شەتەلدىك بۇقارالىق اقپارات قۇرالدارى (باق) قازاقستانعا قاتىستى جاڭالىقتاردى، ساراپتامالىق ماقالالاردى، رەپورتاجدار مەن سۇحباتتاردى تۇراقتى تۇردە جاريالاپ وتىرادى.

بۇل جاريالانىمدار ەلدىڭ ىشكى جانە سىرتقى ساياساتىنا، ەكونوميكاسىنا، مادەنيەتى مەن تۋريزمىنە، سونداي-اق ەنەرگەتيكا جانە تابيعي رەسۋرستار سالاسىنداعى الەۋەتىنە قاتىستى ءار قىرىنان كورىنىس تابادى. ءبىز بۇگىن الەمدىك باق-تىڭ قازاقستان تۋرالى سوڭعى اپتالارداعى اقپاراتتارىنا شولۋ ۇسىنامىز...

سۋرەت: reutersagency.com.

«Reuters» اقپاراتتىق اگەنتتىگى «قازاقستان شەتەلدىك اكتسيونەرلەرمەن بىرگە قاراشىعاناقتاعى گاز وڭدەۋ زاۋىتىن سالۋ جوسپارىن توقتاتتى» دەگەن تاقىرىپتا باس ماقالا جاريالادى.

«قازاقستاننىڭ ەنەرگەتيكا مينيسترلىگى سارسەنبى كۇنى قاراشىعاناق كەن ورنىندا جوبانىڭ نەگىزىنەن شەتەلدىك اكتسيونەرلەرىمەن بىرلەسىپ گاز وڭدەۋ زاۋىتىن سالۋ جوسپارى توقتاتىلعانىن حابارلادى.

مينيسترلىك بۇل شەشىمنىڭ سەبەبىن ناقتىلاماي، تەك وتاندىق كومپانيالاردى تارتۋ كوزدەلىپ وتىرعانىن ايتتى.

ورتالىق ازياداعى بۇل ەل بىرنەشە جىلدان بەرى حالىقارالىق مۇناي-گاز كومپانيالارىمەن شىعىندارعا بايلانىستى كەلىسپەۋشىلىككە كەلىپ، 2023 جىلى ولاردان ميللياردتاعان دوللار ءوندىرىپ الۋعا تالاپ قويعان بولاتىن.

الايدا قازاقستان بيلىگى بۇل سىن-ەسكەرتۋلەرمەن كەلىسپەيدى، ولاردىڭ ايتۋىنشا، ماقسات – باتىس ءىرى كومپانيالارى كوتەرىپ جىبەرگەن شىعىنداردى باقىلاۋعا الۋ.

قاراشىعاناق كەن ورنىن Karachaganak Petroleum Operating (KPO) كونسورتسيۋمى باسقارادى. ونىڭ قۇرامىنا Eni (29,25%), Shell (29,25%), Chevron (18%), لۋكويل (13,5%) جانە “قازمۇنايگاز” (10%) كومپانيالارى كىرەدى.

وتكەن جىلى اكتسيونەرلەر مەن جەرگىلىكتى بيلىك جىلىنا 4 ميلليارد تەكشە مەترگە دەيىن گاز وڭدەيتىن زاۋىت سالىپ، ونى 2028 جىلى ىسكە قوسۋ تۋرالى كەلىسكەن بولاتىن. قازىرگى ۋاقىتتا قاراشىعاناقتان الىنعان شيكى گاز رەسەيدىڭ ورىنبور قالاسىنداعى گاز وڭدەۋ زاۋىتىنا جونەلتىلەدى.

مينيسترلىك قاراشىعاناق گاز وڭدەۋ زاۋىتى جوباسىنىڭ توقتاتىلۋ سەبەبىن ناقتى اتاعان جوق.

الايدا سالالىق بىرقاتار دەرەككوزدەر مۇنى ۇكىمەت پەن شەتەلدىك كومپانيالار اراسىنداعى قۇقىقتىق داۋلارمەن بايلانىستىردى».

سۋرەت: asiasociety.org.

ال «Central Asia Travels» سايتى ەلىمىزدىڭ ىشكى ءتۋريزمى تۋرالى جازىپتى.

