الماتىدا بەلگىلى قوعام قايراتكەرلەرى، مادەنيەت، عىلىم، ءبىلىم جانە سپورت سالاسىنىڭ كورنەكتى وكىلدەرى الداعى رەفەرەندۋمعا قاتىستى ءوز ۇستانىمىن ءبىلدىرىپ، ونى ەل بولاشاعىنا تىكەلەي ىقپال ەتەتىن تاريحي وقيعا دەپ باعالادى. ولاردىڭ پىكىرىنشە، بۇل – جاي عانا ساياسي ءراسىم ەمەس، تاۋەلسىز قازاقستاننىڭ دامۋىنداعى ماڭىزدى كەزەڭ. 

ماسەلەن، حالىق قاھارمانى ءسات توقپاقباەۆ ادام قۇقىعىنىڭ ۇستەمدىگى مەملەكەتتىڭ قۇقىقتىق نەگىزىن نىعايتاتىنىن اتاپ ءوتتى. ال مەملەكەت جانە قوعام قايراتكەرى نۇرلان ورازالين قۇجاتتىڭ ستراتەگيالىق ماڭىزىنا توقتالدى.

الماتى زيالىلارى ۇسىنىلىپ وتىرعان وزگەرىستەردىڭ الەۋمەتتىك سيپاتىنا ەرەكشە نازار اۋداردى. ولاردىڭ ايتۋىنشا، قۇجات مازمۇنى جاعىنان تۇسىنىكتى بولىپ، ادام مۇددەسىنە جاقىنداي تۇسكەن.

«جاڭا كونستيتۋتسيامىزدىڭ الەۋمەتتىك باعىتى ايقىندالىپ، ول حالىققا جاقىنداي ءتۇستى»، – دەدى قازاقستاننىڭ حالىق جازۋشىسى سماعۇل ەلۋباي.

قازاقستاننىڭ ەڭبەك سىڭىرگەن قايراتكەرى ازامات ساتىبالدى جاڭا كونستيتۋتسيا ەلدىڭ ۇزاقمەرزىمدى دامۋ باعىتىن ايقىندايتىن نەگىزگى قۇجات ەكەنىن ايتتى.

«ەرەكشە اتاپ وتەتىن جايت – كونستيتۋتسيا تۇڭعىش رەت مەملەكەتتىك تىلدە جازىلدى»، – دەدى ول.

الداعى رەفەرەندۋمنىڭ ماڭىزىن ونەر قايراتكەرلەرى دە ەرەكشە اتاپ ءوتتى. قازاقستاننىڭ حالىق ءارتىسى روزا رىمباەۆا ازاماتتاردى داۋىس بەرۋگە قاتىسۋعا شاقىردى.

«15 ناۋرىز – ەلىمىز ءۇشىن ماڭىزدى كۇن. كەلىپ، ءوز تاڭداۋىڭىزدى جاساڭىزدار»، – دەدى ءانشى.

سونداي-اق جاڭا كونستيتۋتسيا جوباسىنىڭ نەگىزگى تۇستارىنا قاتىستى جان بايجانباەۆ، گۇلنار دوسماتوۆا، ازامات ساتىبالدى، قاراگوز سۇلەيمەنوۆا، شىنار اسقاروۆا، نازىم قىزايباي، تاۋەكەل ءمۇسىلىم جانە باسقا دا تانىمال تۇلعالار پىكىر ءبىلدىردى.

Abai.kz