ەلوردالىق اسكەري اۆيابازادا بۇۇ ميسسياسى اياسىندا (UNDOF) گولان جوتالارىندا قىزمەت اتقارىپ، ءبىر جىلدان كەيىن ەلگە ورالعان قازاقستاننىڭ تۇڭعىش بىتىمگەرلىك كونتينگەنتىن سالتاناتتى قارسى الۋ ءراسىمى ءوتتى.

قۇرمەت قاراۋىل روتاسىنىڭ سۇيەمەلدەۋىمەن بىتىمگەرلىك قىزمەت اتقارعان اسكەري قىزمەتشىلەردى قورعانىس مينيسترلىگىنىڭ باسشىلىعى، قارۋلى كۇشتەردىڭ ارداگەرلەرى مەن ارىپتەستەرى قارسى الدى.

قورعانىس ءمينيسترى گەنەرال-پولكوۆنيك رۋسلان جاقسىلىقوۆ ءار بىتىمگەردىڭ قولىن الىپ، جەكە قۇرامعا العىسىن ءبىلدىردى. ول سونداي-اق، قازاقستان ارمياسىنىڭ تاريحىندا العاش رەت گولان جوتالارىندا "بۇۇ-نىڭ ءبولىنۋدى باقىلاۋ جونىندەگى كۇشتەرى" ميسسياسىندا ءوزىنىڭ قارۋ-جاراعى مەن تەحنيكاسىمەن دەربەس ۇلتتىق كونتينگەنت ورنالاستىرىلعانىن اتاپ ءوتتى.

- بۇل ميسسيا الاساپىران ايماقتا حالىقارالىق بەيبىتشىلىك پەن تۇراقتىلىقتى ساقتاۋ جونىندەگى ماڭىزدى مىندەت بولدى. سىزدەردىڭ كۇش-جىگەرلەرىڭىز نازاردان تىس قالماي، حالىقارالىق ارەنادا قازاقستاننىڭ بەدەلىن جاۋاپتى، ءارى بەيبىت مەملەكەت رەتىندە ودان ءارى نىعايتۋعا نەگىز بولدى. ادال قىزمەتتەرىڭىز بەن جاۋىنگەرلىك تاپسىرمانى ورىنداۋداعى جاۋاپكەرشىلىكتەرىڭىز، سونداي-اق، قازىرگى تاڭدا باسىنان قيىن كەزەڭدى وتكەرىپ جاتقان ادامدارعا كومەك قولىن سوزعاندارىڭىز ءۇشىن العىس ايتامىن، – دەپ اتاپ ءوتتى قورعانىس ۆەدومستۆوسىنىڭ باسشىسى.

بىتىمگەرلىك روتاسىنىڭ كومانديرى پودپولكوۆنيك جىگەر ايپوۆ فاۋار بازاسىندا ميسسيانى ورىنداۋ بارىسىندا قازاقستاندىق كونتينگەنت 600-دەن استام تاپسىرمانى ورىنداعانىن اتاپ ءوتتى.

- وسىدان ءبىر جىل بۇرىن ءبىزدىڭ 139 ادامنان تۇراتىن العاشقى بىتىمگەرلىك كونتينگەنتىمىز گولان جوتالارىنا اتتاندى. جاۋاپكەرشىلىك ايماعىندا روتانىڭ جەكە قۇرامى جۇكتەردى الىپ ءجۇرۋ بويىنشا پاترۋلدىك جانە گۋمانيتارلىق قىزمەت اتقاردى. ءبىز 4 ەۆاكۋاتسيا جاسادىق جانە 400-دەن استام جارىلماعان زاتتاردىڭ جويدىق، - دەدى ول.

قيىن-قىستاۋ كەزەڭدە ەر ادامدارمەن بىرگە بۇۇ-نىڭ گولان جوتالارىنداعى ميسسياسىندا 7 ايەل اسكەري قىزمەتشى قىزمەت اتقاردى.

العا قويىلعان مىندەتتەردى ويداعىداي ورىنداعانى ءۇشىن قازاقستاندىق بىتىمگەرىلىك كونتينگەنتتىڭ جەكە قۇرامى بۇۇ ميسسياسى مەن حاتشىلىعى باسشىلىعىنىڭ  جوعارى باعاسىنا يە بولدى.

Abai.kz