مەملەكەت باسشىسى قاسىم-جومارت توقاەۆتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىندا ساۋدا سالاسىن دامىتۋ جانە ەلىمىزدىڭ ەكسپورتتىق الەۋەتىن كۇشەيتۋ مەملەكەت ساياساتىنىڭ باسىم باعىتتارىنىڭ ءبىرى رەتىندە اتالدى. پرەزيدەنت وتاندىق تاۋار وندىرۋشىلەردىڭ پوزيتسياسىن نىعايتۋ، شيكىزاتتىق ەمەس ەكسپورت كولەمىن ارتتىرۋ، شاعىن جانە ورتا بيزنەسكە قولايلى جاعداي جاساۋ سياقتى ناقتى مىندەتتەر قويدى. ۇكىمەت مەملەكەت باسشىسىنىڭ تاپسىرمالارىن جۇزەگە اسىرۋ ءۇشىن بيزنەستى جۇرگىزۋدىڭ اشىق قاعيدالارىن ازىرلەپ، ىشكى ساۋدانى دامىتۋدا جانە وتاندىق تاۋارلاردىڭ سىرتقى نارىققا شىعۋىنا قاجەتتى ينفراقۇرىلىم قالىپتاستىرادى.

سۋرەت: primeminister.kz سايتىنان الىندى.

قابىلدانعان شارالار كەشەنىنىڭ ناتيجەسىندە سالا تۇراقتى ءوسۋدى كورسەتىپ وتىر: 2025 جىلعى قاڭتار–شىلدە ايلارىندا ساۋدا كولەمى 8,6%-عا، ال ينۆەستيتسيا كولەمى ءى جارتىجىلدىقتا 37%-عا ءوسىپ، 438 ملرد تەڭگەگە جەتتى.

«ساۋدا سالاسىندا 800 مىڭنان استام بيزنەس سۋبەكتىسى اينالىسىپ، 1,5 ملن-نان استام ادامدى جۇمىسپەن قامتاماسىز ەتىپ وتىر. “ايتىلدى-جاسالدى" قاعيداتى بويىنشا مەملەكەت باسشىسىنىڭ قازاقستان حالقىنا جولداۋىندا ايتقان تاپسىرمالارى بەلسەندى تۇردە جۇزەگە اسىرىلۋدا»، — دەپ اتاپ ءوتتى ساۋدا جانە ينتەگراتسيا ءمينيسترى ارمان شاققاليەۆ.

سۋرەت: primeminister.kz سايتىنان الىندى.

نارىقتى قورعاۋ جانە قازاقستاندىق تاۋارلاردى ىلگەرىلەتۋ

ۇكىمەت ىشكى نارىقتى قورعاۋعا جانە وتاندىق وندىرۋشىلەردى قولداۋعا باعىتتالعان رەتتەۋشى شارالاردى ازىرلەدى. 2025 جىلدىڭ مامىر ايىندا تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا قازاقستان رەسپۋبليكاسىنىڭ زاڭناماسىنا وزگەرىستەر ەنگىزىلدى. وتاندىق تاۋار وندىرۋشىلەردىڭ بىرىڭعاي ءتىزىلىمى جاسالادى وندا وندىرۋشىلەر تۋرالى ناقتى دەرەكتەر جيناقتالىپ، ولارعا مەملەكەتتىك قولداۋ شارالارىنا، سونداي-اق مەملەكەتتىك جانە كۆازيمەملەكەتتىك ساتىپ الۋلارعا قول جەتكىزۋ مۇمكىندىگى قامتاماسىز ەتىلەدى.

ساۋدانى ىنتالاندىرۋ جانە دۇكەن سورەلەرىندەگى وتاندىق تاۋارلار ۇلەسىن ارتتىرۋ ماقساتىندا قازاقستاندىق وندىرۋشىلەر ونىمدەرى ءۇشىن كەمىندە 50% سورەلىك كەڭىستىكتى كوزدەيتىن باعدارلاما ىسكە قوسىلدى.

سونىمەن قاتار ساپاسىز ءارى قاۋىپتى ونىمدەردىڭ ىشكى نارىققا ەنۋىنە شەكتەۋ قويۋ باعىتىندا بەلسەندى جۇمىس جۇرگىزىلىپ جاتىر.

