استانادا 10-18 مامىر كۇندەرى COUNTER-STRIKE 2 – PGL Astana 2025 ءىرى حالىقارالىق ءتۋرنيرى ءوتىپ جاتىر، دەپ حابارلايدى ەلوردا اكىمدىگىنىڭ رەسمي سايتى.

ءتۋرنيردى PGL Esports – الەمدەگى تاۋەلسىز كيبەرسپورت ۇيىمى ۇيىمداستىرادى.

جۇلدە قورى 1 250 000 دوللاردى قۇرايدى.

تۋرنيرگە اقش، گەرمانيا، سەربيا، برازيليا، ۋكراينا، موڭعوليا، رەسەي جانە ت.ب. ەلدەردەن كەلگەن 16 كوماندا قاتىسادى. كوماندالار قۇرامىندا قازاقستاننان 5 وكىل بار، ولار – ويىنشىلار: ك.فايزنۋروۆ («ICY»), ا.قايىرجان («kade0»), س.ورازالى («dukefissura»), د. گولۋبەنكو («molodoy»), سونداي-اق جاتتىقتىرۋشى ر.تەلەپوۆ («mou»).

تۋرنير ەكى كەزەڭ بويىنشا وتەدى:

1. توپتىق كەزەڭ (Elimination Stage).

استاناداعى جابىق ويىن ايماقتارىندا وتكىزىلەدى.
فورمات – شۆەيتساريا جۇيەسى (Swiss), بارلىق ماتچ Best of 3 فورماتىندا وتەدى.
ءۇش مارتە جەڭىسكە جەتكەن كوماندالار كەلەسى كەزەڭگە وتەدى، ءۇش رەت جەڭىلىسكە ۇشىراعان قاتىسۋشىلار شەت قالادى. بارلىق ماتچ ونلاين رەجيمدە كورسەتىلەدى (https://www.youtube.com/watch?v=q6cCuly0mVI).

2. پلەي-وفف كەزەڭى (Champions Stage).

استانادا 16-18 مامىر ارالىعىندا «بارىس ارەنادا» وتەدى.
توپتىق كەزەڭنىڭ قورىتىندىسى بويىنشا ەڭ مىقتى 8 كوماندا قاتىسادى. بارلىق ماتچ Best of 3 فورماتىندا وتەدى.

ءتۋرنيردىڭ سوڭعى ماتچى دا Best of 3 فورماتىندا ويناتىلادى. تۋرنير جەڭىمپازى PGL Major Astana 2025 چەمپيونى اتانىپ، ءتۋرنيردىڭ باس جۇلدەسىن الادى.

قر كيبەرسپورت فەدەراتسياسى حابارلاماسىندا قازاقستاندا PGL ءتۋرنيرىن وتكىزۋ ەلىمىزدىڭ جاھاندىق كيبەرسپورت ارەناسىنداعى پوزيتسياسىن نىعايتاتىنى، حالىقارالىق قوعامداستىقتىڭ نازارىن اۋداراتىنى، ينفراقۇرىلىمنىڭ وسۋىنە جانە جەرگىلىكتى ويىنشىلار ءۇشىن جاڭا مۇمكىندىكتەر جاساۋعا ىقپال ەتە وتىرىپ، ەلىمىزدەگى كيبەرسپورتتى دامىتۋداعى ماڭىزدى قادام بولاتىنى ايتىلعان.

Abai.kz