ءماجىلىس سپيكەرى، «AMANAT» توراعاسى ەرلان قوشانوۆ مەملەكەت باسشىسى قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىن جۇزەگە اسىرۋ بويىنشا پارتيا اكتيۆىمەن كەڭەيتىلگەن وتىرىس وتكىزدى.

ءىس-شاراعا ءماجىلىس دەپۋتاتتارى، قوعام قايراتكەرلەرى، ورتالىق اپپارات قىزمەتكەرلەرى، «جاستار رۋحىنىڭ» بەلسەندىلەرى قاتىستى. جيىنعا بەينەكونفەرەنتسبايلانىس ارقىلى پارتيانىڭ بارلىق وڭىرلىك فيليالى قوسىلدى.

سۋرەتتى تۇسىرگەن: ءالي عالىم.

ءسوز باسىندا ەرلان قوشانوۆ «AMANAT» پارتياسى مەملەكەت باسشىسى قاسىم-جومارت توقاەۆتىڭ قوعامدىق تىرەگى بولا وتىرىپ، جولداۋدى اۋقىمدى رەفورمالاردىڭ لايىقتى جالعاسى، ەلىمىزدى دامىتۋ باعىتىنداعى ناقتى ءارى جۇيەلى جۇمىستىڭ نەگىزگى باعدارى رەتىندە قاراستىراتىنىن ەرەكشە اتاپ ءوتتى.

«پرەزيدەنتتىڭ بيىلعى جولداۋى – «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ جارقىن مىسالى. وندا قوعامدى تولعاندىرعان ەڭ وزەكتى سۇراقتارعا جاۋاپ بەرىلىپ، جاھاندىق باستامالاردان باستاپ، كۇندەلىكتى ومىرگە قاتىستى بارلىق ماسەلەلەر قامتىلدى. «AMANAT» پارتياسىنىڭ باستى مىندەتى – مەملەكەت باسشىسى رەفورمالارىنىڭ قوزعاۋشى كۇشى بولۋ، ساياسي تۇراقتىلىق پەن قوعامدىق كەلىسىمدى قامتاماسىز ەتۋ. پرەزيدەنت باستامالارىن قولداۋ – بۇل ءبىزدىڭ باستى تاڭداۋىمىز. ءبىزدىڭ ۇزاق مەرزىمدى ميسسيامىز دا، پارتيانىڭ تسەنتريستىك ۇستانىمى دا وسى مۇددەمەن ۇشتاسىپ جاتىر»، – دەدى ول.

پارتيا توراعاسى جولداۋدا تسيفرلاندىرۋ قادامى جاڭا جالپىۇلتتىق تەحنولوگيالىق يدەياعا اينالعانىنا نازار اۋداردى. جاساندى ينتەللەكت پەن جاڭا تەحنولوگيالار دامۋدىڭ جاڭا قوزعاۋشى كۇشى سانالادى. كوپتەگەن سالانى تسيفرلاندىرۋ بويىنشا كەشەندى ءىس-شارالاردى قولعا الۋ جوسپارلانۋدا. پارتيا بۇل باعىتتا ازاماتتاردىڭ، اسىرەسە زەينەتكەرلەر مەن جاسوسپىرىمدەردىڭ تسيفرلىق ساۋاتىن ارتتىرۋعا ارنالعان «تسيفرلىق قوعام» جوباسىن جۇزەگە اسىرۋدا. ەندى پارتيالاستار ونى بۇكىل ەل اۋماعىنا تاراتىپ، جولداۋ شەڭبەرىندە ازىرلەنەتىن جاڭا «Digital Qazaqstan» ستراتەگياسىنىڭ ءبىر بولىگىنە اينالدىرۋعا ءتيىس.

ەرلان قوشانوۆ مەملەكەت باسشىسى اۋىل تۇرعىندارىنىڭ ءال-اۋقاتىنا ەرەكشە نازار اۋدارعانىن اتاپ ءوتتى. بۇل ماسەلە اگرارلىق سالانىڭ دامۋىمەن تىكەلەي بايلانىستى. «AMANAT» پارتياسى بىرنەشە جىلدان بەرى «جەر اماناتى»، «اۋىل اماناتى»، «اگروساۋات» جوبالارىن جۇزەگە اسىرىپ كەلەدى. ولار اۋىلدى دامىتۋعا، اۋىل تۇرعىندارىنىڭ تۇرمىسىن جاقسارتۋعا قاجەت ناقتى ءارى تۇسىنىكتى قۇرالداردى ۇسىنادى. اتالعان جوبالاردى ەل ازاماتتارى جىلى قابىلدادى. تيىسىنشە، ولار پرەزيدەنت جولداۋىندا ايقىندالعان جاڭا باستامالارعا ەنگىزىلۋگە ءتيىس.

سونداي-اق پارتيا توراعاسى مەملەكەت باسشىسى حالىقتىڭ قارجىلىق ساۋاتىن ارتتىرۋعا ارنالعان «قارىزسىز قوعام» پارتيالىق جوباسىنا قولداۋ بىلدىرگەنىن ەرەكشە اتاپ ءوتتى. «AMANAT» ۇكىمەتپەن بىرگە زاماناۋي تسيفرلىق تەحنولوگيالاردى پايدالانا وتىرىپ، ونىڭ اۋقىمىن كەڭەيتۋدى جالعاستىرادى. بيىل call-ورتالىق قۇرىلدى، 40 زاڭگەردىڭ قاتىسۋىمەن ونلاين-پلاتفورما جۇمىسى جولعا قويىلدى، ال وڭدەلگەن وتىنىشتەردىڭ جالپى سانى 800 مىڭنان استى.

