قازاقستان الەمدىك تۋريستىك كارتاداعى ورتالىق ازيانىڭ ورنىن كۇشەيتىپ، وڭىرلىك ءتۋريزمدى ىلگەرىلەتۋ بويىنشا مەملەكەتارالىق كەڭسە قۇرۋدى ۇسىندى. بۇل باسەكەگە قابىلەتتىلىكتى ارتتىرىپ، اۋقىمدى ترانسشەكارالىق تۋريستىك ونىمدەر قالىپتاستىرۋعا جانە تۋريستەر اعىنىن ۇلعايتۋعا جول اشادى.

«Kazakh Tourism» ۇلتتىق كومپانياسى ءتيىمدى مەملەكەتارالىق ارىپتەستىكتىڭ قاجەتتى قادامدارى جايلى قۇجات دايىندادى. وندا رەسۋرستاردى بىرىكتىرۋمەن قاتار، ورتاق تۋريستىك كەڭىستىك قۇرۋ ۇسىنىلعان. بۇل ساياحاتشىلارعا ءبىر ساپاردا بىرنەشە ەلدىڭ مادەنيەتىن، تاريحىن جانە تابيعاتىن تانۋعا مۇمكىندىك بەرەدى.

«ءبىز باسەكەلەسە وتىرىپ، ىنتىماقتاسۋىمىز كەرەك. الىس شەتەلدەن كەلەتىن ءاربىر ەكىنشى تۋريست، كەم دەگەندە، ءبىر ساپاردا ەكى مەملەكەتتى كورگىسى كەلەدى. ورتالىق ازيا وڭىرىنە باعىتتالعان ەڭ تانىمال تۋرلار FiveStans دەپ اتالادى. بۇل مارشرۋت ءبىزدىڭ نەگىزگى تۋريستىك ونىمىمىزگە اينالۋى كەرەك, - دەپ اتاپ ءوتتى «Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجانۇلى اسەل كوجاكوۆامەن پودكاست بارىسىندا.

ورتالىق ازياداعى بىرىڭعاي تۋريستىك كەڭىستىك اياسىندا بىرلەسكەن باعىتتار قۇرۋ، كولىك بايلانىستارىن دامىتۋ، قىزمەت كورسەتۋ ساپاسىنىڭ ورتاق ستاندارتتارىن ازىرلەۋ، شەتەلدىك قوناقتار ءۇشىن ۆيزالىق جانە شەكارالىق راسىمدەردى جەڭىلدەتۋ مۇمكىندىكتەرى ۇسىنىلىپ وتىر.

ءوڭىر ەلدەرىنىڭ اۋماعىنان وتەتىن ۇلى جىبەك جولى بويىمەن تۋريستىك باعىتتى قايتا جانداندىرۋ - فلاگماندىق جوبالارىنىڭ ءبىرى اينالۋى مۇمكىن. وتكەن جىلى وسى باعىتتا العاشقى قادامدار جاسالدى. قازاقستان مەن وزبەكستان اراسىنداعى «Jibek joly» حالىقارالىق تەمىرجول تۋرى - ىنتىماقتاستىقتىڭ ءساتتى ۇلگىسى.  ترانسشەكارالىق باعىت تەك ءوڭىر ەلدەرىنەن عانا ەمەس، شەت ەلدەردەن دە ساياحاتشىلاردىڭ نازارىن اۋداردى.

سولتۇستىك ەۋروپاداعى Visit Scandinavia, لاتىن امەريكاسىنداعى Mundo Maya, بالقان تۇبەگىندەگى Via Dinarica ءتارىزدى باسقا وڭىرلىك باستامالار تۋريستەر ءۇشىن اكىمشىلىك شەكارالار ەمەس، اسەر مەن تاجىريبە ماڭىزدى ەكەنىن دالەلدەيدى.

ۆەنەرا مۇستافينا

Abai.kz