بىرلەسكەن جوبالارعا بەلگىلى كاسىپكەر ەمين اگالاروۆ قىزىعۋشىلىق تانىتتى. بۇل تۋرالى ءازەربايجانداعى Kazakh Tourism جانە Sea Breeze Resort اراسىنداعى ىنتىماقتاستىق تۋرالى مەموراندۋمعا قول قويۋ بارىسىندا بەلگىلى بولدى. قۇجات تۇراقتى تۋريزم جانە ينۆەستيتسيالىق دامۋ سالاسىنداعى ارىپتەستىكتى نىعايتۋ جولىنداعى ماڭىزدى قادامعا اينالدى.

ماڭعىستاۋ وبلىسىندا كاسپي تەڭىزىنىڭ جاعالاۋىندا Sea Breeze ۇقساس كۋرورت سالۋ مۇمكىندىگىن تالقىلاۋ -  ەكى تاراپ جۇرگىزگەن كەلىسسوزدەگى باستى تاقىرىپتاردىڭ ءبىرى. بولاشاق جوبا ءۇشىن پەرسپەكتيۆالىق لوكاتسيالار رەتىندە تابيعي الەۋەتى بىرەگەي كەندىرلى جانە جىلى جاعاجاي اتالدى. ولار ساياحاتشىلاردى تارتاتىن حالىقارالىق ءتۋريزمنىڭ جاڭا نۇكتەسى بولا الادى.

«Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجانۇلى ماڭعىستاۋ ءوڭىرىنىڭ ينۆەستيتسيالىق جانە تۋريستىك الەۋەتىن تانىستىرىپ، شەتەلدىك ينۆەستورلارعا ارنالعان مەملەكەتتىك قولداۋ شارالارىنا نازار اۋداردى جانە ودان ءارى ىنتىماقتاستىققا دايىن ەكەنىن ءبىلدىردى.

جاقىن ارادا ەمين اگالاروۆ ماڭعىستاۋعا كەلۋدى جوسپارلاپ وتىر. وندا ول جوباعا ۇسىنىلعان الەۋەتتى ورىندارىمەن جەكە تانىسادى.

«بىزدە ەكى مىندەت بار — ەلدەرىمىز اراسىنداعى ءوزارا تۋريستىك اعىندى ارتتىرۋ جانە قازاقستان اۋماعىنداعى كاسپي تەڭىزىنىڭ جاعالاۋىنداوسىنداي كۋرورتتىق جوبانى ينتەگراتسيالاۋ مۇمكىندىگىن قاراستىرۋ»، — دەدى ەمين اگالاروۆ.

مەموراندۋم Kazakh Tourism پەن Sea Breeze Resort ءۇشىن ىنتىماقتاستىقتى دامىتۋدىڭ باستاۋىنا  اينالدى. قۇجات يننوۆاتسيالىق شەشىمدەر مەن تالدامالىق زەرتتەۋلەردى ەنگىزۋدەن باستاپ، تۋريستىك ينۆەستيتسيالىق جوبالاردى ىسكە اسىرۋ مەن بىرلەسكەن ءىس-شارالاردى ۇيىمداستىرۋعا دەيىنگى نەگىزگى باعىتتاردى قامتيدى. بۇگىنگى ءتۋريزمنىڭ باسىم باعىتتارىنىڭ ءبىرى سانالاتىن تۇراقتى دامۋعا ەرەكشە نازار اۋدارىلعان.

ساپار اياسىندا قازاقستاندىق دەلەگاتسيا باكۋدەگى Sea Breeze جوباسىمەن تانىستى. قازىرگى ۋاقىتتا كەشەن 500 گەكتار اۋماقتى جانە 7 شاقىرىم جاعالاۋ سىزىعىن قامتيدى. وندا تۇرعىن ۇيلەر، قوناق ۇيلەر، مەكتەپتەر، مەديتسينالىق مەكەمەلەر، بالاباقشالار جانە دەمالىس ايماقتارى بار. كۋرورتتىق ايماقتا ەكولوگياعا ەرەكشە نازار اۋدارىلادى. قازىردىڭ وزىندە 10 ميلليوننان استام اعاش وتىرعىزىلىپ، بالامالى ەنەرگيا كوزدەرى بەلسەندى تۇردە ەنگىزىلۋدە. بولاشاقتا جوبا اۋماعى 1300 گەكتارعا، جاعالاۋ ۇزىندىعى 22 شاقىرىمعا دەيىن ۇلعايادى دەپ جوسپارلانۋدا.

Abai.kz