرالدى مەكەمەلەردە، كونگرەسس كەڭسەلەرىندە، الەۋمەتتىك قامسىزداندىرۋ شتابتارىندا، ساياباقتار مەن قالالىق اكىمدىكتەردە ءتىپتى بۇكىل ەل بويىنشا ءوتتى. ۇيىمداستىرۋشىلار: «ءبىزدى ەستيتىندەي جاعداي جاسايمىز» دەدى. «قولىڭدى تارت!» قوزعالىسىنىڭ تالابى – «ميللياردەرلەردىڭ بيلىكتى تارتىپ الۋىن توقتاتۋ».

بەلسەندىلەردىڭ ايتۋىنشا، ترامپتىڭ ارەكەتتەرى دەموكراتياعا جاسالعان شابۋىل بولىپ ەسەپتەلەدى. ولار «جۇمىس ورىندارىنىڭ قىسقارۋ، جەكە ومىرگە قول سۇعۋ نەمەسە قىزمەتتەرىمىزگە شابۋىل سالدارىنان قوزعالىپ وتىرساڭىز، بۇل ءسات ءسىز ءۇشىن» دەگەن ۇران تاستاعان.

دەرەكتەرگە سۇيەنسەك، 600 مىڭعا جۋىق ادام وسى ءىس-شارالارعا قاتىسۋعا تىركەلگەن. بۇل قوزعالىستى «Indivisible» اتتى ۇيىم باستاعان، ولار بۇكىل ەل بويىنشا ازاماتتىق قۇقىق ۇيىمدارى، ارداگەرلەر، ايەلدەر قۇقىقتارىن قورعايتىن توپتار، كاسىپوداقتار جانە بەلسەندىلەرىمەن بىرىگىپ جۇمىس ىستەگەن.

ۇيىمداستىرۋشىلار ءۇش نەگىزگى تالاپ قويعان: ءبىرىنشى، ميللياردەرلەردىڭ بيلىكتى باسىپ الۋى مەن ترامپ اكىمشىلىگىنىڭ جىمداسقان جەمقورلىعىنا توقتاۋ سالۋ; ەكىنشىدەن، Medicaid, الەۋمەتتىك قامسىزداندىرۋ جانە جۇمىس ىستەيتىن حالىققا قاجەت باسقا دا فەدەرالدى باعدارلامالاردىڭ قارجىسىن قىسقارتۋعا توقتاۋ; ۇشىنشىدەن، يمميگرانتتارعا جانە باسقا دا قاۋىمداستىقتارعا جاسالاتىن شابۋىلداردى توقتاتۋ.

دايىنداعان دۇيسەنالى الىماقىن

Abai.kz