الماتىدا قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ وزبەكستان رەسپۋبليكاسىنىڭ سپورت ءمينيسترى ادحام يكراموۆپەن ەكىجاقتى كەزدەسۋ وتكىزدى.

كەزدەسۋگە قازاقستان ۇلتتىق وليمپيادا كوميتەتىنىڭ پرەزيدەنتى گەننادي گولوۆكين، وزبەكستان ۇوك توراعاسىنىڭ ءبىرىنشى ورىنباسارى وتابەك ۋماروۆ، پاراليمپيادا كوميتەتتەرىنىڭ جانە سپورت سالاسىنداعى بىرقاتار ۇيىم باسشىلارى قاتىستى.

كەلىسسوزدەر بارىسىندا تاراپتار بىرلەسكەن ءىس-قيمىلدىڭ وزەكتى باعىتتارىن تالقىلادى. اتاپ ايتقاندا، سپورت كادرلارىن دايارلاۋ، پاراليمپيادالىق سپورتتى دامىتۋ جانە ۇلتتىق سپورت تۇرلەرىن بىرلەسە ناسيحاتتاۋ جانە دامىتۋ ماسەلەلەرى قارالدى.

سونداي-اق بيىل قاراشا ايىندا تۇركىستاندا فۋتبولدان ەكى ەلدىڭ ۇلتتىق قۇرامالارى اراسىندا جولداستىق ماتچ وتكىزۋ جانە 2026 جىلى استانادا ۇيىمداستىرىلاتىن حالىقارالىق «بولاشاق ويىندارى» تۋرنيرىنە وزبەكستان دەلەگاتسياسىنىڭ قاتىسۋى ءسوز بولدى.

«قازاقستان مەن وزبەكستان – سپورت سالاسىنداعى ستراتەگيالىق سەرىكتەستەر. ءبىزدى ورتاق ماقساتتار، سونداي-اق تاريحي جانە مادەني بايلانىستار بىرىكتىرەدى. ەكى ەل اراسىنداعى پراكتيكالىق ىنتىماقتاستىقتى كەڭەيتۋ سپورت سالاسىنىڭ دامۋىنا تىڭ سەرپىن بەرەتىنىنە سەنىمدىمىن»، – دەدى ەربول مىرزابوسىنوۆ.

بۇدان بولەك مينيستر استاناداعى ۇلتتىق سپورت ۋنيۆەرسيتەتىنىڭ قۇرىلىسى اياقتالعانىن اتاپ ءوتىپ، وزبەكستان تاراپىن سپورتتىق ءبىلىم بەرۋ سالاسىندا تىعىز ىنتىماقتاستىق ورناتۋعا شاقىردى.

«قازاقستان ۇلتتىق وليمپيادا كوميتەتى ارقاشان ىنتىماقتاستىققا اشىق ءارى ارىپتەستەرىمىزدىڭ باستامالارىن جوعارى باعالايدى. اسىرەسە، وليمپيادالىق قوزعالىس اياسىنداعى بىرلەسكەن جۇمىستىڭ ماڭىزى زور. مۇنداي كەزدەسۋلەر ءوزارا ارىپتەستىكتى نىعايتىپ، ەلدەرىمىزدە سپورتتى دامىتۋعا جاڭا مۇمكىندىكتەر اشادى»، – دەدى گەننادي گولوۆكين.

كەزدەسۋ سوڭىندا تاراپتار قازاقستان مەن وزبەكستان اراسىنداعى سەرىكتەستىكتى نىعايتۋعا، تۇراقتى سپورتتىق ديالوگتى دامىتۋعا نيەتتى ەكەندىكتەرىن جەتكىزدى.

Abai.kz