«بارلىق باقىلاۋشى ورگانداردىڭ قاتىسۋىمەن احۋالدىق شتاب ءتيىمدى جۇمىس اتقارۋدا. 47 مىڭنان استام كولىك تەكسەرىلدى، تاۋارلىق سالماقتا بۇل 600 مىڭ توننادان استام مال شارۋاشىلىعى ونىمدەرى. ونىڭ ىشىندە 900-دەن استام اۆتوكولىك كەرى قايتارىلدى، 1 مىڭنان استام سايكەستىكتى راستاۋ قۇجاتتارىنىڭ كۇشى جويىلدى»، — دەپ اتاپ ءوتتى ارمان شاققاليەۆ.

سۋرەت: primeminister.kz سايتىنان الىندى.

ەكسپورتتاۋشىلاردى قولداۋ جانە ءونىمدى شەتەلدە ىلگەرىلەتۋ

پرەزيدەنتتىڭ تاپسىرماسى بويىنشا شيكىزاتتىق ەمەس ەكسپورتتى ءارتاراپتاندىرۋ جانە ارتتىرۋ ماقساتىندا «ءبىر تەرەزە» قاعيداتى بويىنشا قاراجات قۇرالدارىنىڭ تولىق سپەكترىن ۇسىناتىن ەكسپورتتىق-كرەديتتىك اگەنتتىك قۇرىلدى.

بيىلعى 7 ايدا كورسەتىلگەن قارجىلاي قولداۋ كولەمى وتكەن جىلدىڭ سايكەس كەزەڭىمەن سالىستىرعاندا 200 ملرد تەڭگەگە ارتىپ، 394 ملرد تەڭگەنى قۇرادى. قولداۋ كورسەتىلەتىن بارلىق جوبالاردىڭ 71%-ىن قۇرايتىن شاعىن جانە ورتا بيزنەسكە ەرەكشە نازار اۋدارىلۋدا. بۇل رەتتە ورتاشا جانە جوعارى قايتا ءبولۋ ونىمدەرىنىڭ ۇلەسى 83%-عا جەتىپ وتىر.

قازاقستاندىق تاۋارلاردى سىرتقى نارىقتا ىلگەرىلەتۋدى كۇشەيتۋ ءۇشىن حالىقارالىق ينفراقۇرىلىم قالىپتاستىرىلۋدا. قىتاي پروۆينتسيالارىندا سەرىكتەستىك كەڭسەلەر، وكىلدىكتەر جانە ۇلتتىق پاۆيلوندار ىسكە قوسىلۋدا، سونىڭ ىشىندە ونداي نىساندار چەندۋ، ءۇرىمشى، نانكين جانە شاندۋن پروۆينتسيالارىندا بار. وزبەكستاندا "تەرمەز" حالىقارالىق ساۋدا ورتالىعىنىڭ اۋماعىندا قازاقستاندىق ونىمدەردىڭ ساۋدا پاۆيلونى جۇمىس ىستەپ تۇر. ەكسپورتتى ىلگەرىلەتۋ بويىنشا جۇمىس ءباا، تۇركيا، ءۇندىستان، يران جانە قىتايدا قارقىندى جۇرگىزىلۋدە

وعان قوسىمشا الداعى ۋاقىتتا ەكسپورتقا شىعۋىمىز كەرەك ەلدەردە ساۋدا-ەكونوميكالىق ميسسيالار وتكىزىلۋدە، قازاقستاندىق تاۋارلاردى حالىقارالىق ەلەكتروندىق الاڭداردا ىلگەرىلەتۋ بويىنشا جۇمىستار جۇرگىزىلۋدە، مىسالى ولاردىڭ اراسىندا jd.com, Doiyin, Alibaba سياقتى ساۋدا-ساتتىق الاڭدارى بار.

اشىق جانە باسەكەلەس بيرجا نارىعىنا ارنالعان جاڭا ەرەجەلەر

پرەزيدەنت تاپسىرمالارىن ورىنداۋ ءۇشىن 2024 جىلعى جەلتوقساندا نارىقتىڭ اشىق جۇمىس ىستەۋ ەرەجەلەرىن ورناتۋ ءۇشىن باسەكەلەستىك ورتانى دامىتۋعا باعىتتالعان بيرجالىق ساۋدا تۋرالى زاڭ قابىلداندى.

«الەۋمەتتىك ماڭىزى بار بيرجالىق تاۋار» ۇعىمى زاڭنامالىق تۇردە ەنگىزىلدى، ول ەنەرگەتيكالىق جانە ازىق-تۇلىك قاۋىپسىزدىگىن قامتاماسىز ەتۋ ءۇشىن شەشۋشى ماڭىزعا يە. بۇل الىپساتارلىقتى جويىپ، باعانى اشىق بەلگىلەۋگە جانە وتاندىق نارىقتى وسى تاۋارلارمەن تۇراقتى قامتاماسىز ەتۋگە كەپىلدىك بەرەدى»، — دەدى ساۋدا جانە ينتەگراتسيا ءمينيسترى ارمان شاققاليەۆ.

