قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى بيىل 11 شىلدە مەن 12 تامىز ارالىعىندا حالىق اراسىندا ساۋالناما جۇرگىزدى. ىرىكتەۋ جيىنتىعىنىڭ كولەمى – 8 000 رەسپوندەنت. ساۋالناماعا ەلىمىزدىڭ 17 وبلىسىنان جانە رەسپۋبليكالىق ماڭىزى بار – استانا، الماتى، شىمكەنت قالالارىنان 18 جاستان اسقان ازاماتتار قاتىستى.

الەۋمەتتانۋلىق زەرتتەۋ دەرەكتەرىنە سايكەس، ازاماتتاردىڭ 75,9%-ى بۇگىنگى تاڭدا ەلدىڭ دۇرىس باعىتتا دامىپ كەلە جاتقانىن اتاپ وتكەن.

ەڭ جوعارى الەۋمەتتىك وپتيميزم دەڭگەيى 18–29 جاس ارالىعىنداعى جاستارعا ءتان (84,6%). جاس شاماسى وسكەن سايىن ەلدىڭ بولاشاعىنا قاتىستى وپتيميزم ءبىرشاما تومەندەگەنىمەن، جەتكىلىكتى جوعارى دەڭگەيدە ساقتالادى (61 جاستان جوعارى رەسپوندەنتتەر اراسىندا – 70,6%). ەل دامۋىنىڭ قازىرگى باعىتىن قالا تۇرعىندارىنا (73,8%) قاراعاندا اۋىل تۇرعىندارى (79,3%) اناعۇرلىم دۇرىس دەپ سانايدى.

ەلدىڭ دۇرىس باعىتتا دامىپ كەلە جاتقانىن قولداعان رەسپوندەنتتەردىڭ باسىم بولىگى قازىردىڭ وزىندە ناقتى جۇزەگە اسىرىلىپ جاتقان بىرقاتار ماڭىزدى رەفورمالاردى اتاپ ءوتتى. ولاردىڭ ىشىندە بىرنەشە توپتى ءبولىپ كورسەتۋگە بولادى.

الەۋمەتتىك باستامالار:

— اۋىلدىق جانە قالالىق مەكتەپتەردى سالۋ مەن جاڭارتۋ – 38,2%;

— «ۇلتتىق قور – بالالارعا» باعدارلاماسىن ىسكە اسىرۋ – 29,5%;

— بجزق-دان قاراجاتتىڭ ءبىر بولىگىن شەشىپ الۋ مۇمكىندىگى – 20,1%.

ەكونوميكالىق رەفورمالار:

• اۆتوماگيسترالدەردى، ۆوكزالدار مەن اۋەجايلاردى سالۋ جانە جوندەۋ – 18,4%;
• اۋىل شارۋاشىلىعىن دامىتۋ – 13,6%;
• شاعىن جانە ورتا بيزنەستى قولداۋ – 10,3%;
• وتاندىق تاۋار ءوندىرىسىنىڭ ارتۋى – 9,7%.

«زاڭ جانە ءتارتىپ» قاعيداتىن جانە «تازا قازاقستان» جالپىۇلتتىق اكتسياسىن جۇزەگە اسىرۋ:

• تۇرمىستىق زورلىق-زومبىلىقپەن كۇرەس – 32,6%;
• ەلدى مەكەندەردى تازالاۋ جانە اباتتاندىرۋ، ۆانداليزم مەن مادەنيەتسىزدىككە قارسى شارالار – 14,7%;
• ەلدەن زاڭسىز شىعارىلعان اكتيۆتەر مەن كاپيتالدى قايتارۋ – 5,8%.

ەلدى تسيفرلاندىرۋ:

• مەملەكەتتىك قىزمەتتەردىڭ تسيفرلىق فورماتتا دامۋى – 30,7%;
• وتباسىنىڭ تسيفرلىق كارتاسىن، الەۋمەتتىك ءامياندى ەنگىزۋ – 16,1%.

