تۇركى مادەنيەتى جانە مۇراسى قورى مەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى اراسىندا ىنتىماقتاستىق تۋرالى مەموراندۋمعا قول قويىلدى. 

2025 جىلعى 15 مامىردا تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا قازاقستان رەسپۋبليكاسىنا جاساعان جۇمىس ساپارى اياسىندا تۇركىستان قالاسىندا ورنالاسقان قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە ارنايى باردى.

ساپار بارىسىندا قور باسشىسى ۋنيۆەرسيتەتتىڭ رەكتورى جانار تەمىربەكوۆامەن كەزدەسۋ وتكىزدى. تاراپتار عىلىمي زەرتتەۋلەردى دامىتۋ، تۇركى حالىقتارىنىڭ رۋحاني جانە مادەني مۇراسىن ساقتاۋ مەن ناسيحاتتاۋ، تاريح، تۇركىتانۋ جانە مادەني ديپلوماتيا سالالارىندا ماماندار دايارلاۋ باعىتتارىندا ىنتىماقتاستىقتى تەرەڭدەتۋ مۇمكىندىكتەرىن تالقىلادى.

اكادەميالىق جانە ستۋدەنتتىك الماسۋ ماسەلەلەرىنە، سونداي-اق تۇركى حالىقتارىنىڭ ماتەريالدىق جانە رۋحاني قۇندىلىقتارىن ناسيحاتتاۋعا باعىتتالعان بىرلەسكەن جوبالاردى ىسكە اسىرۋعا ەرەكشە نازار اۋدارىلدى.

كەزدەسۋ ناتيجەسىندە تۇركى مادەنيەتى جانە مۇراسى قورى مەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى اراسىندا ىنتىماقتاستىق تۋرالى مەموراندۋمعا قول قويىلدى. قۇجات ەكىجاقتى سەرىكتەستىكتى نىعايتۋدى، عىلىمي-زەرتتەۋ جانە اعارتۋشىلىق باستامالاردى قولداۋدى، سونداي-اق تۇركى الەمىنىڭ مادەني بىرلىگىن نىعايتۋعا باعىتتالعان بىرلەسكەن جوبالاردى جۇزەگە اسىرۋدى كوزدەيدى.

تاراپتار مەموراندۋمعا قول قويۋ – تۇركى الەمى ينستيتۋتتارى اراسىنداعى رۋحاني بايلانىستى كۇشەيتۋ جانە ءوزارا ءىس-قيمىلدى كەڭەيتۋ جولىنداعى ماڭىزدى قادام ەكەنىنە سەنىم ءبىلدىردى. بۇل كەلىسىم تۇركى حالىقتارىنىڭ باي تاريحي-مادەني مۇراسىن ساقتاۋ جانە حالىقارالىق دەڭگەيدە دارىپتەۋ باعىتىنداعى ىنتىماقتاستىققا تىڭ سەرپىن بەرەدى.

Abai.kz