​الماتى قالاسىندا حالىقارالىق جاستار كۇنىنە وراي ۇيىمداستىرىلعان «Alma Love» جاستار فەستيۆالى ءوءتىپ جاتىر. اۋقىمدى جوبا الماتى قالاسى جاستار ساياساتى باسقارماسىنىڭ قولداۋىمەن جۇزەگە اسىرىلۋدا.

فەستيۆالدىڭ العاشقى كۇنى «Funky Town» شىعارماشىل جاستار بىرلەستىگىنىڭ ۇيىمداستىرۋىمەن «ALL STYLES BATTLE» بي سايىسى وتكىزىلدى. شاراعا ءتۇرلى بي باعىتتارىندا ونەر كورسەتەتىن 100-دەن استام جاس قاتىسۋعا ءوتىنىم بىلدىرگەن. ىرىكتەۋ كەزەڭىنەن سۇرىنبەي وتكەن 50 قاتىسۋشى فينالعا جولداما الىپ، ءوز ونەرلەرىن پاش ەتتى.

اربات الاڭىندا وتكەن بۇل مادەني ءىس-شارانى تاماشالاۋعا 2000-نان استام قالا تۇرعىنى مەن قوناقتارى جينالدى. جەڭىمپازدار مەن ەرەكشە كوزگە تۇسكەن قاتىسۋشىلار ۇيىمداستىرۋشىلار تاراپىنان باعالى سىيلىقتارمەن ماراپاتتالدى. بي باتتل كورەرمەندەرگە جارقىن اسەر مەن مەرەكەلىك كوڭىل-كۇي سىيلادى.

«ALL STYLES BATTLE» — جاستاردىڭ بي ارقىلى ءوزىن-ءوزى ەركىن كورسەتۋىنە ارنالعان الاڭ. قاتىسۋشىلاردىڭ بەلسەندىلىگى مەن كورەرمەندەردىڭ قىزىعۋشىلىعى بۇل باعىتتىڭ جاستار اراسىندا سۇرانىسقا يە ەكەنىن كورسەتتى. جاستاردىڭ قىزىعۋشىلىقتارىن ەسكەرە وتىرىپ، الداعى ۋاقىتتا وسىنداي ءجارىستاردى ءجيى وتكىزسەك دەيمىز، - دەدى «Funky Town» شىعارماشىل جاستار بىرلەستىگىنىڭ جەتەكشىسى مارات ياگفاروۆ.

ايتا كەتەيىك، الماتىدا حالىقارالىق جاستار كۇنىنە ارنالعان ونكۇندىك ءىس-شارالار لەگى 3 تامىزدا باستالعان. فەستيۆال باعدارلاماسى اياسىندا ەكولوگيالىق اكتسيالار، سپورتتىق تۋرنيرلەر، كۆەست ويىندارى، جاستار مەن الەۋمەتتىك جوبالاردىڭ كورمەسى، Open Mic فورماتىنداعى كونتسەرتتەر جانە وزگە دە قىزىقتى ءىس-شارالار جوسپارلانعان.

فەستيۆالدىڭ سالتاناتتى جابىلۋ ءراسىمى 12 تامىز كۇنى بالۋان شولاق اتىنداعى سپورت كەشەنىندە وتەدى. قالا تۇرعىندارى مەن قوناقتارىن قازاقستاندىق ەسترادا جۇلدىزدارىنىڭ قاتىسۋىمەن وتەتىن مەرەكەلىك گالا-كونتسەرت پەن الماتىنىڭ بەلسەندى جاستارىن ماراپاتتاۋ ءراسىمى كۇتەدى. ءىس-شاراعا كىرۋ تەگىن.

Abai.kz