ۋكراينادا «ەل ۇزدىك قورعانىس مينيسترىنەن ايىرىلىپ، ىقتيمال پرەزيدەنتتىك ۇمىتكەرگە يە بولدى» دەگەن ساياسي باعا تاراي باستادى. ميحايل فەدوروۆتىڭ قىزمەتتەن كەتكەننەن كەيىنگى بريفينگى ونى تەحنولوگيالىق مەنەدجەردەن دەربەس ساياسي تۇلعا دەڭگەيىنە كوتەرگەنى انىق.

فەدوروۆ جۋرناليستەر الدىنا وكپەگە ەرىك بەرگەن شەنەۋنىك كەيپىندە شىققان جوق. ول پرەزيدەنت ۆولوديمير زەلەنسكيگە شابۋىل جاساماي، اڭگىمەنى ءوزىنىڭ قىزمەتىنەن ارمياداعى رەفورمانىڭ تاعدىرىنا بۇردى. نەگىزگى تەزيسى دە تۇسىنىكتى. باستالعان وزگەرىس توقتاسا، ونىڭ قۇنىن مايدانداعى ۋكراين ساربازدارى تولەيدى.

35 جاستاعى فەدوروۆ قورعانىس مينيسترلىگىن نەبارى التى اي باسقاردى. سوعان قاراماستان بريفينگكە كاسىبي ازىرلەنگەن پرەزەنتاتسيامەن شىعىپ، اتقارعان جۇمىسىن، شەشىلمەگەن ءتۇيىندى جانە اياقتاۋعا ۇلگەرمەگەن رەفورماسىن رەت-رەتىمەن باياندادى. ۋكراينا قورعانىس مينيسترلىگى ونىڭ كەزەڭىندەگى 22 نەگىزگى ناتيجەنى جەكە جاريالادى.

رەسمي تىزىمدە رەسەي اسكەرىنىڭ Starlink جۇيەسىنە قولجەتىمدىلىگىن شەكتەۋ، ءتورت ايدا الدىڭعى ءبىر جىلداعىدان دا كوپ درون ساتىپ الۋ، اسكەري ساتىپ الۋدى قايتا قۇرۋ، درون بولىمدەرىن تۇراقتى قارجىلاندىرۋ جانە قورعانىس سالاسىنا جاساندى ينتەللەكت ەنگىزۋ اتالادى.

اۋە نىساندارىن ۇستاپ قالۋ كورسەتكىشى دە ارتقانى مالىمدەلدى. اتالعان ناتيجەنىڭ ءبىر بولىگى ۋكراينا تاراپى ۇسىنعان دەرەككە نەگىزدەلگەنىمەن، فەدوروۆتىڭ تەحنولوگيالىق سوعىس ارحيتەكتورى رەتىندەگى بەدەلىن كۇشەيتتى.

ەڭ وتكىر بولىك قارۋلى كۇشتەردىڭ باس قولباسشىسى الەكساندر سىرسكيگە ارنالدى. فەدوروۆ ونىڭ باستامالاردى بوگەپ، رەفورمانى ىشتەن السىرەتكەنىن جانە ارميادا جاۋاپكەرشىلىگى تومەن باسقارۋ مادەنيەتىن قالىپتاستىرعانىن ايتتى.

وسى جەردە فەدوروۆ ءوزىن تەك مىقتى تەحنوكرات رەتىندە ەمەس، دايىن ساياسي ويىنشى رەتىندە كورسەتتى. ول سىرسكيدىڭ بۇرىنعى اسكەري ەڭبەگىن جوققا شىعارمادى، بىراق درون داۋىرىندە سوعىستىڭ سيپاتى تۇبەگەيلى وزگەرگەنىن العا تارتتى. ءسويتىپ، تارتىستى جەكە وكپە دەڭگەيىنەن ەسكى اسكەري مەكتەپ پەن جاڭا تەحنولوگيالىق دوكترينا اراسىنداعى يدەولوگيالىق قاقتىعىسقا اينالدىردى.

ول الداعى ۋاقىتتا بيلىك كومانداسىندا قىزمەت اتقارۋعا كەلىسۋى مۇمكىن. رەفورمانى جالعاستىرۋ ءۇشىن سىرسكيمەن دە جۇمىس ىستەۋگە دايىن ەكەنىن اڭعارتتى. دەگەنمەن ساياسي كەڭىستىكتە فەدوروۆ پەن زەلەنسكيدىڭ مۇددەسى ەندى تولىق قابىسا بەرمەۋى ىقتيمال.

زەلەنسكي كادرلىق شەشىم ارقىلى اسكەري باسقارۋداعى داۋدى توقتاتقىسى كەلگەن بولۋى مۇمكىن. ءىس جۇزىندە جابىق اپپاراتتىق تارتىستى بۇكىل ەل كورەتىن ساياسي ساحناعا شىعارىپ الدى. قىزمەتتەن بوساتىلعان مينيستر ءبىر كۇننىڭ ىشىندە رەفورماسىن قورعايتىن، قولداۋشى اۋديتورياسى جانە دايىن ساياسي بەينەسى بار دەربەس فيگۋراعا اينالدى.

فەدوروۆ پرەزيدەنتتىك سايلاۋعا ەرتەڭ تۇسەيىن دەپ تۇرعان جوق. ونىڭ جاسى نەبارى 35-تە، الدىندا ۋاقىت بار. الايدا ۋكراينا ساياساتىنداعى ىقپالدى ەسىمدەر قاتارىنا زەلەنسكي، زالۋجنىي جانە بۋدانوۆپەن بىرگە فەدوروۆتىڭ دا قوسىلعانى انىق بايقالدى.

نۇرلان جۇماقان

Abai.kz