رەسەي نەگە بەيبىت كەلىسىمگە، سوعىستى توقتاتۋعا مۇددەلى ەمەس؟ بىرنەشە سەبەبىن تىزبەلەپ ايتايىق:

بىرىنشىدەن، سوعىستىڭ توقتاۋى رەسەيدىڭ الەۋمەتتىك احۋالىن ۋشىقتىرادى. مايداننان ورالعان جۇزدەگەن مىڭ سارباز بەن تۇرمەدەن بوساتىلعان جاۋىنگەرلەر جۇمىسسىز قالىپ، ەل ىشىندە قىلمىس پەن تارتىپسىزدىك ءورشيدى. مەملەكەت ولاردى بەيبىت ومىرگە بەيىمدەپ، الەۋمەتتىك تولەمدەر تولەۋگە ءماجبۇر بولادى. بۇل ەكونوميكانى تۇرالاتادى.

ەكىنشىدەن، سوعىس – ماسكەۋدىڭ ارتتا قالعان ەكونوميكاسىن «جانداندىرۋدىڭ» جالعىز جولىنا اينالعان. سانكتسيالار ارقىلى رەسەيدى وقشاۋلاۋ كرەملگە «Made in Russia» ونىمدەرىن كۇشتەپ ناسيحاتتاپ، ۇلتتىق بۋرجۋازيانى وزىنە باعىنىشتى ۇستاپ وتىرۋعا مۇمكىندىك بەردى. ەگەر بەيبىتشىلىك ورناسا، باتىستىق كاپيتال مەن برەندتەر قايتا ورالىپ، بۇل جۇيەنىڭ ىرگەسى شايقالادى. سونىمەن بىرگە ماسكەۋدىڭ ورتالىق ازيانى ەكونوميكالىق تۇرعىدا تاۋەلدى ەتۋدەگى امالى دا السىرەيدى.

ۇشىنشىدەن، ساياسي تۇرعىدان العاندا، رەسەي مەن قىتاي حالىقارالىق قاتىناستا ەجەلگى «ءبولىپ ال دا، بيلەي بەر» قاعيداسىنا سۇيەنىپ كەلەدى. بۇل ءتاسىل ەۋروپا وداعىنىڭ «بىرىگۋ جانە گۇلدەنۋ» ۇستانىمىنا مۇلدە قارسى. ەگەر سوعىس توقتاسا، بۇل ستراتەگيانىڭ قۇنى كوك تيىن بولىپ، ناتو مەن ەو رەسەيدىڭ السىرەۋىن پايدالانىپ، ورتالىق ازياعا ەركىن كىرىپ الادى.

تورتىنشىدەن، يدەولوگيالىق سەبەپ بار. رەسەي، قىتاي جانە يران دەموكراتيا مەن امبەباپ قۇندىلىقتاردىڭ ءوز ەلدەرىنە جايىلۋىنان ولەردەي قورقادى. ەركىن قوعامدارمەن كورشى بولۋ ولاردىڭ اۆتوريتارلىق بيلىگىنە قاتەر توندىرەدى. سوندىقتان كرەمل «باتىستىڭ ۋكراينا ماسەلەسىنە ارالاسۋى – رەسەيدىڭ ىشكى ىسىنە قول سۇعۋ» دەگەن ۇستانىمدى ادەيى حالىق ساناسىنا ءسىڭىرىپ وتىر. ەگەر بۇل يدەولوگيالىق قۇرالىنان ايىرىلسا، رەجيمنىڭ تىرەگى شايقالادى.

بەسىنشىدەن، رەسەي ءۇشىن سوعىستىڭ جالعاسۋى – تەك گەوساياسي مۇددە ەمەس، بيلىكتى ساقتاپ قالۋدىڭ باستى تەتىگى. كرەمل ءوزىن تەك قاقتىعىس ارقىلى «ۇلى دەرجاۆا» رەتىندە كورسەتكىسى كەلەدى. ال سوعىس توقتاسا، رەسەيدىڭ الەمدىك ارەناداعى بەدەلى دە، ىشكى تۇراقتىلىعى دا كۇرت قۇلدىرايدى.

تاقىرىپقا تۇزدىق: 

The Telegraph: «رەسەيدىڭ جاڭا ەليتاسى سوعىستىڭ جالعاسقانىن قالايدى»، - دەپ جازادى.

باسىلىمنىڭ جازۋىنشا، رەسەيدە «جاڭا ورتا كلاسس» قالىپتاستى — قورعانىس زاۋىتتارىنداعى جۇمىسشىلار مەن اسكەريلەردىڭ وتباسىلارى.

• كونتراكت بويىنشا قىزمەت ەتەتىندەر جوعارى جالاقى، سىياقى مەن جەڭىلدىكتەر الادى، ال ولاردىڭ بالالارىنا ۋنيۆەرسيتەتكە ءتۇسۋ كەزىندە باسىمدىق بەرىلەدى.
• اسكەري وندىرىستە ىستەيتىن جۇمىسشىلار سوعىسقا دەيىنگى كەزەڭمەن سالىستىرعاندا بىرنەشە ەسە كوپ تابىس تابۋدا.

ساراپشىلاردىڭ ايتۋىنشا، بۇل الەۋمەتتىك توپتار تىكەلەي سوعىسقا تاۋەلدى جانە سوعىستان بۇرىنعى ومىرگە قايتۋدى قالامايدى.

سوعىس اياقتالعاننان كەيىن الەۋمەتتىك اپات بولۋى مۇمكىن، ويتكەنى ارتىق تابىس كوزدەرى جوعالادى.

نۇرگەلدى ابدىعانيۇلى

Abai.kz