اقىلى تراسساداعى الا سيىر: مۇرات ابەنوۆ بازاربەك تۇسكەن جول اپاتىنىڭ كومەسكى تۇستارىن اتادى...

ەكس-دەپۋتات مۇرات ابەنوۆ جامبىل وبلىسىنداعى تاسجولدا باقىتجان بازاربەكتىڭ قاتىسۋىمەن بولعان جول اپاتىنا قاتىستى پىكىر ءبىلدىردى. ول دوسىنىڭ ادامدىق قاسيەتىنە سەنەتىنىن، الايدا تەرگەۋ مەن سوت كىناسىن دالەلدەسە، ونى اقتاپ الۋعا تىرىسپايتىنىن مالىمدەدى، دەپ حابارلايدى Ertenmedia.kz.

ابەنوۆ بازاربەكتى 12 جىلدان بەرى بىلەتىنىن، ونىڭ زاڭسىزدىق پەن جەمقورلىققا قارسى كۇرەستە لاۋازىم مەن اتاققا قارامايتىن تاباندى زاڭگەر ەكەنىن جازدى.

اپات جايلى ەستي سالا ونىمەن تەلەفون ارقىلى سويلەسكەن. بازاربەك وقيعانىڭ جاي-جاپسارىن ءوزى اشىق ايتۋعا دايىن بولعانىمەن، جۇبايى ەكەۋى تەرگەۋ قۇپياسىن جاريالاماۋ جونىندەگى مىندەتتەمەگە قول قويعاندىقتان، ەگجەي-تەگجەيىن تۇسىندىرە الماي وتىر.

«ول اينالاسىنا قانشالىقتى قاتال بولسا، وزىنە دە سونشالىقتى تالاپشىل. زاڭداعى ساڭىلاۋدى پايدالانۋعا، وزىنە جەڭىلدىك سۇراۋعا بارمايدى. تەرگەۋگە تولىق كومەكتەسىپ، بارلىق ساراپتامادان وتەتىنىنە سەنەمىن»، — دەدى Tengrinews-كە پىكىر بىلدىرگەن ەكس-دەپۋتات.

ابەنوۆتىڭ مالىمەتىنشە، بازاربەك الكوگول مەن ەسىرتكىگە تەكسەرىلگەن، ساراپتاما ەشتەڭە انىقتاماعان. جىلدامدىقتى اسىرعانى جونىندە دە ازىرگە دەرەك جوق. ونىڭ پىكىرىنشە، تاسجولداعى كامەرالار اراسىنداعى ءجۇرىپ وتكەن ۋاقىت ارقىلى كولىكتىڭ ورتاشا جىلدامدىعىن ناقتى انىقتاۋعا بولادى. بازاربەك ساپارعا ايەلى جانە كىشكەنتاي ەكى بالاسىمەن شىققان. جول اپاتىنان كەيىن ول زارداپ شەككەن ازاماتتىڭ جاعدايىن ءبىلىپ، اۋرۋحاناعا بارىپ، اناسى مەن تۋىستارىمەن كەزدەسكەن. بازاربەكتىڭ ءوزى دە بىرنەشە تاۋلىك بويى جارالانعان ادامنىڭ جاقىندارىنىڭ جانىندا بولىپ، ساۋىعىپ كەتۋىن تىلەپ جۇرگەنىن مالىمدەگەن ەدى. ابەنوۆ پوليتسيانىڭ باستاپقى دەرەگىنە سۇيەنىپ، اپاتقا قاراۋسىز قالعان سيىردىڭ حالىقارالىق ماگيسترالعا شىعۋى تۇرتكى بولعانىن جازدى. باق-تاعى مالىمەت بويىنشا، جول ۇستىندە جاتقان جانۋارمەن سوقتىعىسپاۋعا تىرىسقان بازاربەك كولىكتى بۇرىپ، ارتىنشا ادام زارداپ شەككەن وقيعا بولعان.

ەكس-دەپۋتات تەرگەۋ كولىك جۇرگىزۋشىسىنىڭ ارەكەتىمەن شەكتەلمەۋگە ءتيىس دەپ سانايدى. مال يەسىنىڭ جاۋاپكەرشىلىگىمەن بىرگە اقىلى تراسسانى باسقاراتىن جول وپەراتورىنىڭ جۇمىسى دا تەكسەرىلۋى قاجەت.

«ەگەر سيىر حالىقارالىق تراسساعا قورشاۋداعى جىرىقتان كىرسە، وعان “قازاۆتوجول” جاۋاپ بەرۋگە ءتيىس»، — دەدى ول.

ابەنوۆتىڭ پايىمىنشا، «باتىس ەۋروپا – باتىس قىتاي» ءدالىزى جوعارى تەحنيكالىق ساناتتاعى جىلدام ماگيسترال بولعاندىقتان، جول جيەگى ءۇي جانە جابايى جانۋار كىرە المايتىنداي قورشالۋى كەرەك. جۇرگىزۋشىدەن اقى الىنعان سوڭ وپەراتور ساپالى جابىنمەن قاتار، جارىقتاندىرۋدى، بايلانىس جەلىسىن، شۇعىل ەسكەرتۋ مەن جەدەل كومەك جۇيەسىن دە قامتاماسىز ەتۋگە مىندەتتى. جۋىردا رۇقسات ەتىلگەن جىلدامدىقتىڭ 110-نان 120 شاقىرىمعا كوتەرىلۋى جول وپەراتورىنىڭ قاۋىپسىزدىكتى قامتاماسىز ەتە الاتىنىن مويىنداعانىن اڭعارتادى.

Abai.kz