اعىمداعى جىلدىڭ 25 ساۋىرىندە سىبايلاس جەمقورلىققا قارسى ءىس-قيمىل اگەنتتىگىندە سىبايلاس جەمقورلىققا قارسى قىزمەت باسشىسى اسحات جۇماعاليدىڭ توراعالىعىمەن ا.ج. 1 توقسانىنىڭ قورىتىندىسى بويىنشا جەدەل ءماجىلىس ءوتتى.

ماجىلىستە مەملەكەت باسشىسىنىڭ بارلىق دەڭگەيدەگى سىبايلاس جەمقورلىققا قارسى تۇبەگەيلى كۇرەسكە، ونىڭ سەبەپتەرى مەن جاعدايلارىن جويۋعا، سونداي-اق سىبايلاس جەمقورلىق تاۋەكەلدەرىن بولدىرماۋعا باعىتتالعان تاپسىرمالارىن ورىنداۋعا ەرەكشە نازار اۋدارىلدى.

تاپسىرمالاردى ىسكە اسىرۋ شەڭبەرىندە ۆەدومستۆونىڭ جۇمىسى ازاماتتاردى تولعاندىراتىن جۇيەلى ماسەلەلەردى شەشۋگە باعىتتالعان.

قىزمەت بارىسىندا زاڭدىلىق پەن ادىلەتتىلىك قاعيداتتارىن قامتاماسىز ەتۋگە ماڭىزدى ءمان بەرىلەدى.

ماسەلەن، اعىمداعى جىلدىڭ ءبىرىنشى توقسانىندا 67 تالداۋ جانە مونيتورينگ جۇرگىزىلدى، سىبايلاس جەمقورلىق تاۋەكەلدەرىن جويۋ بويىنشا 500-دەن استام ۇسىنىمدار مەن ۇسىنىستار ەنگىزىلدى.

اگەنتتىك تۋريزم سالاسىنداعى سىرتقى تالداۋدى جانە مەكتەپكە دەيىنگى مەكەمەلەردى قارجىلاندىرۋ سالاسىنداعى سىبايلاس جەمقورلىققا قارسى مونيتورينگتى اياقتادى.

جۇرگىزىلگەن تالداۋ قورىتىندىسى بويىنشا تۋريزم سالاسىندا قارجىلاندىرۋ باسىمدىقتارىنىڭ بۇلىڭعىرلىعىنا، ۇلتتىق پاركتەر مەن وزگە دە تۋريستىك ايماقتاردى ءتيىمسىز باسقارۋعا، سونداي-اق تۋريستىك ءونىمدى جىلجىتۋعا ارنالعان بيۋدجەت شىعىستارىنىڭ اشىقتىعىنا بايلانىستى جۇيەلى سىبايلاس جەمقورلىق تاۋەكەلدەرى بەلگىلەندى.

ولاردى جويۋ بويىنشا، ونىڭ ىشىندە وزىق حالىقارالىق تاجىريبەنى ەسكەرە وتىرىپ، ۇسىنىمدار ازىرلەندى.

اۋماقتىق دەپارتامەنتتەرگە كۇش-جىگەردى سىبايلاس جەمقورلىق تاۋەكەلدەرىن جويۋعا جانە ازاماتتار مەن كاسىپكەرلەر ءۇشىن قولايلى ورتا قالىپتاستىرۋعا جۇمىلدىرۋ تاپسىرىلدى.

مەملەكەتتىك ساتىپ الۋ جانە قاراجاتتى ماقساتتى جۇمساۋ مونيتورينگى بارىسىندا اگەنتتىك جىل باسىنان بەرى 21,2 ملرد تەڭگە سوماسىنا ۇتىمسىز پايدالانۋدىڭ الدىن الدى، ونىڭ 6,4-ءى بيۋدجەتكە قايتارىلدى.

اتاپ ايتقاندا، ۇلىتاۋ وبلىسىنىڭ جەزقازعان قالاسىنىڭ اكىمدىگى جولداردى كۇتىپ ۇستاۋعا 1,2 ملرد تەڭگە بولگەن، بۇل قاجەتتىلىكتەن ەداۋىر اسىپ ءتۇستى. قابىلدانعان شارالارمەن شىعىنداردىڭ قۇنى شامامەن 350 ملن تەڭگەگە تومەندەتىلدى جانە ارتىق قاراجات بيۋدجەتكە قايتارىلدى.

الماتى وبلىسىندا قوناەۆ قالاسىندا مەملەكەتتىك ساتىپ الۋعا جاتاتىن ەكى جەر ۋچاسكەسىنىڭ قۇنىن 1,2 ملرد تەڭگەگە ارتتىرۋ فاكتىلەرى انىقتالدى.

جامبىل وبلىسىندا اكىمدىكتىڭ ءتۋريزمدى دامىتۋعا بولىنگەن 208 ملن تەڭگەنى ماقساتسىز جۇمساۋىنا جول بەرىلمەدى. قاراجات بيۋدجەتكە تولىق كولەمدە قايتارىلدى.

سىبايلاس جەمقورلىقتىڭ الدىن الۋدىڭ ءتيىمدى تەتىكتەرىنىڭ ءبىرى اكىمشىلىك پراكتيكا بولىپ تابىلادى. اكىمشىلىك ءىس جۇرگىزۋ شەڭبەرىندەگى الدىن الۋ اسەرى بولاشاقتا قىلمىستىق سىبايلاس جەمقورلىق قۇقىق بۇزۋشىلىقتاردىڭ جاسالۋىنىڭ الدىن الۋعا مۇمكىندىك بەرەدى.

