ماتچ 10 شىلدە قازاقستان ۋاقىتى بويىنشا 21:00-دە باستالادى. 

10 شىلدەدە شىمكەنتتىڭ "ورداباسى" كومانداسى كونفەرەنتسيا ليگاسىنداعى العاشقى ويىنىن وتكىزەدى. قارسىلاس – گرۋزيانىڭ "تورپەدو" كلۋبى. بۇل ماتچ شىمكەنتتىك ۇجىم ءۇشىن ماۋسىمداعى باستى سىناقتاردىڭ ءبىرى بولماق.

"تورپەدو" – قازاقستانعا جاقسى تانىس قارسىلاس. گرۋزيالىق كلۋب قازاق فۋتبول جانكۇيەرلەرىنە جات ەمەس. وتكەن جىلى ولار ەلوردادا "اقتوبەگە" قارسى ويناپ، ەكى ماتچ قورىتىندىسى بويىنشا 3:5 ەسەبىمەن جەڭىلىپ قالعان. ال 2019 جىلى "ورداباسىعا" قارسى كەزدەسۋ دە ءساتسىز اياقتالىپ، قوس ويىننىڭ قورىتىندىسى 0:3 بولعان.

بىلتىرعى ماۋسىمدا "تورپەدو" ىشكى بىرىنشىلىكتە ەكىنشى ورىن يەلەنىپ، گرۋزيا سۋپەركۋبوگىنىڭ جەڭىمپازى اتاندى. ماۋسىمدى وتە سەنىمدى باستاپ، 15 ماتچ قاتارىنان جەڭىلمەگەن. ونىڭ سەگىزىن جەڭىسپەن اياقتاعان. الايدا سوڭعى سىرت الاڭداعى بەس ويىندا نەبارى ءبىر ۇپاي عانا جيناپ، چەمپيوندىقتى "سابۋرتالوعا" بەرىپ قويدى.

ەۋروكۋبوكتاردا 2024 جىلى كوماندا العاشقى كەزەڭدە البانيالىق "تيرانانى" جەڭگەنىمەن، كەلەسى اينالىمدا كيپردىڭ "ومونياسىنا" ەكى رەت ەسە جىبەرىپ، جارىستان شىعىپ قالدى.
كوماندا قۇرامىنا كەلەر بولساق، ەڭ كوزگە تۇسكەن ويىنشى نورۆەگيالىق شابۋىلشى بورن يونسەن. ول وتكەن ماۋسىمدا 34 ويىندا 23 گول سوعىپ، ۇزدىك سۇرمەرگەن اتاندى. سونىمەن قاتار، برازيليالىق فەليپە پيرەس 10 ناتيجەلى پاسىمەن كوزگە تۇسسە، قاقپاشى فيليپ كليايچ 13 ويىندا قاقپاسىن قۇرعاق ساقتاعان.

دەگەنمەن، بيىلعى ماۋسىمدا "تورپەدونىڭ" ناتيجەسى ءماز ەمەس. كوماندا بەسىنشى ورىندا، كوشباسشىدان 17 ۇپايعا قالىپ قويعان. ءوز الاڭىندا دا تۇراقتى ويناي الماي ءجۇر. 9 ماتچتىڭ تورتەۋىندە جەڭىلىپ قالعان. كوماندانىڭ ناتيجەسىزدىگى باپكەر اۋىسۋىمەن دە بايلانىستى بولۋى مۇمكىن. قىس مەزگىلىندە ۇجىمدى نەمىس مامانى ديرك شۋستەر تىزگىندەدى. ول بۇعان دەيىن بىرنەشە ماۋسىم بويى گەرمانيا بۋندەسليگاسىندا جۇمىس ىستەگەن. سوندىقتان "ورداباسىعا" توسىن سىي جاساۋى عاجاپ ەمەس.
ال شىمكەنتتىك "ورداباسى" بيىل جانكۇيەر كۇتكەندەي ناتيجە كورسەتىپ جاتقان جوق. كوماندا قازىرگى تاڭدا پرەمەر-ليگادا جەتىنشى ورىندا تۇر. چەمپيوناتتا مەدال ءۇشىن كۇرەسەتىندەي ەمەس. سول سەبەپتى نەگىزگى ءۇمىتتى قازاقستان كۋبوگىنا ارتىپ وتىر.
كۋتايسيلىك ۇجىمعا قارسى العاشقى ماتچ سىرت الاڭدا وتەتىندىكتەن، شىمكەنتتىكتەر قورعانىستى نىعايتىپ، قارىمتا شابۋىلعا سەنۋى مۇمكىن. ال جاۋاپتى ماتچتا، ءوز الاڭىندا، "ورداباسى" بارىنشا شابۋىلعا شىعۋعا تىرىساتىن بولادى.

Abai.kz