وتاندىق شيكىزاتتى ەكسپورتتاۋعا ليتسەنزيانى ەندى elicense.kz پورتالىندا ونلاين رەسىمدەۋگە بولادى. بۇل تۋرالى ۇلتتىق اقپاراتتىق تەحنولوگيالار اق ءباسپاسوز قىزمەتى حابارلادى.

- elicense.kz پورتالىندا زاڭدى تۇلعالارعا ارنالعان وتاندىق شيكىزات تاۋارلاردى ەكسپورتتاۋعا ليتسەنزيا الۋعا ارنالعان جاڭا قىزمەت ىسكە قوسىلدى. قىزمەت اۆتوماتتاندىرىلعان جانە كاسىپكەرلەرگە ءوتىنىمدى تولىعىمەن ونلاين رەجيمدە بەرۋگە مۇمكىندىك بەرەدى، - دەلىنگەن حابارلامادا.
ليتسەنزيانى رەسىمدەۋ – قازاقستان اۋماعىندا وندىرىلگەن بەلگىلى ءبىر ساناتتاعى شيكىزاتتى زاڭدى تۇردە ەكسپورتتاۋدىڭ مىندەتتى شارتى. بۇل جاڭالىق ءوتىنىم بەرۋدى جانە ونىڭ ورىندالۋىن ايتارلىقتاي جەڭىلدەتەدى.

قىزمەتتى پايدالانۋ ءۇشىن:

 elicense.kz پورتالىندا اۆتوريزاتسيادان ءوتۋ قاجەت;

 «تاۋارلاردىڭ يمپورتى، ەكسپورتى» بولىمىنە ءوتىپ، «وتاندىق شيكىزات تاۋارلارى تىزبەسىنە ەنگىزىلگەن ونىمدەردى ەكسپورتتاۋعا ليتسەنزيا بەرۋ» قىزمەتىن تاڭداۋ كەرەك;

 ەلەكتروندىق ءوتىنىم فورماسىن تولتىرىپ، قاجەتتى قۇجاتتاردى تىركەۋ، مەملەكەتتىك باج سالىعىن تولەۋ قاجەت;

 ءوتىنىمدى ەتسق نەمەسە QR-كود ارقىلى قول قويۋ ارقىلى راستاۋ كەرەك.

- ءوتىنىم 5 جۇمىس كۇنى ىشىندە قارالادى. دايىن ليتسەنزيا elicense.kz پورتالىنداعى جەكە كابينەتتە «رۇقساتتار» بولىمىندە كورسەتىلەدى. ليتسەنزيا بەرۋدەن باس تارتىلعان جاعدايدا، نەگىزدەمەسى بار اقپارات «مەنىڭ وتىنىمدەرىم» بولىمىندە كورسەتىلەدى. قىزمەتتى قازاقستان اۋماعىندا زاڭدى تۇلعالار الا الادى. ليتسەنزيا بەرگەنى ءۇشىن مەملەكەتتىك باج مولشەرى – 10 اەك. تولەم ەكىنشى دەڭگەيدەگى بانك ارقىلى زاڭدى تۇلعانىڭ تىركەلگەن ورنى بويىنشا سالىق ورگانىنىڭ شوتىنا تۇسەدى، - دەپ حابارلايدى ۇلتتىق اقپاراتتىق تەحنولوگيالار اق.
ەسكە سالايىق، قازاقستان بۇۇ-نىڭ ونلاين قىزمەت يندەكسى بويىنشا تمد ەلدەرى اراسىندا كوشباسشى ەل.

Abai.kz