رەسەيدە «انگارا» دەيتىن اۋە كومپانياسىنىڭ ان-24 ۇشاعى رەسەيدىڭ قيىر شىعىسىنداعى حاباروۆسكىدەن ۇشىپ شىعىپ، امۋر وبلىسىنداعى تىندا دەيتىن قالاشىققا جەتەر-جەتپەي اپاتقا ۇشىرادى. ۇشاق ءبىر دەگەندە قونا الماعان. سوسىن سوڭ راداردان جوعالعان. بورتتا 49 ادام بولعان. ونىڭ 43-ءى جولاۋشىلار، 6-اۋى ەكيپاج مۇشەلەرى. بارلىعى قازا تاپتى.

ەسكەرتۋ: بۇل ۇشاق 70-ءشى جىلدارى شىعارىلعان (50 جىل بۇرىن). سونداي ەسكى بولا تۇرا، 2036 جىلعا دەيىن ۇشۋعا رۇقسات بەرىلگەن ەكەن.

اشىق دەرەكتەردەگى مالىمەت مىناۋ: ان-24 ۇشاقتارىن شىعارۋ 1979 جىلى توقتاتىلعان ەكەن. ال قازىر رەسەي اۋە كومپانيالارىندا ان-26 ۇشاعىنان 26 داناسى، ان-24 ۇشاعىنان 26 داناسى ءالى قولدانىستا. رەسەيدە تۇتىنۋشى كوپ. سايكەسىنشە اۋە تاسىمالىنا سۇرانىس كوپ. ال سول سۇرانىستى تولىق قامتۋعا ۇشاق جەتكىلىكسىز. سول سەبەپتى، رەسەيدىڭ ازاماتتىق اۆياتسيا ينستيتۋتى بيىل ان-24 پەن ان-26 ۇشاقتارىنا تاعى 50-60 جىل ۇشۋعا رۇقسات بەرگەن.

جولاۋشىلار تاسىمالداۋعا ارنالعان ان-24 پەن ان-26-نىڭ بالاماسى – چەحتەر شىعاراتىن L410 ۇشاعى. بىراق، بىرنەشە جىل بۇرىن سانكتسيالارعا بايلانىستى بۇل ۇشاقتى رەسەيدە شىعارۋ توقتاتىلدى. «Bombardier» كومپانياسى دا رەسەيگە ۇشاق ساتۋدى 2014 جىلدان باستاپ دوعارعانى ايتىلادى. ۋكراينالىق ان-140 تە رەسەيدەن كەتكەن. Airbus رەسەيگە ۇشاق جوندەۋگە قوسالقى بولشەكتەر بەرمەي قويدى. ءسويتىپ، ءبىر جىلدارى رەسەي ءوز ۇشاقتارىن يرانعا اپارىپ جوندەپ ءجۇردى. قازىر ول دا توقتادى. ويتكەنى، يراننىڭ ءوزى سانكتسياداعى ەل. يران اۆياتسياسى دا ءولىمشى حالدە. رەسەيگە كومەكتەسپەك مۇمكىندىگى جوق.

ال رەسەيدىڭ وزىندە ءوندىرىس ءولىمشى حالدە. بالاما ۇشاق قۇراستىرا العان جوق. سابەت وكىمەتى كەزىندە يل-114 دەيتىن ۇشاقتىڭ مودەرنيزاتسياسىن جوبالاي باستاعان، ونىسى ءالى كۇنگە اياقسىز قالدى.

جالپى رەسەيدە سوعىسقا دەيىن (2022 جىلعا) 850 ۇشاق بولسا، 2023-تە 736 ۇشاق قالعان. ال 2026 جىلعا دەيىن ولاردىڭ سانى 2 ەسەگە قىسقاراتىنى ايتىلادى. رەسەيدەگى جولاۋشىلار تاسىمالدايتىن ۇشاقتاردىڭ كۇرت ازايۋىنىڭ باستى سەبەبى – شەتەلدىك كومپانيالاردىڭ ۇشاقتارى رەسەي اگرەسسياسىنا بايلانىستى سالىنعان سانكتسيالاردى ساقتاپ، رەسەيدەن ۇشاقتارىن الىپ كەتىپ جاتقاندىعى.

2024 جىلى رەسەي قازاقستاننىڭ اۋە كومپانيالارىنا قولقا سالىپ، رەسەي ىشىندە رەيستەر ۇيىمداستىرۋدى سۇراعانى باق-تا ايتىلعان. كەيىن ول اڭگىمەنىڭ دە اياعى سۇيىلىپ كەتتى.

رەسەي ءۇشىن جولاۋشىلار ۇشاعى دەيتىن ماسەلە – جاي عانا قاجەتتىلىك نەمەسە كوممەرتسيالىق پايدا ماسەلەسى ەمەس. كوپتەگەن شالعاي اۋداندار تولىعىمەن اۆياتسياعا تاۋەلدى. قايسىبىر جىلدارى «Boeing» جانە «Airbus-پەن» جارىسامىز دەپ ەكىلەنىپ، ۇشاق شىعارۋدى قولعا العان. سوندا جاساعاندارى 2 دانا «تۋ-214»، 1 دانا «يل-96-300». رەسەيدە تاعى ءبىر جويقىن پروەكت بولعان. ول – «MC-21» لاينەرىنىڭ قۇرىلىسى. جاڭاعى «Boeing-پەن» باسەكەلەسەدى دەگەن وسى ۇشاق. بىراق، جوبانىڭ قۇنى رەسەيدىڭ بيۋدجەتىنە سالماق بولىپ، ازىرگە ءىس العا باسپاي تۇر.

وسىلايشا، سانكتسيالاردىڭ سوققىسى رەسەي اۆياتسياسىن ەسەڭگىرەتىپ قانا قويماي، ءولىم مەن ءومىردىڭ شەگىنە اكەپ تىرەپ تۇر!

Abai.kz