16-17 ءساۋىر كۇندەرى ورتالىق ازيا بويىنشا مەديا سالاسىنىڭ ماماندارى استانادا باس قوسادى. فورۋمعا قازاقستان، وزبەكستان، قىرعىزستان، ازەربايجان، تاجىكستان، تۇرىكمەنستان، ۇلىبريتانيا، قىتاي، قاتار، رەسەي جانە باسقا دا ەلدەردەن 700-دەن استام دەلەگات قاتىcتى. بيىلعى فورۋم «جاھاندىق وزگەرىستەر داۋىرىندەگى ورتالىق ازيا. ستراتەگيالىق دامۋ قۇرالى رەتىندەگى مەديا» دەپ اتالادى.

ەكى كۇن بويى پانەلدىك سەسسيالاردا ورتالىق ازيا ەلدەرىنىڭ اقپارات قۇرالدارى ءۇشىن جاڭا دامۋ مۇمكىندىكتەرى مەن ىنتىماقتاستىق ماسەلەلەرى، جاھاندىق مەديانىڭ دامۋى، بولاشاقتىڭ اقپاراتتىق كەڭىستىگىن قالىپتاستىرۋ، جي جانە كوپ دەرەك كەزەڭىندەگى مەديانىڭ تسيفرلىق ترانسفورماتسياسى، سونداي-اق ەل ءيميدجىن قالىپتاستىرۋداعى الەۋمەتتىك جەلىلەردىڭ ءرولى تالقىلانادى.

قر مادەنيەت جانە اقپارات ءمينيسترى ايدا بالاەۆا ورتالىق ازيا قازىرگى ۋاقىتتا ەۋروپا مەن ازيا اراسىنداعى سەنىمدى كوپىر ءارى ترانزيتتىك حاب رەتىندە عانا ەمەس، زور ينۆەستيتسيالىق، ساۋدا-ەكونوميكالىق، تۋريستىك جانە مادەني-گۋمانيتارلىق الەۋەتى بار اۋقىمدى ورتالىق رەتىندە قاراستىرىلاتىنىن اتاپ ءوتتى.

«ورتالىق ازيا كوشباسشىلارى دەڭگەيىندە اقپاراتتىق سالاداعى ىنتىماقتاستىقتى جانداندىرۋ ماسەلەسى بىرنەشە رەت تالقىلانعانى ءمالىم. بىلتىر استانادا وتكەن كونسۋلتاتيۆتى كەزدەسۋدە پرەزيدەنت قاسىم-جومارت توقاەۆ بىرلەسكەن مەدياونىمدەردى جاساۋ باستاماسىن كوتەردى. قازاقستان ورتالىق ازيانىڭ ورتاق تەلەارناسىن قۇرۋ جانە ايماقتىق الەۋەتتى وسى اۋماقتا تۇراتىن حالىقتاردىڭ دوستىعى مەن بىرلىگى تۋرالى حاباردار ەتەتىن تەلەجوبالاردى جانە حالىقتارىمىزدىڭ تاريحي ءمان-ەرەكشەلىگى تۋرالى تانىمدىق تەلەراديوباعدارلامالار توپتاماسىن دايىنداۋ يدەياسىن قولدادى. بۇگىنگى كەزدەسۋىمىزدە وسى ماسەلەگە مۇقيات توقتالىپ، Silk Way تەلەارناسىنىڭ جۇمىسىنا بىرلەسكەن كونتەنت دايىنداۋ بويىنشا ناقتى شەشىمدەردى قابىلدادىق»، − دەدى مينيستر فورۋمنىڭ اشىلۋ سالتاناتىندا.

وسىلايشا قازىرگى ۋاقىتتا ورتالىق ازيا ەلدەرى وڭىردەگى اقپاراتتىق ىنتىماقتاستىقتى نىعايتۋعا باعىتتالعان بىرلەسكەن تەلەارنا مەن وڭىرلىك مەدياپلاتفورمانى ىسكە قوسۋ مۇمكىندىگىن قاراستىرىپ جاتىر.

Abai.kz