قر ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ بۇرىنعى توراعاسى ق.پ. قوجامجاروۆقا تىقىر تاياندى. قر باس پروكۋراتۋراسى ونىڭ ۇستىنەن سوتقا دەيىنگى تەرگەۋ باستالعانىن حابارلادى.

قر باس پروكۋراتۋراسى:

«ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ بۇرىنعى توراعاسى ق.پ. قوجامجاروۆقا قاتىستى لاۋازىمدىق وكىلەتتىكتەرىن اسىرا پايدالانۋ، سونداي-اق ول باسشىلىق لاۋازىمداردا بولعان ءارتۇرلى كەزەڭدەردە قىلمىستىق جولمەن الىنعان اقشانى زاڭداستىرۋ فاكتىلەرى بويىنشا سوتقا دەيىنگى تەرگەپ-تەكسەرۋ باستالدى.

بارلىق قىلمىستىق ىستەر بويىنشا ارنايى پروكۋرورلاردىڭ جەتەكشىلىگىمەن جەدەل-تەرگەۋ توپتارى قۇرىلدى. قر قپك 201-بابىنا سايكەس وزگە اقپارات جاريالاۋعا جاتپايدى»، - دەدى.

قايرات قوجامجاروۆ كىم؟

ول 1965 جىلى 24 ناۋرىزدا دۇنيەگە كەلگەن.

1982 جىلى الماتىداعى رەسپۋبليكالىق فيزيكا-ماتەماتيكا مەكتەپ-ينتەرناتىن، 1987 جىلى لەنينگراد مەملەكەتتىك ۋنيۆەرسيتەتىن "زاڭگەر" ماماندىعى بويىنشا تامامداعان.

2012–2013 جىلدارى اقمولا وبلىسىنىڭ اكىمى بولدى. 2013–2014 جىلدارى پرەزيدەنت كومەكشىسى – قاۋىپسىزدىك كەڭەسىنىڭ حاتشىسى.

2014–2015 جىلدارى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى. 2015–2016 جىلدارى سىبايلاس جەمقورلىققا قارسى ءىس-قيمىل ۇلتتىق بيۋروسىن باسقاردى. 2016–2017 جىلدارى قايتادان مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى بولدى.

2017–2019 جىلدارى قازاقستاننىڭ باس پروكۋرورى قىزمەتىن اتقاردى.

2019 جىلعى 19 ناۋرىزدا سەنات دەپۋتاتى بولىپ تاعايىندالدى. 2023 جىلعى قاڭتاردا پرەزيدەنت جارلىعىمەن قوجامجاروۆپەن بىرگە 13 سەناتوردىڭ وكىلەتتىگى توقتاتىلدى.

Abai.kz