اباي وبلىسىندا ابايدىڭ 180 جىلدىعىنا وراي مەملەكەت باسشىسى قاسىم-جومارت كەمەلۇلى توقاەۆتىڭ قولداۋىمەن «ابايعا قۇرمەت» اكتسياسى باستالعان بولاتىن. بۇگىن اقىن مەرەيتويىنا ارنالعان ونكۇندىكتىڭ توعىزىنشى كۇنىندە اكتسيا اياسىنداعى العاشقى نىساننىڭ قۇرىلىسى باستالدى. ماڭعىستاۋ وبلىسى سەمەي قالاسىنا دوستىق ءۇيىن سالىپ بەرمەك. نىساننىڭ ىرگەتاسىن قالاۋ راسىمىنە وبلىس اكىمى بەرىك ءۋالي، ماڭعىستاۋ وبلىسىنىڭ اكىمى نۇرداۋلەت قيلىباەۆ باستاعان دەلەگاتسيا قاتىستى.

جاڭا نىسان 75 مىڭ تۇرعىنعا ارنالعان «Semey Smart City» شاعىن اۋدانىندا بوي كوتەرەدى. ەتنومادەني بىرلەستىكتەر مەن قوعامدىق ۇيىمداردىڭ باسىن قوساتىن، 3 قاباتتى كوپفۋنكتسيونالدى مادەني كەشەن بىرنەشە فۋنكتسيونالدىق بلوكتان تۇرادى. كىتاپحانا، قولدانبالى ونەر مۇراجايى، فوتوزەرتحانا، كوركەمونەر جانە قالپىنا كەلتىرۋ شەبەرحانالارى، كينوزال، كونفەرەنتسيا زالدارى قاراستىرىلاتىن بولادى.

ايماق باسشىسى عيماراتتىڭ ىرگەتاسىن قالاۋ راسىمىندە مەملەكەت باسشىسى قاسىم-جومارت توقاەۆتىڭ باستاماسىن العاش بولىپ قولداعان ماڭعىستاۋ وبلىسىنىڭ حالقىنا العىسىن جەتكىزدى.

«بۇگىن «ابايعا قۇرمەت» اكتسياسى اياسىندا ماڭعىستاۋ وبلىسىنىڭ وڭىرىمىزگە سىيلىعى دوستىق ءۇيىنىڭ ىرگەتاسىن قالاعالى وتىرمىز. «دوستىق» ءۇيى سيمۆوليكالىق ءمانى وتە زور، ەكى ايماقتىڭ دوستىعىن بىلدىرەتىن عيمارات بولماق. بۇگىنگى يگى شارا ەلىمىزدىڭ قوس قيىرىنىڭ بىرلىگى مەن ۇلتتىق بىرەگەيلىگىنىڭ جارقىن كورىنىسى دەپ بىلەمىن. ماڭعىستاۋ مەن اباي وبلىسى باتىس پەن شىعىس شەكارادا جاتقان شالعاي ايماق بولسا دا،  نيەتى ورتاق، تىلەۋى ءبىر ەكەنىن بۇكىل الاش جۇرتىنا كورسەتتى. ماڭعىستاۋ وبلىسى ازاماتتارىنىڭ ەلدىڭ سالەمىن الىپ، اباي تويىنىڭ ۇستىندە قۇرىلىستى باستاۋى ۇلكەن قۇرمەتكە لايىق» دەدى ايماق باسشىسى.

ماڭعىستاۋ وبلىسى دەلەگاتسياسىنىڭ اتىنان مەملەكەتتىك قىزمەت سالاسىنىڭ ارداگەرى، ماڭعىستاۋ وبلىسىنىڭ قۇرمەتتى ازاماتى دارجوك سەيباعىتوۆ ءسوز سويلەدى.

«ۇلى ابايدىڭ 180 جىلدىق مەرەيتويى قۇتتى بولسىن! بۇگىنگى شارا – بولاشاقتىڭ شاراسى. بولاشاق بۇگىننەن باستالادى. بۇگىن مىنە شاعىن قالانىڭ ىرگەتاسى قالانعالى تۇر. مەنىڭ ويىمشا، بۇل باستامانى ماڭعىستاۋ عانا ەمەس، قازاقستاننىڭ باسقا ايماقتارى دا قولدايدى دەپ ويلايمىن» دەدى ول.

عيماراتتىڭ ىرگەتاسىن قالاۋ راسىمىندە قوعامدىق كەلىسىم ورتالىعى-وبلىستىق ءۇيىنىڭ ديرەكتورى نادەجدا شاروۆا مەن اباي وبلىسى قازاقستان حالقى اسسامبلەياسى عىلىمي ساراپتامالىق توبىنىڭ توراعاسى  ايرات بازەنوۆ ماڭعىستاۋ جۇرتشىلىعىنا ءوڭىر تۇرعىندارى اتىنان العىس ايتتى.

سونداي-اق، «ابايعا قۇرمەت» اكتسياسى اياسىندا شىمكەنت قالاسى شىعارماشىلىق ورتالىعىن، تۇركىستان وبلىسى كورمە ورتالىعىن، استانا قالاسى كەلەشەك مەكتەبىن، اقتوبە وبلىسى جەكپە جەك ورتالىعىن، پاۆلودار وبلىسى ۇستەل تەننيسى ورتالىعىن سالۋدى، شىعىس قازاقستان وبلىسى ەرتىس جاعالاۋىن اباتتاندىرۋدى جوسپارلاپ وتىر.

Abai.kz