9 مامىرداعى مەرەكەلىك شارالاردى بەلگىلى رەسەيلىك اكتەرلەر، انشىلەر مەن تەلەجۇرگىزۋشىلەر سىنعا الىپ جاتىر.

رەسەيدىڭ حالىق ءارتىسى دميتري نازاروۆ مەرەكەنى «قۋاتسىزدىق پەن تىيىمدار شەرۋى» دەپ اتاپ، 9 مامىردى تويلاماۋدى ۇسىندى. اكتەردىڭ ايتۋىنشا، مەرەكەگە جۇمسالعان اقشانى ارداگەرلەر ءۇيىن جاقسارتۋعا جۇمساۋ دۇرىس.

تەلەجۇرگىزۋشى دميتري شەپەلەۆ تە جەڭىس شەرۋىندە «اسكەري كۇش» كورسەتۋدى ايىپتادى. ول «سوعىسقا دايىن بولۋ» نەلىكتەن قاجەت ەكەنىن تۇسىنبەيتىنىن ايتىپ، جەڭىس كۇنىن سوعىستىڭ «سۇمدىقتارىن» ەسكە سالاتىن كۇن رەتىندە اتاپ وتۋگە شاقىردى.

رەپەر مورگەنشتەرن دە جەڭىس شەرۋى تۋرالى تەرىس پىكىر ايتتى. ونىڭ پىكىرىنشە، بۇل جەڭىس شەرۋى «ماقتاناتىن ەشتەڭە جوق ەلدىڭ ءىسى». 9 مامىر مەرەكەسىن اكتەر الەكسەي پانين دە سىنادى. ول بۇل كۇندى «پافوس» جانە «شوۋ» دەپ اتادى.

تەلەجۇرگىزۋشى تاتيانا لازارەۆا جەڭىس شەرۋى مەن «ولمەيتىن پولك» اكتسياسىن قولدامايتىنىن ايتىپ، جازىلۋشىلارىن 9 مامىردى تويلاۋدان باس تارتۋعا شاقىردى. اكتەر ماكسيم ۆيتورگان دا وسىنداي مالىمدەمە جاسادى. الەۋمەتتىك جەلىدە ول «رەسەيدىڭ تويلايتىن ەشتەڭەسى جوق» دەپ اتاپ، شۋلى مەرەكەلەردى توقتاتۋدى ۇسىندى.

ونىڭ ايتۋىنشا، 9 مامىردى «ۇنسىزدىك كۇنى» نەمەسە «قارالى كۇن» ەتۋ كەرەك. جەڭىس شەرۋىنە اكتەر پاۆەل مايكوۆ تا نارازى بولدى. «سوعىستا جەڭىمپاز جوق» دەگەن پىكىرىن ءبىلدىرىپ، 9 مامىردا حالىقتىڭ اقشاسىن شاشپاۋعا شاقىردى.

ونىڭ پىكىرىنە مايكوۆتىڭ ارىپتەسى ميحايل شيرۆيندت قوسىلدى. ءوزىنىڭ Telegram-ارناسىندا اكتەر جانە تەلەجۇرگىزۋشى 9 مامىردى ميلليونداعان ادامنىڭ ءومىرىن قيعان قايعىلى وقيعالاردى «ەسكە الۋ كۇنى» دەپ اتادى.

سونداي-اق، ول جەڭىس كۇنى ەل كوشەلەرىندە پاتريوتتىق رامىزدەر مەن اسكەري تەحنيكالاردى الىپ ءجۇرۋ ورىنسىز ەكەنىن ايتتى.

رەسەيلىك جۇلدىزداردىڭ بۇل پىكىرىن كوپتەگەن قازاقستاندىقتار قولدايدى. الەۋمەتتىك جەلىدە 9 مامىرعا قاتىستى قازاقستاندىقتاردىڭ تالقىلاۋى تۋرالى بۇعان دەيىن دە جازىلعان بولاتىن. كەيبىر قولدانۋشىلار بۇل «جوق ەلدىڭ»، ياعني كەڭەس وداعىنىڭ مەرەكەسى ەكەنىن اتاپ وتسە، باسقالارى كەرىسىنشە، قازاقستاننىڭ فاشيستىك گەرمانيانى جەڭۋگە قوسقان زور ۇلەسىن اتاپ وتەدى.

باسقالارى كەڭ اۋقىمدى اسكەري شەرۋلەرمەن مەرەكەلەۋ، اسىرەسە قازىرگى شىندىقتا مۇلدەم قاجەت ەمەس دەپ سانايدى. بىراق ولاردىڭ پىكىرىنشە، ءبىز بۇل كۇندى ەستە ساقتاۋعا مىندەتتىمىز. ولار ءۇشىن 9 مامىر – ەستەلىك پەن قايعى كۇنى. ەسكە سالايىق، ۋكرايناداعى سوعىس جاعدايىندا، قازاقستان «ولمەيتىن پولك» اكتسياسىنا تىيىم سالعان بولاتىن.

كەرىمسال جۇباتقانوۆ،

تاريح عىلىمدارىنىڭ كانديداتى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ دوتسەنتى

Abai.kz