اقش-تىڭ كولىك ءمينيسترى ءارى NASA-نىڭ ۋاقىتشا باسشىسى شون داففي وسى اپتادا ايدا اتوم ەلەكتر ستانتسياسىن (اەس) سالۋ جۇمىستارىن جەدەلدەتۋ تۋرالى باستامانى جاريالاماق. 

جاڭا باسشىلىق NASA-عا ونەركاسىپتىك كومپانيالاردان 2030 جىلعا قاراي قۋاتتىلىعى 100 كيلوۆاتت بولاتىن يادرولىق رەاكتوردى ىسكە قوسۋعا قاتىستى ۇسىنىستار سۇراتۋدى مىندەتتەيدى.

سونىمەن قاتار، داففي حالىقارالىق عارىش ستانتسياسىنىڭ ورنىن باساتىن جاڭا نىساندى جاساۋعا قاتىستى جۇمىستاردى جەدەلدەتۋگە شاقىردى. بۇل دا NASA-نىڭ باسىم باعىتتارىنىڭ ءبىرى سانالادى.

– بۇل ەكى قادام اقش-تىڭ اي مەن مارستى يگەرۋ بويىنشا ارەكەتتەرىن جەدەلدەتۋگە ىقپال ەتۋى مۇمكىن. ايتا كەتەيىك، بۇل ماقساتتاردى قىتاي دا كوزدەپ وتىر، – دەلىنگەن ماقالادا.

NASA جارتى جىل ىشىندە كەمىندە ەكى كومپانيامەن كەلىسىمشارت جاساسۋدى جوسپارلاپ وتىر. اگەنتتىك جاڭا ستانتسيانى 2030 جىلعا دەيىن وربيتاعا شىعارماق نيەتتە. ەگەر بۇل مەرزىم ساقتالماسا، تۇراقتى باسقارىلاتىن وربيتالىق ستانتسياعا تەك قىتاي عانا يە بولۋى مۇمكىن.

قازىردىڭ وزىندە Axiom Space, Vast جانە Blue Origin سياقتى بىرقاتار كومپانيا ءوز جوبالارىن ۇسىنعان. الايدا سوڭعى ايلاردا كونگرەسسمەندەر اگەنتتىكتىڭ بۇل كومپانيالارعا قاجەتتى قارجىنى تىم باياۋ ءبولىپ جاتقانىن سىنعا الدى.