جاقىندا سەناتورلار قارجى نارىعىن دامىتۋ جانە تۇتىنۋشىلاردىڭ قۇقىقتارىن قورعاۋ ماسەلەلەرى تۋرالى زاڭعا تۇزەتۋلەر ەنگىزدى.

ۇسىنىلعان وزگەرىستەر:

وسى زاڭ ارقىلى مۇگەدەكتىگى بار ادامداردىڭ قۇقىقتارىن قورعاۋدى كۇشەيتۋ ءۇشىن بانكتەر، ميكروقارجى جانە ساقتاندىرۋ ۇيىمدارى الەۋمەتتىك وسال توپتارعا جاتاتىن ازاماتتارعا قىزمەت كورسەتۋ ستاندارتتارىن ەنگىزۋگە مىندەتتەلمەك.

بانكتەر مەن ميكروقارجى ۇيىمدارى توتەنشە جاعداي سالدارىنان زارداپ شەككەندەرگە جانە حالىقتىڭ الەۋمەتتىك وسال توپتارىنا قارىزدار بويىنشا كەيىنگە قالدىرۋدى ۇسىنۋعا ءتيىس.

سونداي-اق قارىزدارىن مەرزىمىنەن بۇرىن وتەگەنى ءۇشىن تۇراقسىزدىق ايىبى جويىلادى.

مەرزىمدى قىزمەتتەگى اسكەري قىزمەتشىلەر قارىز الا المايدى. مۇنداي الدىن الۋ شاراسى ارمياداعى جارعىلىق ەمەس قاتىناستاردى ودان ءارى جويۋدى كوزدەيدى.

ەندى ءىرى كولەمدە كەپىلسىز نەسيەلەر الۋعا جۇگىنگەن ازاماتتار بولىمشەگە كەلىپ، جەكە قاتىسۋى قاجەت. كەي جاعدايدا eGov پورتالى ارقىلى راستاۋ تالاپ ەتىلەدى.

بانكتەر كۇدىكتى وپەراتسيالاردى توقتاتۋ ءۇشىن كوبىرەك وكىلەتتىكتەرگە يە بولادى. تەلەفون الاياقتىعىمەن كۇرەسۋگە دە ەرەكشە ءمان بەرىلىپ وتىر. ءبىر ادامعا 10-نان اسپايتىن ۇيالى ءنومىردى تىركەۋگە رۇقسات بەرۋ، سونداي-اق، ارنايى جابدىقتى، مىسالى، SIM-بوكستاردى ليتسەنزياسىز اكەلۋگە جانە پايدالانۋعا تىيىم سالۋ ۇسىنىلدى.

وسىلايشا، سەناتورلار زاڭدى كونتسەپتۋالدى تۇردە قولداپ، وعان بىرقاتار تۇزەتۋلەر ەنگىزدى:

مەملەكەتتىك ورگاندار مەن كرەديتتىك بيۋرولار مەرزىمدى اسكەري قىزمەتكە شاقىرۋعا قاتىستى اقپارات الماسۋى ءتيىس.

بانك قۇپياسى مەن ميكروكرەديت بەرۋ قۇپياسىن قۇرايتىن اقپاراتقا زاڭسىز قول جەتكىزۋدىڭ سالدارىن جويۋ جونىندە شارالار قابىلداۋ مەرزىمى ناقتىلانادى.

ۇلتتىق بانكتىڭ انتيفرود-ورتالىعىنىڭ دەرەكقورلارىن ۇيالى بايلانىس وپەراتورلارىنىڭ بازالارىمەن ينتەگراتسيالاۋ رەگلامەنتتەلەدى: الماسۋعا جاتاتىن مالىمەتتەردىڭ تىزبەسى ناقتىلانادى جانە الاياقتىق بەلگىلەرى بار قوڭىراۋ انىقتالعان جاعدايدا ۇيالى بايلانىس وپەراتورلارىنىڭ ءىس-ارەكەتتەرى ايقىندالادى.

دەرەككوزى: مىڭ تەڭگە تەلەگرام ارناسى

Abai.kz