«قازاقستاندا بارۋعا تۇرارلىق ەڭ كەرەمەت جەرلەر»دەگەن تاقىرىپپەن جارىق كورگەن شولۋدىڭ تولىق ءماتىنى مىناداي:

«قازاقستان – ورتالىق ازيانىڭ ءدال ورتاسىندا ورنالاسقان ۇلكەن مەملەكەت. بۇل ەل – باي تاريحي ورىندارعا، ءارتۇرلى لاندشافتارعا جانە ەرەكشە مادەنيەتتەرگە تولى كەڭىستىك. قازاقستان زاماناۋي ءسان-سالتانات پەن ەجەلگى تاريحتىڭ وزىندىك ۇيلەسىمىن ۇسىنادى: ەلوردانىڭ قازىرگى زاماناۋي كەلبەتى سونداي-اق ۇلى جىبەك جولىنداعى كونە قالالار – الماتى مەن تۇركىستان سونىڭ ايعاعى. تابيعاتتى سۇيەتىندەر شارىن شاتقالىنىڭ عاجايىپ كورىنىستەرىنە، بالقاش كولىنىڭ تىنىش جاعالاۋىنا نەمەسە التاي تاۋلارىنىڭ تىلسىم تابيعاتىنا تامسانا الادى. قوناقجاي پەيىلمەن، ءدامدى تاعامدارمەن جانە باي مۇرامەن قارسى الاتىن قازاقستان ءوز قوناقتارىن ەلدىڭ ءتۇرلى كورىكتى جەرلەرىن زەرتتەۋگە شاقىرادى.

قازاقستان – ءوزىنىڭ كورىكتى ورىندارى مەن قوناقجاي حالقىمەن ەرەكشەلەنەتىن ەرەكشە تۋريستىك باعىت. ءسىزدى بۇل ەلدىڭ تاڭعاجايىپ تابيعاتى، تاريحي مەكەندەرى نەمەسە زاماناۋي قالالارى قىزىقتىرسا دا، قازاقستان – ءار تالعامعا ساي كەلەتىن ۇمىتىلماس اسەر سىيلايتىن مەملەكەت. ونىڭ كەڭ دالاسى مەن تەرەڭ تاريحىن زەرتتەي وتىرىپ، ەلدىڭ قايتالانباس كەلبەتىن ايقىندايتىن سالت-ءداستۇر مەن مادەنيەتتەردىڭ ۇندەستىگىن تابۋعا بولادى. تابيعي سۇلۋلىق پەن قالالىق ءسان-سالتاناتتىڭ ەرەكشە ۇيلەسىمىمەن قازاقستان الەمدەگى ەڭ ۇزدىك تۋريستىك باعىتتاردىڭ قاتارىنان لايىقتى ورىن الادى».

سۋرەت: merkur.lu.

«Mەrkur.Lu» سايتى دا جاعىمدى جاڭالىق تاراتىپتى. بۇل سايتتىڭ قالامى ERG كومپانياسى ۇيىمداستىرعان جۇمىسشى ماماندىقتار جىلى تۋرالى جازىپتى.

«مەملەكەتتىك اكادەميالىق وپەرا جانە بالەت تەاترى – «Astana Opera» قازاقستاننىڭ مادەنيەت جانە اقپارات مينيسترلىگى مەن جاھاندىق مەتاللۋرگيا جانە تاۋ-كەن ءوندىرىسى كومپانياسى – Eurasian Resources Group (ERG) قولداۋىمەن ەلدىڭ ءىرى ونەركاسىپ قالالارىنا گاسترولدىك ساپار ۇيىمداستىردى.

تۋر پاۆلودار، اقتوبە، حرومتاۋ جانە رۋدنىي قالالارىندا ءوتتى – بۇل قالالاردا ERG كاسىپورىندارى ورنالاسقان. كورەرمەندەر قاتارىندا جەرگىلىكتى قاۋىم مەن ءوندىرىس ورىندارىنىڭ جۇمىسشىلارى بار، گاسترول جالپى 7 000-عا جۋىق ادامدى قامتىدى. بۇل باستاما قازاقستاندا جاريالانعان جۇمىسشى ماماندىقتار جىلىنىڭ اياسىندا ىسكە استى.

وپەرا ترۋپپاسىنىڭ جەتەكشىسى تالعات مۇساباەۆ باستاعان تەاتر سوليستەرى «قازاقستان ءاليۋمينيى» زاۋىتىنا دا بارىپ، ERG قىزمەتكەرلەرىمەن بىرگە پاۆلودارلىق سازگەر ەستاي بەركىمبايۇلىنىڭ ايگىلى «قۇسني-قورلان» ءانىن ورىندادى.

ERG كومپانياسىنىڭ باس ديرەكتورى جانە ديرەكتورلار كەڭەسىنىڭ توراعاسى، سونداي-اق «Astana Opera» قامقورشىلار كەڭەسىنىڭ مۇشەسى شۋحرات يبراگيموۆ:

«ERG-دەگى جۇمىسىمىزدىڭ ماڭىزدى بولىگى – قازاقستاندى تەك ەكونوميكالىق تۇرعىدان عانا ەمەس، سونىمەن قاتار الەۋمەتتىك جانە مادەني باعىتتا دامىتۋ. Astana Opera تەاترىنىڭ جارقىن جوبالارىن قولداۋ – ءبىز ءۇشىن ءاردايىم باسىمدىق» – دەپ اتاپ ءوتتى».

Abai.kz