ودان بولەك، الەۋمەتتىك ماڭىزى بار تاۋارلارمەن ساۋدانى جۇزەگە اسىرۋعا ۋاكىلەتتى بيرجالاردى كونكۋرستىق ىرىكتەۋ تەتىگى ەنگىزىلدى. بۇل اففيليرلەنگەن قۇرىلىمداردىڭ قۇرىلۋىن بولدىرمايدى جانە قاتىسۋشىلاردىڭ ساۋدا الاڭدارىنا تەڭ قول جەتكىزە الۋىنا كەپىلدىك بەرەدى.

الەۋمەتتىك از قامتىلعان ساناتتاعى ازاماتتارعا كومەك كورسەتۋدىڭ جاڭا تەتىكتەرى

پرەزيدەنتتىڭ ازاماتتاردىڭ الەۋمەتتىك از قامتىلعان ساناتتارىنا ءتيىمدى اتاۋلى قولداۋدى قامتاماسىز ەتە وتىرىپ، تىكەلەي باعانى رەتتەۋدەن كەزەڭ-كەزەڭىمەن باس تارتۋ تۋرالى تاپسىرماسىن ورىنداۋ ءۇشىن 2024 جىلعى ساۋىردە بيزنەستى جۇرگىزۋدى رەتتەيتىن قازاقستان رەسپۋبليكاسىنىڭ زاڭنامالىق اكتىلەرىنە وزگەرىستەر مەن تولىقتىرۋلار ەنگىزىلدى.

«وسى وزگەرىستەرگە سايكەس ءبىز الەۋمەتتىك ماڭىزى بار تاۋارلاردىڭ باعاسىن تىكەلەي رەتتەۋدەن باس تارتامىز جانە اتاۋلى الەۋمەتتىك كومەككە كوشەمىز. ساۋدا ۇستەمەسىنىڭ 15%-ى باقىلاۋدى كۇشەيتۋ پايداسىنا الەۋمەتتىك ماڭىزى بار تاۋارلارعا شەكتى باعالاردى ەنگىزۋ تەتىگى الىنىپ تاستالادى»، — دەپ اتاپ ءوتتى ارمان شاققاليەۆ.

دايىندىق كەزەڭىندە اتاۋلى كومەك تەتىگىن تەستىلەۋگە باعىتتالعان «تسيفرلىق ازىق-تۇلىك ۆاۋچەرى» پيلوتتىق جوباسى جۇزەگە اسىرىلۋدا. ونىڭ شەڭبەرىندە الۋشىلارعا الەۋمەتتىك ماڭىزى بار تاۋارلاردى ساۋدا ۇستەمەسىنسىز ساتىپ الۋ باعاسىمەن ساتىپ الۋعا مۇمكىندىك بەرەتىن ازىق-تۇلىك ۆاۋچەرلەرى ۇسىنىلادى، بۇل كومەكتى ماقساتتى جانە ءادىل ءبولۋدى قامتاماسىز ەتەدى.

«مەملەكەت باسشىسىنىڭ بارلىق تاپسىرمالارى ەرەكشە باقىلاۋدا. ءاربىر ءىس-شارانى جۇزەگە اسىرۋ جوسپارلى رەجيمدە ءجۇرىپ جاتىر، مىندەتتەر ساپالى جانە بەلگىلەنگەن مەرزىمدە ورىندالاتىن بولادى»، — دەپ اتاپ ءوتتى ساۋدا جانە ينتەگراتسيا ءمينيسترى.

ساۋدا مەن شيكىزاتتىق ەمەس ەكسپورتتى دامىتۋ جونىندەگى ءىس-شارالار كەشەنى پرەزيدەنتتىڭ تاپسىرمالارىن ورىنداۋعا جۇيەلى جانە دايەكتى كوزقاراستى كورسەتەدى.

ۇكىمەتتىك شارالار ەكونوميكالىق ءوسۋ ءۇشىن تۇراقتى نەگىز قۇرۋعا، باسەكەگە قابىلەتتىلىكتى ارتتىرۋعا جانە قازاقستاننىڭ حالىقارالىق ساۋدا تىزبەكتەرىنە ينتەگراتسيالانۋىنا باعىتتالعان.

Abai.kz