كونستيتۋتسيالىق سوت 2025 جىلعى 25 ماۋسىمداعى № 72 نق-دا قك-ءتىڭ 245-بابىنىڭ ءۇشىنشى بولىگىن جانە 262-بابىن، سونداي-اق جوعارعى سوتتىڭ «سوتتاردىڭ بانديتيزم جانە قىلمىستىق قۇقىق بۇزۋشىلىقتارعا قاتىسا وتىرىپ، باسقا قىلمىستىق قۇقىق بۇزۋشىلىقتار جاساعانى ءۇشىن جاۋاپكەرشىلىك تۋرالى زاڭنامانى قولدانۋىنىڭ كەيبىر ماسەلەلەرى تۋرالى» 2001 جىلعى 21 ماۋسىمداعى № 2 نق-ڭ 11 جانە 13-تارماقتارىن كونستيتۋتسياعا سايكەس دەپ تاني وتىرىپ، كاسىپكەرلىك پەن ۇيىمداسقان قىلمىستى بولىكتەۋ قاجەتتىلىگىن كورسەتتى.

بۇل كونستيتۋتسيالىق ءىس جۇرگىزۋ ازاماتتىڭ ءوتىنىشى بويىنشا قوزعالىپ، وندا ەكونوميكالىق قىلمىس جاساعان كاسىپكەرلەردى كوممەرتسيالىق قۇرىلىمدارعا ساي فورمالدى بەلگىلەر نەگىزىندە ۇيىمداسقان قىلمىستىق توپتاردىڭ مۇشەلەرىمەن تەڭەستىرۋدىڭ دۇرىستىعى تۋرالى ماسەلە كوتەرىلدى.

ءوتىنىشتى قاراۋ بارىسىندا كونستيتۋتسيالىق سوت كاسىپكەرلەردى قىلمىستىق توپ رەتىندە تەك فورمالدى بەلگىلەر نەگىزىندە تانۋعا مۇمكىندىك بەرەتىن ماسەلەگە نازار اۋداردى.

سوندىقتان، قۇقىقتىق قايشىلىقتى جويۋ جانە كاسىپكەرلىك سۋبەكتىلەرگە قىلمىستىق قىسىم قاۋپىن ازايتۋ ماقساتىندا،كونستيتۋتسيالىق سوت ءوزىنىڭ قورىتىندى شەشىمىندە ۇكىمەتكە قىلمىستىق زاڭنامانى جەتىلدىرۋ ماسەلەسىن قاراۋدى، ال جوعارعى سوتقا زاڭدى كاسىپكەرلىك قىزمەت پەن ۇيىمداسقان توپتاردىڭ قىلمىستىق ارەكەتتەرىن ناقتى اجىراتۋ ءۇشىن سوت تاجىريبەسىن قورىتىندىلاۋدى ۇسىندى.

سونداي-اق باس پروكۋراتۋرا ءوز قورىتىندىسىندا، ۇيىمداسقان توپتى كاسىپكەرلەردىڭ قاراپايىم ءسوز بايلاسۋىنان اجىراتۋ ءۇشىن، مۇنداي ارەكەتتەردى سارالاۋدا، ناقتى بەلگىلەر ازىرلەۋ قاجەتتىلىگىن اتاپ ءوتتى.

بۇل تاسىلدەر جاڭارتىلعان قىلمىستىق زاڭنامادا كورىنىسىن تاۋىپ جاتىر.

ا.ج. 26 ماۋسىمدا پارلامەنت سەناتىنىڭ دەپۋتاتتارى تۇزەتۋلەردى ماقۇلدادى، وعان سايكەس رەسمي كاسىپورىندار قىزمەتكەرلەرىنىڭ مىندەتتەرىن ورىنداۋى، ۇيىمداسقان قىلمىستىق توپقا قاتىسۋ بەلگىسى رەتىندە قاراستىرىلمايدى، ەگەر ولار قىلمىس جاساۋ ءۇشىن ادەيى قۇرىلعان بولماسا.

جالپى بۇل وزگەرىستەر كاسىپكەرلىكتى قورعاۋ جانە بيزنەسكە نەگىزسىز قىسىم جاساۋدىڭ الدىن الۋ بويىنشا، جۇرگىزىلىپ جاتقان مەملەكەتتىك ساياساتقا سايكەس كەلەدى.

Abai.kz