الماتىدا حالىقارالىق جاستار كۇنىنە ارنالعان «Alma Love» جاستار فەستيۆالى اياسىندا «SOCIAL LAB» اتتى الەۋمەتتىك جوبالار كورمەسى ۇيىمداستىرىلدى. ءىس-شارا الماتى قالاسى جاستار ساياساتى باسقارماسىنىڭ قولداۋىمەن ءوتتى.

​قالامىزدىڭ ءىرى ساۋدا ورتالىقتارىنىڭ بىرىندە وتكەن كورمەدە جاستارعا باعىتتالعان 20-دان استام جوبا تانىستىرىلدى. ولاردىڭ قاتارىندا ينكليۋزيۆتى تەاتر، ۆولونتەرلىك باستامالار، اشىق اسپان استىنداعى كينو كورسەتىلىمدەرى، تەگىن وقىتۋ كۋرستارى، «تىلدەر ساياباعى» جوباسى، پروفيلاكتيكالىق باعدارلامالار، جاساندى ينتەللەكت پەن روبوتوتەحنيكاعا ارنالعان باستامالار بار.

«بۇل كورمەنىڭ باستى ماقساتى – قالا تۇرعىندارىنا الەۋمەتتىك ماڭىزى جوعارى جوبالاردى تانىستىرىپ، ولاردى قولداۋ. ءبىز جاستاردىڭ باستامالارىنا جاعداي جاساپ، ولاردىڭ قوعام ومىرىنە بەلسەندى ارالاسۋىنا مۇمكىندىك بەرگىمىز كەلەدى», – دەءدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.

كورمەگە قالا تۇرعىندارى مەن قوناقتارى بەلسەندى قاتىسىپ، ءوز قىزىعۋشىلىقتارىنا ساي جوبالارمەن تانىستى. قاتىسۋشىلاردىڭ ءبىرى مامىر عاني ءوز اسەرىمەن ءبولىسىپ:
«مۇندا كوپتەگەن پايدالى جانە قىزىقتى جوبالاردى كوردىم. بولاشاقتا ولاردىڭ بىرىنە قاتىسىپ، ۇلەس قوسقىم كەلەدى», – دەدى.

ايتا كەتەيىك، الماتىدا حالىقارالىق جاستار كۇنىنە ارنالعان ونكۇندىك ءىس-شارالار لەگى 3 تامىزدا باستالعان. فەستيۆال باعدارلاماسىندا ەكولوگيالىق اكتسيالار، سپورتتىق تۋرنيرلەر، كۆەست ويىندارى، Open Mic فورماتىنداعى كونتسەرتتەر جانە وزگە دە قىزىقتى ءىس-شارالار بار.

فەستيۆالدىڭ سالتاناتتى جابىلۋى 12 تامىز كۇنى بالۋان شولاق اتىنداعى سپورت كەشەنىندە وتەدى. قالا تۇرعىندارى مەن قوناقتارىن قازاقستاندىق ەسترادا جۇلدىزدارىنىڭ قاتىسۋىمەن وتەتىن گالا-كونتسەرت پەن الماتىنىڭ بەلسەندى جاستارىن ماراپاتتاۋ ءراسىمى كۇتەدى. ءىس-شاراعا كىرۋ تەگىن.

Abai.kz