قما استانا قالاسى بويىنشا دەپارتامەنتى الاياقتىق فاكتىسى بويىنشا تەرگەپ-تەكسەرۋ جۇمىسىن اياقتادى.

بۇل جولعى الاياقتىق ءىسى ۇلىنىڭ ەمىنە قاراجات جيناۋ ءۇشىن كەڭ كولەمدى جارناما ناۋقانىن ۇيىمداستىرعان ەرلى-زايىپتىعا قاتىستى بولىپ وتىر.

تەرگەۋدە بالانىڭ قاتىسۋىمەن كورسەتىلگەن بەينەروليكتەر، اسەرلى جازبالار الەۋمەتتىك جەلىلەر ارقىلى تاراتىلىپ، مىڭداعان قازاقستاندىقتىڭ قايىرىمدىلىق جاساۋىنا سەبەپ بولعان.

تۇرعىنداردىڭ سەنىمى مەن جاناشىرلىعى كۇدىكتىلەردىڭ 1,3 ملرد تەڭگەدەن استام كولەمدە قاراجات جيناۋىنا تۇرتكى بولعان. بىراق، بالانىڭ ەمىنە نەبارى 6,4 ميلليون تەڭگە جاراتىلعان.

قالعان قاراجاتتى ەرلى-زايىپتىلار جەكە قاجەتتىلىگىنە پايدالانىپتى. ناقتىلاعاندا، استانادان 3 پاتەر، جەر تەلىمىن جانە 5 اۆتوكولىك ساتىپ الىپ ۇلگەرگەن. قاراجاتتىڭ بەلگىلى ءبىر بولىگى قۇمار ويىندارىنا دا قۇيىلعان.

قارجىنىڭ ۇشتەن ءبىر بولىگى (481 ميلليون تەڭگەدەن استام) الەۋمەتتىك جەلىدەگى پاراقشالارىن جارنامالاۋعا باعىتتاعانى بەلگىلى بولدى. بۇل – قايىرىمدى جانداردىڭ ۇلەسىن كوبەيتە ءتۇسۋ ءۇشىن جاسالعان جارناما.

– كۇدىكتىلەر "تۇركياداعى LIV Hospital كلينيكاسىندا 84 ميلليون تەڭگە تۇراتىن وتا جاساتامىز" دەگەن جەلەۋدى دە پايدالانعان. قاجەتتى سوما جينالعانىمەن، شەتەلدە وتا جاسالماعان. كەرىسىنشە، ولار Instagram پاراقشاسىندا اۋەجايداعى "ۇشىپ بارا جاتقان" كورىنىستى بەينەلەيتىن روليك جاريالاپ، "وپەراتسيا ءساتتى ءوتتى" دەگەن جالعان اقپاراتپەن جازبا سالعان، – دەلىنگەن حابارلامادا. 

سوتقا دەيىنگى تەرگەپ-تەكسەرۋ باستالعانىنان حاباردار بولعان سوڭ، ولار قىلمىستىق جولمەن الىنعان اكتيۆتەردى تاركىلەۋدەن جاسىرۋ ماقساتىندا جەر تەلىمىن ءۇشىنشى تۇلعانىڭ اتىنا راسىمدەگەن. دەسە دە، تەرگەۋ بۇل مامىلەنىڭ جالعان ەكەنىن دالەلدەگەن.

سوت سانكتسياسىمەن قىلمىستىق جولمەن الىنعان مۇلىكتەردىڭ بارلىعىنا تىيىم سالىنىپ وتىر. ازىرگە كۇدىكتىلەرگە قاتىستى بۇلتارتپاۋ شاراسى رەتىندە ۇيقاماق ءتۇرى تاڭدالعان. قىلمىستىق ءىس سوتتا قارالۋدا.

قر كونستيتۋتسياسىنىڭ 77-بابىنىڭ 3-تارماعىنىڭ 1-تارماقشاسىنا جانە قر قىلمىستىق-پروتسەستىك كودەكسىنىڭ 19-بابىنىڭ 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن اركىم كىناسىز دەپ ەسەپتەلەدى.

بۇعان دەيىن "3,5 ميلليارد تەڭگەنى جىمقىردى" دەگەن ەرىكتى پەريزات قايرات پەن ونىڭ اناسىنا سوت ۇكىمى شىققان ەدى.