مەملەكەت باسشىسى كاسىپكەرلەردىڭ قۇقىعىن قورعاۋ جونىندەگى ۋاكىل قانات نۇروۆتى قابىلدادى، دەپ حابارلايدى اقوردانىڭ ءباسپاسوز قىزمەتى.

پرەزيدەنتكە بيزنەس-ومبۋدسمەننىڭ 2024 جىلى اتقارعان جۇمىسىنىڭ ناتيجەلەرى تۋرالى ەسەپ بەرىلدى.

قانات نۇروۆ كاسىپكەرلەردىڭ قۇقىعى بۇزىلۋىنا قاتىستى كەلىپ تۇسكەن 3275 شاعىمنىڭ 1759-ى (53,7%) بويىنشا وڭ شەشىم قابىلدانعانىن جەتكىزدى. سونىڭ ناتيجەسىندە 20 ميلليارد تەڭگەدەن استام شىعىننىڭ الدىن الۋعا مۇمكىندىك تۋدى. جالپى، ارىز-شاعىم سانى 12 پايىزعا ازايعان. بۇل اكىمشىلىك ادىلەت ينستيتۋتىنىڭ تيىمدىلىگىن كورسەتەدى.

مەملەكەت باسشىسىنىڭ تاپسىرماسىن ورىنداۋ ماقساتىندا بيزنەستىڭ دامۋىن تەجەيتىن باسى ارتىق اكىمشىلىك كەدەرگىلەردى انىقتاۋعا جانە جويۋعا باسا ءمان بەرىلدى.

سونىمەن قاتار بيزنەس-ومبۋدسمەن كاسىپكەرلىك قىزمەتتى رەتتەيتىن نورماتيۆتىك-قۇقىقتىق اكتىلەرگە وزگەرىستەر ەنگىزۋگە قاتىستى بىرقاتار ۇسىنىسىن جەتكىزدى. كەيبىر جەكەلەگەن جاعداياتتار بويىنشا ءتيىستى رەتتەۋشى جانە قۇقىق قورعاۋ ورگاندارىنا تالاپ-ارىز جولدانعان.

كەزدەسۋ سوڭىندا پرەزيدەنت قاسىم-جومارت توقاەۆ كاسىپكەرلەردىڭ قۇقىعىن قورعاۋ شارالارىن ودان ءارى كۇشەيتۋ ماڭىزدى ەكەنىنە نازار اۋداردى. مەملەكەت باسشىسى كاسىپكەرلىكتى قورعاۋ ستراتەگياسىن جۇزەگە اسىرۋ اياسىندا قوردالانعان پروبلەمالاردى شەشۋگە باعىتتالعان بىرقاتار تاپسىرما بەردى.

Abai.kz