اقمولادا 2 اۋىلدى سۋ باستى: سۋ باسقان جولدى كەسىپ وتپەك بولعان جۇرگىزۋشى قايتىس بولدى.

بۇل تۋرالى قر توتەنشە جاعدايلار مينيسترلىگى مالىمدەدى.

«استانا-اتباسار-جاقسى-رۋزاەۆكا-سارىكول-قوستاناي» تاس جولىن سۋ شايىپ كەتتى. سالدارىنان ەسكەرتۋدى ەلەمەي وتكەن كولىكتى تاسقىن سۋ جول جيەگىنە اعىزىپ اكەتىپ، كولىك جۇرگىزۋشىسى قايتىس بولدى. استراحان اۋدانىندا قالقۇتان وزەنى تاسىدى. سالدارىنان ەسكى كولۋتون اۋىلىن سۋ باسقان. قارعىن سۋ كوشەگە جايىلعانىمەن، تۇرعىن ۇيلەردىڭ ىشىنە كىرمەگەن – دەلىنگەن تجد حابارلاماسىندا.

قازىر 1000-نان استام قاپ توسەلىپ، 300 تەكشە مەتر سۋ سورىلعان. اۋىلدان 21 ادام ەۆاكۋاتسيالانىپ، 100-دەن اسا ءىرى قارا مەن ۇساق مال قاۋىپسىز جەرگە ايدالعان.

Abai.kz