قازاقستان فۋتبولى – ەلدەگى ەڭ تانىمال سپورت تۇرلەرىنىڭ ءبىرى. ونىڭ دامۋ تاريحى كەڭەستىك كەزەڭنەن باستالىپ، تاۋەلسىزدىك العاننان كەيىن جاڭا دەڭگەيگە كوتەرىلدى. بۇگىندە فۋتبول قازاقستاندا كاسىبي سپورت پەن بۇقارالىق سپورت رەتىندە بەلسەندى دامىپ كەلەدى.

اتالعان سالادا ساقتالعان ماسەلەر دە از ەمەس. مىسالى، ينفراقۇرىلىمنىڭ جەتىسپەۋشىلىگى، شەتەلدىك لەگيونەرلەرگە تاۋەلدىلىك، جانكۇيەر مادەنيەتىنىڭ السىزدىگى جانە باسقا ماسەلەلەر.

بۇگىن ءماجىلىس دەپۋتاتى ابزال قۇسپان ءوز پاراقشاسىندا اتالعان سالاداعى تاعى ءبىر ماسەلەنىڭ بار ەكەنىن جازدى.

“ادالدىقتىڭ سيمۆولى بولۋى ءتيىس سپورتتىڭ ءوزى داۋدان كوز اشپاي تۇر. اسىرەسە، فۋتبول. سوڭعى اپتالارداعى جاڭالىقتاردان كەيىن قازاقستان فۋتبولى ۇلكەن رەپۋتاتسيالىق تاۋەكەل الدىندا تۇرعانى انىق بايقالدى.
فۋتبولداعى كەلىسىلگەن ويىندار – قازىر ەل ىشىندە قالىپتى جاعدايعا اينالىپ بارادى. بۇل تەك جەكە ءبىر ماماننىڭ پىكىرى ەمەس – حالىقارالىق سپورت ۇيىمدارىنىڭ دەرەكتەرى بويىنشا قازاقستان وسىنداي “كەلىسىلگەن” ماتچتار سانى بويىنشا الەم بويىنشا العاشقى بەستىككە كىرەدى.

وسى ايدا العاش رەت ناقتى شارالار قابىلداندى: پرەمەر-ليگا ماتچىنان كەيىن بىردەن باس تورەشى مەن VAR وكىلى ماۋسىم سوڭىنا دەيىن شەتتەتىلدى. بۇل بۇرىن-سوڭدى بولماعان شەشىم. دەمەك، ماسەلە مويىندالدى. جاسىرماي، جاسىرىپ-جابۋسىز ارەكەت ەتەتىن ۋاقىت كەلدى.

بۇل از دەسەڭىز، كاسىبي فۋتبول كلۋبتارىن جەكەمەنشىككە بەرۋ، ال كەلىسىلگەن ماتچتارعا قاتىسقانداردى اكىمشىلىك ەمەس، قىلمىستىق جاۋاپكەرشىلىك ماسەلەسى دە قارالۋى كەرەك.

نەگە وسى ۋاقىتقا دەيىن بۇل ماسەلە نازاردان تىس قالدى؟ سەبەبى قۇقىق قورعاۋ جانە قاداعالاۋ ورگاندارى كوبىنە مەملەكەتتىك قىزمەتكەرلەر مەن شەنەۋنىكتەردى باقىلايدى. كۆازيمەملەكەتتىك سەكتورعا ءىشىنارا كوڭىل بولىنەدى، ال جەكە كوممەرتسيالىق قۇرىلىمدار مۇلدەم باقىلاۋدان تىس قالعان. بۇل – جۇيەلى ولقىلىق. قىلمىستىق كودەكستە بيزنەس وكىلدەرىنە قاتىستى باپتار از ەمەس، بىراق ءىس جۇزىندە قولدانىلمايدى.
ال كەلىسىلگەن ماتچتار – بۇل تەك كورەرمەندى جاپپاي الداۋ ەمەس، ءىرى كولەمدەگى قارجىلىق الاياقتىقتىڭ ءبىر ءتۇرى.

سوڭعى 6 جىلدا 18 كاسىبي فۋتبول كلۋبىنا 200 ميلليارد تەڭگەدەن استام بيۋدجەت قارجىسى جۇمسالعان. ال ناتيجە شە؟ FIFA رەيتينگىندە تومەنگى ساتىدامىز.

وسى ورايدا قر باس پروكۋراتۋراسى بۇل سالاداعى جۇيەلى بۇزۋشىلىقتارعا نازار اۋدارىپ، ناقتى پروكۋرورلىق ىقپال ەتۋ شارالارىن قولدانۋى قاجەت دەپ ەسەپتەيمىن”.

Abai.kz