4 ماۋسىم – مەملەكەتتىك رامىزدەر كۇنىنە وراي الماتىدا «باتىر» پرەزيدەنتتىك پولكىنىڭ ارنايى توبى تۋ كوتەرۋ سالتاناتتى ءراسىمىن وتكىزدى.

پاتريوتتىق ءىس-شارا تاۋ باۋرايىنداعى «مەدەۋ» سپورت كەشەنىندە ۇيىمداستىرىلدى. سالتاناتتى راسىمگە قالا اكىمى دارحان ساتىبالدىمەن قاتار، مادەنيەت پەن سپورت قايراتكەرلەرى، قوعام بەلسەندىلەرى، قازاقستان حالقى اسسامبلەياسىنىڭ جانە جاستار ۇيىمدارىنىڭ وكىلدەرى قاتىستى.

قازاقستان رەسپۋبليكاسىنىڭ مەملەكەتتىك تۋى كوككە كوتەرىلەر تۇستا ب. بايقاداموۆ اتىنداعى حور كاپەللاسى مەن الماتى گارنيزونىنىڭ ۇرلەمەلى وركەسترى مەملەكەتتىك ءانۇراندى ورىندادى.

ال، سالتاناتتى ءىس-شارادان كەيىن كوپشىلىكتىڭ نازارىنا قالاداعى جەتەكشى شىعارماشىلىق ۇجىمدار مەن ونەرپازداردىڭ قاتىسۋىمەن كونتسەرتتىك باعدارلاما ۇسىنىلدى.

كورەرمەن «قازاقستانىم»، «وتان»، «تۋعان جەر»، «تۋعان جەرىم تاماشا»، «سۇيىكتى ەلىم»، «مەن قازاقپىن»، «ۇلى دالا»، «قازاعىم»، «اتامەكەن» سىندى بىرقاتار پاتريوتتىق ءارى ەسترادالىق كومپوزيتسيانى تىڭدادى.

قوسا كەتەيىك، مەملەكەتتىك رامىزدەر كۇنىنە ارنالعان مەرەكەلىك ءىس-شارالار قالا اۋداندارىندا جالعاسىپ جاتىر.

نۇربەك ايتىمبەتوۆ، ساياساتتانۋشى:

– مەملەكەتتىك رامىزدەر - ەلىمىزدىڭ دەربەستىگى مەن تاۋەلسىزدىگىن كۇللى الەمگە جاريا ەتۋشى ءارى مەملەكەتىمىزدىڭ وتكەنى، بۇگىنى مەن بولاشاعى اراسىنداعى ساباقتاستىقتىڭ جارقىن بەينەسى، حالقىمىزدىڭ رۋحىن، ۇلتتىق سالت-ساناسىن، قاھارماندىعى مەن دانالىعىن، بولاشاققا ءۇمىتىن، ارمان-تىلەگىن جەتكىزەتىن ەرەكشە قۇندى بەلگىلەر. ياعني قازىرگى تاڭدا ۇلتتار مەن ۇلتتىق مەملەكەتتەردىڭ ناعىز وزەكتى ماسەلەلەرى ەكونوميكا، ساياسات، قورعانىس سالاسىمەن ەمەس، كەرىسىنشە، ۇلتتىڭ باستى قۇندىلىعى بولىپ تابىلاتىن ۇلتتىق نىشاندارمەن تىعىز بايلانىستى.

مەملەكەتتىك رامىزدەر ۇلتتىق بىرە­گەيلىكتىڭ قالىپتاسۋ تىرەگى جانە ءاربىر مەملەكەتتىڭ دامۋىنىڭ اجىراماس ءبىر بولىگى بولىپ تابىلادى. رامىزدەر تاريحى العاشقى قوعامداعى توتەمگە تابىنۋدان باستاپ، كەيىن تۇركىلەر داۋىرىندەگى كوك بورىگە تابىنۋ، ورتا عاسىرداعى حاندىقتار مەن پاتشالىقتاردىڭ ەلتاڭبالارى مەن جالاۋ­لارى جانە تەڭگەلەرىندەگى ايشىقتى بەل­گىلەرىمەن ساباقتاسادى. قازىرگى كەزدە ەلى­مىزدىڭ مەملەكەتتىك رامىزدەرى ونىڭ بەتكە ۇستار قۇجاتى سياقتى بىرەگەي نەگىزدەرى مەن سالت-ءداستۇرىن ايقىنداپ كورسەتەدى. كوپ كولەمدە مەملەكەتتىك بيلىكتىڭ رامىزدەرى كەز كەلگەن مەملەكەتتىڭ نەگىزىن قۇرايتىن تۇجى­رىمداماسى - ۇلتتىق يدەيادا كورىنىس تابۋى ءتيىس. ال ناقتى ۇلتتىق يدەيا تىكەلەي سول حالىقتىڭ اراسىندا قالىپتاسادى. ساياسي جۇيەنىڭ كوشباسشىلارى ۋاقىت وتە كەلە اۋىسىپ وتىرۋى مۇمكىن، بىراق حالىق ءوزىنىڭ ۇرپاقتان-ۇرپاققا جالعاسقان، عاسىرلار بويى يەمدەنگەن جانە جوعالتىپ العان ۇلتتىق قۇندىلىقتارىمەن، جاعىمدى جانە جاعىمسىز قاسيەتتەرىمەن قالادى، سونىمەن قاتار ءوزارا ۇلتتىق مەنتاليتەتتى قالىپ­تاستىرادى. مەملەكەتتىك رامىزدەر ءما­دەنيەتىمىز، تاريحىمىز بەن مەنتاليتەتى­مىزدىڭ كوركەم تۋىندىسى بولۋى كەرەك. ەلىمىزدىڭ ازاماتتارىنىڭ رامىزدەرگە دەگەن قارىم-قاتىناسى، ولاردىڭ قانشالىقتى دەڭگەيدە وزدەرىن وسى ەلدىڭ ازاماتى سانايتىندىقتارىنىڭ جانە بولاشاققا سەنىمىنىڭ، وتانسۇيگىشتىكتىڭ كورسەتكىشى ىسپەتتەس.

ەلىمىزدىڭ ەجەلدەن اڭساعان تاۋەلسىزدىگىنە قول جەت­كىزىپ، قازاق ۇلتىنىڭ سالت-ءداستۇرى مەن ادەت-عۇرپىنىڭ قايتا جاڭعىرۋى، مەملەكەتتىك رامىزدەردىڭ بەكىتىلۋى بولاشاق دامۋعا بەت العان ەگەمەن ەلىمىز ءۇشىن ەرەكشە قۇبىلىس. سوندىقتان مەملەكەتتىك رامىزدەردى قاس­تەرلەۋ ازاماتتارىمىز ءۇشىن باستى ءمىن­دەت بولىپ تابىلۋى ءتيىستى. سونداي-اق ۇلتارالىق تاتۋلىق پەن بەيبىتشىلىكتى ناسيحاتتاۋ جولىندا جانە مەملەكەتىمىزدىڭ الەمدىك دەڭگەيدە تانىلىپ وزىنە ءتان بەلگىلەرىمەن دامىعان ەلدەر قاتارىنان ورىن الۋى ءۇشىن ءتول نىشاندارىمىزدىڭ اتقاراتىن قىزمەتى ايرىقشا.

Abai.kz