بۇل ساۋالناما ناتيجەلەرى ازاماتتاردىڭ ءومىرىنىڭ ءتۇرلى سالالارىندا ناقتى وزگەرىستەردى بايقاپ وتىرعانىن كورسەتەدى. بۇل ءوز كەزەگىندە جۇرگىزىلىپ جاتقان رەفورمالاردىڭ العاشقى ناتيجەسىن بەرىپ، مەملەكەتتىك ساياساتقا دەگەن قوعامدىق سەنىمدى نىعايتىپ، بولاشاققا قاتىستى ءوپتيميزمدى ارتتىرعانىن اڭعارتادى.

ەكونوميكالىق رەفورمالار مەن الەۋمەتتىك باستامالاردىڭ ءتيىمدى جۇزەگە اسىرىلۋى ەل باسشىلىعىنا دەگەن قوعامدىق سەنىم دەڭگەيىنەن كورىنىس تابۋدا. الەۋمەتتانۋلىق زەرتتەۋ دەرەكتەرىنە سايكەس، پرەزيدەنت رەيتينگتىڭ الدىڭعى قاتارىندا تۇر – ساۋالناماعا قاتىسقانداردىڭ 82,4%-ى وعان سەنىم بىلدىرگەن.

سونىمەن قاتار، ەلدەگى وڭ وزگەرىستەر پاتريوتتىق كوڭىل-كۇيدىڭ ارتۋىنا تىكەلەي ىقپال ەتۋدە. ساۋالناماعا قاتىسقان رەسپوندەنتتەردىڭ باسىم كوپشىلىگى قازاقستانمەن جانە ءوز ازاماتتىعىمەن ماقتاناتىنىن اتاپ ءوتتى – 89,9% («وتە ماقتانامىن» – 49,1% جانە «ماقتانامىن» – 40,8%).

ەلدىڭ بولاشاق دامۋى تۇرعىسىنان رەسپوندەنتتەر قازاقستاننىڭ ايماقتىق قانا ەمەس، جاھاندىق دەڭگەيدە دە كوشباسشى بولا الاتىن بىرقاتار سالالارىن ايقىندادى. رەسپوندەنتتەردىڭ پىكىرىنشە، ەلدىڭ ەڭ پەرسپەكتيۆالى توپ-5 دامۋ باعىتى مىناداي:

1. اگروونەركاسىپتىك سەكتور – 38,9%.
2. تسيفرلاندىرۋ جانە جاساندى ينتەللەكت – 30,6%.
3. ەنەرگەتيكا – 25,3%.
4. كولىك جانە ترانزيت – 17,5%.
5. ادامي كاپيتالدى دامىتۋ – 13,1%.

سۋرەت: kisi.kz سايتىنان الىندى.

رەسپوندەنتتەردىڭ پىكىرىنشە، قازىرگى كەزەڭدە وسى بەس ستراتەگيالىق ماڭىزدى باعىتتىڭ دامۋى ەلىمىزدى الەمدىك دەڭگەيدەگى جەتەكشى ورىندارعا شىعارىپ، تۇراقتى ەكونوميكالىق ءوسىم مەن تەحنولوگيالىق ىلگەرىلەۋدى قامتاماسىز ەتە الادى.

جالپى العاندا، الەۋمەتتانۋلىق ساۋالناما ناتيجەلەرى بۇگىنگى تاڭدا قازاقستاندىق قوعام ەلدەگى وڭ وزگەرىستەردى ايقىن بايقاپ وتىرعانىن كورسەتەدى. ازاماتتار جۇرگىزىلىپ جاتقان رەفورمالاردىڭ ناقتى ناتيجەلەرىن وز ومىرلەرىنەن سەزىنۋدە. بۇل ءوز كەزەگىندە حالىقتىڭ مەملەكەتتىك ساياساتقا دەگەن سەنىمىن كۇشەيتىپ، ەلدىڭ بولاشاعىنا قاتىستى ءوپتيميزمدى ارتتىرادى.

Abai.kz