الماتىدا قىتايدان قازاقستانعا حالىق تۇتىناتىن تاۋارلاردى زاڭسىز كىرگىزۋ جانە اسا ءىرى مولشەردە جالعان شوت-فاكتۋرالار جازۋ دەرەگى بويىنشا قىلمىستىق ىسكە قاتىستى سوت ۇكىمى شىقتى.

تەرگەۋ بارىسىندا "Group of the Companies TDA" جشس ۋاكىلەتتى ەكونوميكالىق وپەراتور مارتەبەسىنە يە بولا تۇرا، قىتايدان 100-دەن استام كونتەينەردى زاڭسىز جولمەن ەلىمىزگە كىرگىزگەنى انىقتالدى.

ولاردىڭ باقىلاۋىنداعى 10 جاۋاپكەرشىلىگى شەكتەۋلى سەرىكتەستىك ارقىلى جالعان شوت-فاكتۋرالار جازىلعان.مەملەكەتكە كەلتىرىلگەن زالال (قوسىلعان قۇن سالىعى، كورپوراتيۆتىك تابىس سالىعى جانە كەدەندىك تولەمدەر بويىنشا) 10 ملرد تەڭگەنى قۇرادى. سوتقا دەيىنگى تەرگەپ-تەكسەرۋ بارىسىندا مەملەكەت بيۋدجەتىنە 643 ملن تەڭگە ءوندىرىپ الىندى، – دەپ حابارلادى قما.

سوت سانكتسياسىمەن: جالپى قۇنى 1,3 ملرد تەڭگە بولاتىن تاۋارلارعا، كۇدىكتىلەرگە تيەسىلى 300 ملن تەڭگە سوماسىنداعى مۇلىككە (جەر تەلىمدەرى، اۆتوكولىكتەر، باگگي كولىكتەرى، جىلجىمالى شاتىرلار جانە ت.ب.) شەكتەۋ قويىلدى.

بۇعان قوسا، اتالعان كومپانيامەن بايلانىستا بولعان 47 سەرىكتەس كاسىپورىن ءوز ەركىمەن ءوزارا ەسەپ ايىرىسۋدى توقتاتىپ، بيۋدجەتكە 240 ملن تەڭگە سالىق تولەگەن.

المالى اۋداندىق سوتىنىڭ ۇكىمىمەن كىنالى تۇلعالار مۇلكىن تاركىلەي وتىرىپ، 1 جىل 4 ايدان 4 جىل 6 ايعا دەيىن باس بوستاندىعىنان ايىرۋ جازاسىن تاعايىندادى. سونىمەن قاتار ىسكە قاتىسى بار ءبىر ادامعا حالىقارالىق ىزدەۋ جاريالاندى.