ەكاتەرينبۋرگتە رەسەيدىڭ فەدەرالدى قاۋىپسىزدىك قىزمەتى (بۇدان ءارى فقق) قىزمەتكەرلەرى ازىربايجاندىقتاردىڭ ۇيلەرىنە قاتىگەزدىكپەن شابۋىل جاساپ، «ومون» ازىربايجاندىقتاردى اڭشا اۋلادى.

پۋتين رەجيمى بۇل جولى ازىربايجاندىقتارعا قارسى ءوزىنىڭ شىنايى بەت-ءجۇزىن تاعى دا بەتپەردەسىز كورسەتىپ وتىر. نە جاعداي بولدى، وقيعا ارى قاراي قالاي ورىستەدى سونى قالام ۇشىنا ىلىكتىرمەكپىز.

27 ماۋسىمدا ەكاتەرينبۋرگتە پۋتين رەجيمىنىڭ شىنايى پيعىلىن تاعى دا ايقىن كورسەتەتىن قايعىلى وقيعا ورىن الدى - رەسەيلىك فقق قىزمەتكەرلەرىنىڭ ازىربايجاندىقتاردىڭ ۇيلەرىنە جاساعان قاتىگەز شابۋىلدارى سالدارىنان بىرنەشە ادام قازا تاپتى، كەيبىرەۋلەرى اۋىر جاراقات الىپ، توعىز ادام ۇستالدى.

بۇل زورلىق-زومبىلىق اكتىسى ءازىربايجان رەسپۋبليكاسىنىڭ سىرتقى ىستەر مينيسترلىگى تاراپىنان ءادىل نارازىلىق تۋدىردى. ءازىربايجان ءسىم ءوزىنىڭ رەسمي مالىمدەمەسىندە ورىن العان جايتقا تەرەڭ الاڭداۋشىلىق ءبىلدىرىپ، رەسەي تاراپىن وقيعانى جەدەل، جان-جاقتى جانە اشىق تەكسەرۋگە، سونداي-اق كىنالىلەردى جاۋاپقا تارتۋعا شاقىردى.

مۇنداي قاتاڭ قاباق جاۋاپ قاتۋ قيسىندى عانا ەمەس، سونداي-اق قازىرگى رەسەيدە ازشىلىق ۇلتتاردىڭ قۇقىقتارى جۇيەلى تۇردە بۇزىلىپ، كۇش قۇرىلىمدارىنىڭ وزىمشىلدىگى نورماعا اينالعان جاعداي تۇپكىلىكتى ورنىقتى.

27 ماۋسىمداعى رەسەيدىڭ كۇش قۇرىلىمدارىنىڭ ارەكەتتەرى سالدارىنان ءازىربايجان ۇلتىنىڭ ازاماتتارى قازا تاۋىپ، ءتۇرلى دارەجەدەگى دەنە جاراقاتتارىن العان ەكاتەرينبۋرگتەگى قايعىلى وقيعادان كەيىن ۆورونەجدە دە تاپ وسىنداي رەتپەن ازىربايجاندىقتارعا قىسىم جاسالعانى تۋرالى حابار ءتۇستى.

وكىنىشتىسى - مۇنداي جاعدايلار كرەملدىڭ ەل ىشىندە دە، ودان تىسقارى جەرلەردە دە قولداناتىن قۋعىن-سۇرگىن، كەمسىتۋشىلىك جانە قورقىتۋ تاجىريبەسىنىڭ ءبىر بولىگىنە اينالىپ وتىر. امال نە، ازشىلىق ۇلتتاردىڭ وكىلدەرىن جازىقسىز قۋعىن-سۇرگىنگە سالۋ جانە ءولتىرۋ پۋتين رەجيمىنىڭ كۇندەلىكتى ومىرىندەگى قورقىنىشتى قوعامدىق شىندىعىنا اينالدى.

كۋاگەرلەردىڭ ايتۋىنشا، «الەكسەەۆسكي» بازارىندا تۇرمىستىق جانجال ورىن العان: جەرگىلىكتى جۇرگىزۋشى جۇك ءتۇسىرۋ ەرەجەلەرىن ساقتاۋدان باس تارتىپ، قورقىتۋعا كوشىپ، «رۋسسكايا وبششينا» دەپ اتالاتىن جەردەن ادامداردى شاقىرعان. كوپ ۇزاماي ازىربايجاندىقتار تاراپىنان «پىشاقپەن قورقىتۋ» تۋرالى مالىمدەمەلەر جەلدەي ەسىپ تارادى. وسىدان كەيىن رەيدتەر باستالىپ، بازارعا «ومون» لاپ بەردى.

كۋاگەرلەردىڭ ايتۋىنشا، نەگىزىنەن ازىربايجاندىقتار ۇستالىپ، ورىس ۇلتشىلدارى جەلىكتىرگەن توپ تاراپىنان كاسىپكەرلەردىڭ تاۋارلارىن قۇرتىپ ءام ولاردىڭ جۇك كولىكتەرىن ورتەپ جىبەرۋ قاۋپى تونگەن.

وسىلايشا، ماسكەۋ مەن باكۋ اراسى تاعى دا سۋىدى. ازىرگە ماسكەۋ ايىبىن مويىنداپ، كەشىرىم سۇراۋعا اسىعار ەمەس...

Abai.kz