دونالد ترامپتىڭ اكىمشىلىگىنە ۋكراينانىڭ رەسەيلىك اۋەايلاقتارعا شابۋىلى تۋرالى حابارلانباعان. بۇل تۋرالى اق ءۇيدىڭ وكىلدەرى وقيعاعا تۇسىنىكتەمە بەرۋدەن باس تارتتى.

بۇعان قوسا، Axios باسىلىمى كيەۆتىڭ ۆاشينگتونعا الدىن الا حابارلاعانى تۋرالى ءوز ماقالاسىن تۇزەتىپ وتىردى. ماقالانىڭ جاڭارتىلعان نۇسقاسىندا بىلاي دەلىنگەن: «ۋكراينالىق شەنەۋنىكتىڭ ايتۋىنشا، ۋكراينا ترامپ اكىمشىلىگىنە شابۋىل تۋرالى الدىن الا حابارلاعان جوق».

كەشە ۋكراينا رەسەيدىڭ بىرقاتار وڭىرىندەگى، اسىرەسە تىل ايماقتارداعى اسكەري نىساندارعا، سونىڭ ىشىندە اۋە بازالارىنا دروندارمەن شابۋىلدادى. «تور» دەگەن اتاۋ قويىپ، اسكەري وپەراتسيا جۇرگىزدى.

1) رەسەيدىڭ ريازان وبلىسىنداعى «دياگيلوۆو» اەرودرومىنا دروندار شابۋىلدادى.

2) رەسەيدىڭ يركۋتسكى وبلىسى. ۋسولە-سيبيرسكوە دەيتىن قالاشىق بار. سونداعى «بەلايا» دەيتىن اسكەري گارنيزون مەن اۋە ايلاعى سوققىنىڭ استىندا قالدى. بۇل رەسەيدىڭ سىبىرىنە جاسالعان العاشقى شابۋىلداردىڭ ءبىرى.

3) مۋرمانسكى وبلىسىنداعى «ولەنيا» دەيتىن اۆيابازا سوققىنىڭ استىندا قالدى. بۇل جەردە يادرولىق قارۋ تاسىمالداۋشىلار ورنالاسقان.

4) مۋرمانسكى وبلىسىنداعى سەرەۆومورسك قالاسى شابۋىلعا ۇشىرادى. سەۆەرومورسك - يادرولىق وقتۇمسىقتارى بار سۇڭگۋىر قايىقتارعا قىزمەت كورسەتەتىن رەسەي فلوتىنىڭ نەگىزگى قالالارىنىڭ ءبىرى.

5) بريانسكى جانە كۋرسكى وبلىستارىندا تەمىرجول كوپىرلەرى سەريالى تۇردە تالقاندالدى.

رەسەيدىڭ ەڭ كەمى 4 اۋەجايىنا (ايلاعىنا) شابۋىل جاسالعان. ولار: «ولەنيا»، «دياگيلەۆو»، «بەلايا» جانە «يۆانوۆو». ناقتى قانشا ۇشاقتىڭ جويىلعانى ازىرگە بەلگىسىز. كەي اقپارات كوزدەرى 40-قا جۋىق دەسە، تاعى ءبىر دەرەككوزدەر ەڭ كەمى 12 ۇشاق جويىلعانىن جازۋدا. بۇلاردىڭ بارلىعى دەرلىك رەسەيدىڭ ستراتەگيالىق ۇشاقتارى. قۇنى 200 ملن دوللاردان اساتىن ا-50, تۋ-95 جانە تۋ-22 م3 ۇشاقتارى بار.

بۇل ءسوزسىز وسى سوعىستاعى ۋكراينانىڭ ەڭ اۋقىمدى جانە ەڭ ناتيجەلى وپەراتسياسى. سەبەبى، ۋكراينا مەن يركۋتسكىنىڭ اراسى 4,7 مىڭ شاقىرىمعا دەيىن جەتەدى. ال ۋكراينا مەن مۋنمانسكى ورتاسىندا بەلارۋس، ليتۆا، لاتۆيا، ەستونيا مەن فينليانديا مەملەكەتتەرى جاتىر. قاشىقتىعى 2,2 مىڭ شاقىرىمعا جۋىقتايدى.

ۋكراينا باق-تارىنىڭ جازۋىنشا، «تور» وپەراتسياسى 1,5 جىل بويى ۇيىمداستىرىلعان. FPV-دروندار اۋەلى جۇك كولىكتەرى ارقىلى رەسەي اۋماعىنا كىرگىزىلگەن. كەيىن قاشىقتان باسقارۋ ارقىلى اۋەگە كوتەرىلگەن.

ساراپشىلار قۇنى 200-300 ملن دوللارلىق ستراتەگيالىق ۇشاقتاردى ۋكراينانىڭ 300 دوللارلىق FPV-دروندارى تالقانداعانىن جازۋدا.

Abai.kz