ەسەپتى كەزەڭدە 18 ادام اكىمشىلىك جاۋاپكەرشىلىككە تارتىلدى، 5 ملن تەڭگەدەن استام سوماعا ايىپپۇل سالىندى. بۇل نەگىزىنەن مۇددەلەر قاقتىعىسى جانە مەملەكەتتىك ورگانداردىڭ بيزنەس قىزمەتىنە زاڭسىز ارالاسۋى فاكتىلەرى.

اگەنتتىك باسشىلىعىمەن سىبايلاس جەمقورلىق تاۋەكەلدەرىنىڭ كارتاسىن ىسكە اسىرۋ، «بيزنەسكە جول» جوباسى ارقىلى بيزنەستى قولداۋ جانە الەۋمەتتىك ماڭىزى بار وبەكتىلەردىڭ قۇرىلىسىنا مونيتورينگ جۇرگىزۋ بويىنشا تاپسىرمالار بەرىلدى.

I توقساندا 3 مىڭعا جۋىق كاسىپكەردىڭ قۇقىقتارى قورعالدى، 24 پروبلەمالىق ءىس شەشىلدى.

ماسەلەن، جەتىسۋ وبلىسىندا انتيكوردىڭ ۇسىنىسى بويىنشا بيزنەسكە ارنالعان سۋ تاريفتەرى قايتا قارالدى، بۇل كاسىپكەرلەرگە 23 ملن تەڭگە ۇنەمدەۋگە مۇمكىندىك بەردى.

اگەنتتىك سىبايلاس جەمقورلىققا قارسى اعارتۋدىڭ باسىم باعىتىن ىسكە اسىرۋدى جالعاستىرۋدا.

اعىمداعى جىلدىڭ 1-توقسانىندا 450 مىڭعا جۋىق ازاماتتى قامتىعان 3 مىڭنان استام ءىس-شارا وتكىزىلدى. «ءتارتىپتى وزىڭنەن باستا!» اكتسياسى شەڭبەرىندە 2 مىڭ ءىس-شارا ۇيىمداستىرىلىپ، وعان 390 مىڭ وقۋشى مەن ستۋدەنت قاتىسىپ، بۇكىل ەل بويىنشا «زاڭ جانە ءتارتىپ» قاعيداتىن ىلگەرىلەتۋگە سەپتىگىن تيگىزدى.

اكىمدىكتەرمەن بىرلەسىپ وڭىرلىك انتيكور دەپارتامەنتتەرىمەن جاستار اراسىندا پاراساتتىلىق قاعيداتتارىن ىلگەرىلەتۋ جانە سىبايلاس جەمقورلىققا قارسى مادەنيەتتى قالىپتاستىرۋ جونىندەگى كەشەندى جوسپارلار ىسكە اسىرىلۋدا.

كەڭەس بارىسىندا اۋماقتىق بولىمشەلەردىڭ جەدەل جانە تەرگەۋ قىزمەتى تالداندى، سىبايلاس جەمقورلىق قىلمىستارىنان كەلتىرىلگەن زالالدى وتەۋ بويىنشا قابىلدانىپ جاتقان شارالاردىڭ تيىمدىلىگى باعالاندى.

ەسەپتى كەزەڭدە سىبايلاس جەمقورلىققا قارسى قىزمەت ورگاندارىنىڭ ءىس جۇرگىزۋىندە 770 قىلمىستىق ءىس بولدى، ونىڭ 300-گە جۋىعى اياقتالدى.

اياقتالعان قىلمىستىق ىستەر مەن ۇكىمدەر بويىنشا مەملەكەتكە 15 ملرد تەڭگە وتەلدى. اگەنتتىكتىڭ بارلىق بولىمشەلەرىنىڭ جۇمىسىندا الەۋمەتتىك ماڭىزى بار سالالارداعى جۇيەلى سىبايلاس جەمقورلىق كورىنىستەرىن جويۋ جانە جولىن كەسۋ ماڭىزدى بولىپ قالا بەرەدى.

ورتالىق جانە وڭىرلىك بولىمشەلەردىڭ باسشىلارى بيۋدجەتتى جىمقىرۋ ءۇشىن مۇمكىندىكتەردى جويۋعا، سونداي-اق قاراجات ءبولۋ كەزىندە قۇقىق بۇزۋشىلىقتاردىڭ جولىن كەسۋگە باعدارلانعان.

ءماجىلىس قورىتىندىسى بويىنشا سىبايلاس جەمقورلىققا قارسى كۇرەستىڭ تيىمدىلىگىن ارتتىرۋ، زاڭ ۇستەمدىگىن نىعايتۋ جانە قۇقىقتىق ءتارتىپتى قامتاماسىز ەتۋ بويىنشا ناقتى تاپسىرمالار بەرىلدى.

مەملەكەت باسشىسىنىڭ تاپسىرمالارىن ورىنداۋ شەڭبەرىندە اگەنتتىك ازاماتتاردىڭ ءال-اۋقاتىن ارتتىرۋ جانە ەلدىڭ الەۋمەتتىك-ەكونوميكالىق دامۋى ماقساتىندا قوعامدا زاڭدىلىق پەن ءتارتىپتى قامتاماسىز ەتۋ، سىبايلاس جەمقورلىقتى جويۋ جونىندەگى جۇمىستى جالعاستىرادى.

Abai.kz