مۇگەدەكتىگى بار ادامداردىڭ ءوز بەتىنشە داۋىس بەرۋ مۇمكىندىگى بولۋى ءتيىس. وسى ماقساتتا ورتالىق سايلاۋ كوميسسياسى داۋىس بەرۋگە ارنالعان بيۋللەتەنگە ارنايى برايل قارپى بار ترافارەتتەر ازىرلەيدى.

بۇگىن وسك وتىرىسىندا اتالعان ترافارەتتى كورسەتىپ، ونىڭ سايلاۋ كۇنى ەلىمىزدىڭ بارلىق سايلاۋ ۋچاسكەلەرىندە قولجەتىمدى بولاتىنى اتاپ ءوتىلدى.

«ترافارەتتىڭ مازمۇنى داۋىس بەرۋگە ارنالعان بيۋللەتەنگە تولىعىمەن سايكەس كەلەدى جانە ەكى تىلدە ازىرلەنگەن. برايل قارپىنىڭ بەدەرلى-نۇكتەلى تاڭبالارى كادىمگى باسپا ماتىنىمەن سالىستىرعاندا كوبىرەك ورىن الاتىنىن ەسكەرسەك، ترافارەت ەكى جاقتى ەتىپ جاسالعان. الدىڭعى جاعىندا بيۋللەتەننىڭ اتاۋى تۋرالى اقپارات، ال ارتقى جاعىندا سايلاۋعا قاتىساتىن ساياسي پارتيالاردىڭ اتاۋلارى جانە «بارىنە قارسىمىن» جولى جازىلعان. «ترافارەتتى ازىرلەۋ جانە دايىنداۋ بارىسىندا بيۋللەتەنگە سايكەستىك تالاپتارى، سونداي-اق ماماندار مەن برايل قارپىن پايدالانۋشىلاردىڭ پراكتيكالىق ۇسىنىمدارى ەسكەرىلدى»، - دەپ اتاپ ءوتتى وسك مۇشەسى ءلاززات سۇيىندىك.

ايتا كەتەيىك، برايل قارپى بار مۇنداي ترافارەت - مۇگەدەكتىگى بار ادامدارعا قاجەتتى اقپاراتپەن تانىسىپ، ءوز بەتىنشە داۋىس بەرۋگە مۇمكىندىك بەرەتىن جالعىز ءتاسىل ەمەس. ءاربىر سايلاۋ ۋچاسكەسىندە ارنايى بۇرىشتار ۇيىمداستىرىلعان. وندا دياگونالى كەمىندە 54 سانتيمەتر بولاتىن مونيتورى بار كومپيۋتەر قاراستىرىلعان. كومپيۋتەردە پارتيالىق تىزىمدەرىن ۇسىنعان جەتى ساياسي پارتيا تۋرالى ورتالىق سايلاۋ كوميسسياسى بەلگىلەگەن مالىمەتتەردىڭ ستاندارتتى جيىنتىعىنا سايكەس بىرىڭعاي فورماتتا اۋديواقپارات، سونداي-اق باسقا دا اۋديو- جانە بەينەماتەريالدار ورنالاستىرىلعان. ارنايى بۇرىشتا قۇلاققاپتار، قوسىمشا جارىقتاندىرۋ قۇرالدارى جانە ۇلكەيتكىش لۋپا دا قاراستىرىلعان.

Abai.kz