التىن مۋسينا بۇل ءىس بويىنشا ەكى ەپيزودتا كۋاگەر رەتىندە تانىلعان. سوت پروتسەسى كەزىندە ول پەريزات قايراتقا Rebel Flowers گۇل ساتۋ بيزنەسىندە ەسەپ جۇرگىزۋگە ۇنەمى كومەكتەسىپ وتىرعانىن ايتتى. سونىمەن قاتار “اسار-ۋمە” قورىمەن جاسالعان كەلىسىمشارت بويىنشا دا ەسەپ بەرگەنىن جەتكىزدى. مۋسينانىڭ ايتۋىنشا، ول رەسمي تىركەلمەي جۇمىس ىستەگەن جانە اي سايىن 300–350 مىڭ تەڭگە جالاقى الىپ وتىرعان. پەريزاتپەن قاشىقتان بايلانىس جاساعان، سەبەبى ءوزى اقتوبەدە تۇرادى. كۋاگەر پەريزاتپەن بىرگە جۇمىس ىستەگەندە ەسەپتەردە كۇماندى سايكەسسىزدىكتەر بولعانىن مالىمدەدى.

– پەريزات جەكە كاسىپكەرلىگى ارقىلى ماعان جارتىجىلدىق ەسەپتەردى جاساۋ جونىندە جۇگىندى. سول كەزدە ولاردا گۇل ساتۋ فيرماسى بولعان. بۋحگالتەرلىك ەسەپتى مەن جۇرگىزدىم. قور بويىنشا ول ارا-تۇرا ەسەپ بەرۋ ءۇشىن حابارلاساتىن. بىراق جۇيەلى بۋحگالتەرلىك ەسەپ جۇرگىزىلگەن جوق. پەريزات تاراپىنان ءبىر رەتتىك وتىنىشتەر بولدى. (...) مەن راستايتىن قۇجاتتاردى سۇرادىم، ول ماعان WhatsApp پەن ەلەكتروندى پوشتا ارقىلى فوتولارىن جىبەرىپ وتىردى. وندا پالەستينا ەلشىلىگىنە اقشا اۋدارىلعانىن راستايتىن نە ءبىر سەرتيفيكات، سونداي-اق بانكتەن حالىقارالىق اۋدارىم جاساۋعا ارنالعان ءوتىنىش بولدى، – دەدى مۋسينا.

ونىڭ سوزىنشە، العاشقى اۋدارىم بىرنەشە مىڭ دوللار بولسا، كەيىنگىسى شامامەن 100 مىڭ دوللار كولەمىندە بولعان. قۇجاتتىڭ ءوزى وزگەرتىلگەن سياقتى بولىپ كورىنگەن جانە قاتەلەرى بولعان. بۇدان بولەك، كۋاگەر SWIFT ارقىلى اۋدارىم جاسالعانىن راستايتىن قۇجات الماعانىن ايتتى.