قازاقستان مەن فرانتسيا اراسىنداعى تاۋار اينالىمى ءبىر جىلدا 31%-عا ارتتى: استانادا ينۆەستيتسيالىق ىنتىماقتاستىق كەلەشەگى تالقىلانۋدا.

پرەمەر-مينيستر ولجاس بەكتەنوۆ ەكى ەلدىڭ بيزنەس-قوعامداستىعىنىڭ 300-دەن استام وكىلى قاتىسقان قازاقستان-فرانتسيا ينۆەستيتسيالىق فورۋمىن اشتى.

فورۋمنىڭ كۇن تارتىبىندە ساۋدا-ەكونوميكالىق قاتىناستاردى، كولىك، ەنەرگەتيكا جانە ونەركاسىپتىك الەۋەتتى دامىتۋ، ازىق-تۇلىك قاۋىپسىزدىگى مەن دەنساۋلىق ساقتاۋ سالاسىنداعى ىنتىماقتاستىق، قالالاردى تۇراقتى دامىتۋ جانە قالالىق ورتانىڭ ساپاسىن جاقسارتۋ، سونداي-اق تكش جانە تۋريزم سالالارىن نىعايتۋ مەن ارتاراپتاندىرۋعا ارنالعان كەڭ اۋقىمدى ماسەلەلەر تۇر.

وتكەن جىلى ەكى ەل اراسىنداعى تاۋار اينالىمى 31%-عا ارتىپ، $5,5 ملرد رەكوردتىق كورسەتكىشكە جەتتى، ونىڭ ىشىندە ەكسپورت كولەمى $3,6 ملرد-تى قۇرادى. قازاقستانداعى فرانتسۋز ينۆەستيتسياسى $20 ملرد-قا جاقىندادى، ەلىمىزدە فرانتسۋز كاپيتالىنىڭ قاتىسۋىمەن 200-دەن استام كومپانيا بەلسەندى جۇمىس ىستەپ كەلەدى.

بۇگىندە قازاقستان فرانتسيا ءۇشىن جەتەكشى سەرىكتەس سانالادى، ورتالىق ازيا ەلدەرىمەن بارلىق ساۋدانىڭ 80%-عا جۋىعى ونىڭ ۇلەسىنە تيەسىلى.

فورۋمدى اشقان پرەمەر-مينيستر ولجاس بەكتەنوۆ ەكى مەملەكەت باسشىلارى دەڭگەيىندەگى سەنىمدى قارىم-قاتىناستار ناتيجەسىندە ەكىجاقتى بايلانىس ستراتەگيالىق ارىپتەستىكتىڭ كەڭەيتىلگەن دەڭگەيىنە كوتەرىلگەنىن اتاپ ءوتتى.

سۋرەت: primeminister.kz سايتىنان الىندى.

«فرانتسيامەن ىنتىماقتاستىق – قازاقستاننىڭ سىرتقى ساياساتىنداعى نەگىزگى باسىمدىقتاردىڭ ءبىرى جانە ەۋروپالىق وداق شەڭبەرىندەگى سەرىكتەستىگىمىزدىڭ اجىراماس بولىگى. ءبىزدىڭ ەلدەرىمىز بەرىك ساياسي بايلانىستارمەن، بەلسەندى ۇكىمەتارالىق جانە پارلامەنتتىك ديالوگپەن، سونداي-اق قارقىندى ساۋدا جانە ينۆەستيتسيالىق ءوزارا ءىس-قيمىلمەن ەرەكشەلەنەتىن بەرىك جانە كوپقىرلى سەرىكتەستىككە يە»، — دەپ اتاپ ءوتتى ولجاس بەكتەنوۆ.

پرەمەر-مينيستر قازاقستاننىڭ وڭتۇستىگىندە قۋاتى 1 گۆت بولاتىن تotal Energies كومپانياسىمەن جەل ەلەكتر ستانساسىن سالۋ، Alstom كومپانياسى ۇسىنعان ءوندىرىستى وقشاۋلاۋ جانە تەمىرجول سەكتورىنا جاڭا ينۆەستيتسيا، Air Liquide كومپانياسىنىڭ پاۆلودار محز-داعى سۋتەگى ەنەرگەتيكاسى بويىنشا جوباسى، Danone, Lactalis جانە Lidea جانە ت. ب. قاتىسۋىمەن تاماق جانە ءسۇت ونەركاسىبىن دامىتۋ سياقتى نەگىزگى بىرلەسكەن جوبالارعا توقتالدى.

سۋرەت: primeminister.kz سايتىنان الىندى.

قازاقستان ترانسكاسپي حالىقارالىق كولىك باعىتىن دامىتۋعا جانە جي، فارماتسەۆتيكا، تۋريزم جانە سۋ رەسۋرستارىن باسقارۋ سياقتى سەكتورلارداعى ىنتىماقتاستىققا مۇددەلى.

سونداي-اق استانا مەن الماتىدا فرانتسۋز مەكتەپتەرىنىڭ اشىلۋى، اباي اتىنداعى قازۇپۋ-داعى Lumière ورتالىعىنىڭ جانە لوتارينگيا ۋنيۆەرسيتەتى فيليالىنىڭ جۇمىسىن قوسا العاندا، ءبىلىم بەرۋ جانە عىلىمي كووپەراتسياداعى ىلگەرىلەۋشىلىك اتاپ ءوتىلدى.

سۋرەت: primeminister.kz سايتىنان الىندى.

ولجاس بەكتەنوۆ قازاقستان شەتەلدىك ارىپتەستەر ءۇشىن قولايلى ينۆەستيتسيالىق احۋال جاساۋعا تولىق نيەتتى ەكەنىن اتاپ ءوتتى. قازىرگى ۋاقىتتا قازاقستان ۇسىنىپ وتىرعان ينۆەستورلار ءۇشىن مۇمكىندىكتەرگە، قۇقىقتىق كەپىلدىكتەر، سالىقتىق جەڭىلدىكتەر، ارنايى ەكونوميكالىق ايماقتارعا جانە احقو-عا نازار اۋدارىلۋدا.

فورۋم قازاقستان مەن فرانتسيا پرەزيدەنتتەرى اراسىنداعى ۋاعدالاستىقتارىنىڭ ءىس جۇزىندەگى جالعاسى بولۋعا جانە ىسكەرلىك ىنتىماقتاستىقتى كەڭەيتۋگە، جاڭا ينۆەستيتسيالىق جوبالاردى ىسكە قوسۋعا جانە ەكى ەلدىڭ بيزنەسى اراسىنداعى بايلانىستاردى نىعايتۋعا باعىتتالعان.

ءىس-شارا قورىتىندىسى بويىنشا ەنەرگەتيكا، كولىك، دەنساۋلىق ساقتاۋ جانە سۋ رەسۋرستارى سالالارىنداعى كەلىسىمدەردى قوسا العاندا، بىرقاتار قۇجاتقا قول قويۋ جوسپارلانعان.

Abai.kz