وتكەن جەكسەنبى كۇنى ونەركاسىبى دامىعان جەتى ەلدىڭ باسشىلارى مەن ەۋرووداقتىڭ لاۋازىم يەلەرى كانادادا باس قوستى. اق ءۇي باسشىسى ترامپتىڭ كەلگەنىنەن كەتكەنى تەز بولدى. ونىڭ نەگە اسىققانى ايتپاسا دا تۇسىنىكتى.

بيىلعى ۇلكەن جەتىلىك باسشىلارىنىڭ كەزدەسۋى الاساپىران جاعدايدا ءوتىپ جاتىر. ترامپ اق ۇيگە كەلگەلى ونىڭ بەرگەن بىردە-ءبىر ۋادەسى ورىندالمادى. گازاداعى قىرعىن ءالى جالعاسىپ جاتىر، يزرايل حاماس تى قويىپ يرانعا جالپى بەتتىك شابۋىلعا كوشتى. ۋكراينا مەن رەسەي سوعىسى توقتاۋ بىلاي تۇرسىن، سوزبالاڭعا سالىنىپ، ءورشىپ بارادى. ترامپ گەوساياسي احۋالدى ۋشىقتىرۋدان بولەك ساۋدا ارىپتەستەرىنە، اسىرەسە ەۋروپالىق وداقتاستارىنا تاريف سوعىسىن اشتى.

ادەتتەگىدەي ۇلكەن جەتىلىك باسشىلارى بۇل جولى دا  ەۋروپانىڭ قاۋىپسىزدىگىنە ساياتىن ۋكراينا ماسەلەسىن، ءۇندى-تىنىق مۇحيت ايماعىنىڭ قاۋىپسىزدىگىنە ساياتىن قىتايدىڭ بەيتاراپ تەڭىز ايماقتارىن جاپپاي يەلەنە باستاۋىن، ورتا شىعىستاعى جاڭا قاقتىعىسىتى ورتاعا سالىپ، تالقىلاپ، الەم جۇرتىنا تياناقتى جاۋاپ ۇسىنباق ەكەن. ترەكەڭ ادەتتەگىدەي قىڭىرلىعىنا باسىپ، باس دەسە قۇلاق دەگەن.

ۋكراينا ماسەلەسىنە بايلانىستى زەلەنسكيدى شاقىرعان وزگە ارىپتەستەرىنە اشىق قارسى شىعىپ ءپۋتيندى ۇلكەن جەتىلىككە قايتا كىرگىزۋمىز كەرەك، كرەمل باسشىسى عانا يران مەن يزرايلدىڭ قاتىناسىن رەتتەي الادى دەپ كوسەمسىگەن. فرانتسيا باسشىسى ماكرون وعان قارسىلىق بىلدىرگەن. قىتايدى ساۋدا ارىپتەسى سانايتىنىن، ەشقانداي قاۋىپ كورىپ تۇرماعانىن ايتىپ، جاپونيا باسشىسىنىڭ الاڭىن ەلەۋسىز قالدىرعان.

ترامپ اق ۇيگە كىرۋدىڭ الدىندا كانادانى اقش-تىڭ 51-شتاتى ەتىپ قوسىپ الامىن دەپ لەپىرگەنى بار. كانادانىڭ جاڭا باسشىسى ونىڭ اپتىعىن باسۋ ءۇشىن مەملەكەتىنىڭ ساۋداعا سالاتىن تاۋار ەمەس ەكەنىن قاتاڭ ەسكەرتتى.

بۇل جولعى باسقوسۋدان ترامپتىڭ جىل باسىنان بەرگى تاريف سوعىسىمەن، بىربەتكەي گەوساياسي ۇستانىمىمەن ۇلكەن جەتىلىكتىڭ اراسىنا جىك سالعانى، شي جۇگىرتكەنى انىق كورىندى.

قازىر ترامپتىڭ باستى وداقتاسى يزرال باسشىسى گاگا سوتى "سوعىس قىلمىسكەرى" دەپ ىزدەۋ جاريالاعان نەتانياحۋ بولىپ تۇر. ەكەۋى ىمىرالاسىپ يراننىڭ اتوم ءوندىرىسى عانا ەمەس، بيلىگىن اۋدارۋعا شىنداپ كىرىسكەنى بەلگىلى بولدى.

ترامپتىڭ پرەزيدەنتتىك مەرزىمى بىتكەنشە جاھان جۇرتىنىڭ دۇربەلەڭنەن كوز اشپايتىن ءتۇرى بار. ونىڭ وداقتاستارىنا قولىن ءبىر سىلتەپ كەتىپ قالعانى سونى ايعاقتايدى.

Abai.kz