سۋرەتتى تۇسىرگەن: ءالي عالىم.

ءىس-شارا بارىسىندا ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى رينات زايىت پىكىر ءبىلدىردى. ونىڭ ايتۋىنشا، پرەزيدەنت ايتقان ءبىر ۇلت يدەياسىن ەتنيكالىق ماعىنادا ەمەس، قوعام بىرلىگىنىڭ كورىنىسى رەتىندە ءتۇسىنۋ كەرەك، سەبەبى ۇلتتىق بىرلىك – قازاقستاننىڭ باياندى بولاشاعىنىڭ باستى شارتى.

سۋرەتتى تۇسىرگەن: ءالي عالىم.

ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى ەكاتەرينا سمىشلياەۆا مەملەكەت باسشىسى جولداۋدا تسيفرلىق ترانسفورماتسيانىڭ اۋقىمدى مىندەتتەرىن بەلگىلەپ بەرگەنىن اتاپ ءوتتى. ول «AMANAT» فراكتسياسى باستاماشىلىق ەتكەن تسيفرلىق كودەكس وسى سالاداعى باستى قۇجاتقا اينالاتىنىن جانە الداعى سەرپىندى قادامداردىڭ قۇقىقتىق العىشارتىن جاساۋعا مۇمكىندىك بەرەتىنىن مالىمدەدى. دەپۋتات بارلىق مۇددەلى ۇيىمداردى ونىڭ دامۋىنا بەلسەندى قاتىسۋعا شاقىردى. ال «Astana Hub»-تىڭ باس ديرەكتورى ماعجان ماديەۆ تسيفرلىق ترانسفورماتسيا تابىستى بولۋى ءۇشىن ادامي كاپيتالدى دامىتۋ جانە جاس تالانتتاردى قولداۋ قادامدارى ماڭىزدى باسىمدىققا اينالۋعا ءتيىس ەكەنىن ايتتى.

سۋرەتتى تۇسىرگەن: ءالي عالىم.

«Kaz Alpine Club» قب باسقارما مۇشەسى ەرلان سمايلوۆ پرەزيدەنت ستراتەگيالىق سالا رەتىندە ايقىنداعان تۋريزم باعىتى ينفراقۇرىلىم مەن كادرلاردى دامىتۋدى قاجەت ەتەتىنىن اتاپ ءوتتى. ونىڭ ايتۋىنشا، قازاقستاننىڭ شىتىرمان وقيعالى ءتۋريزمدى دامىتۋعا زور مۇمكىندىگى بار. «AMANAT» پارتياسى وسى باعىتتاعى جۇمىستى باستاپ، «الاتاۋ اماناتى» جوباسىن ىسكە قوستى. جوبا جاڭا جۇمىس ورىندارىن اشىپ، تۋريستەردى تارتۋعا، سونداي-اق جەرگىلىكتى جەرلەردە شاعىن بيزنەستى دامىتۋعا سەرپىن بەرمەك.

ءماجىلىس دەپۋتاتى، «AMANAT» فراكتسياسىنىڭ مۇشەسى ايدوس سارىم پارتيانىڭ باستى مىندەتى – پرەزيدەنت رەفورمالارىنىڭ ءمانىن حالىققا، ەڭ الدىمەن جاستارعا تۇسىندىرە وتىرىپ، ۇلتتىق بىرلىك پەن كەلىسىمدى نىعايتۋ ەكەنىن باسا ايتتى. دەپۋتاتتىڭ پىكىرىنشە، رەفورمالار كەڭ قولداۋ تاۋىپ،  ازاماتتار ولاردىڭ جۇزەگە اسۋىنا اتسالىسۋى ءۇشىن پارتيا پرەزيدەنت جولداۋىن ەلىمىزدىڭ ءاربىر تۇرعىنىنا قاراپايىم ءارى تۇسىنىكتى تىلمەن جەتكىزۋى قاجەت.

ءماجىلىس دەپۋتاتى باقىتجان بازاربەك زاڭداردىڭ ورىندالۋىن باقىلاۋعا ارنالعان تسيفرلىق كارتانى ەنگىزۋ جونىندە ۇسىنىس ءبىلدىردى. بۇل ازاماتتاردىڭ قۇقىقتىق ساناسىن ارتتىرىپ، قابىلدانعان زاڭداردىڭ مۇلتىكسىز ورىندالۋىن قامتاماسىز ەتۋگە جانە مەملەكەت باسشىسىنىڭ «زاڭ جانە ءتارتىپ» قاعيداسىن نىعايتۋعا مۇمكىندىك بەرەدى.

كاسىپكەر، «TechnoWomen» باسقارما توراعاسى ءازيزا شوجەەۆا پرەزيدەنت جولداۋىندا وتاندىق تاۋار وندىرۋشىلەردى بارىنشا قولداۋ ماسەلەسى كوتەرىلگەنىن اتاپ ءوتتى. ول كاسىپكەرلەردىڭ بۇل باستامانى ۇلكەن ىقىلاسپەن قابىلداعانىن ايتىپ، تاۋەلسىز سىرتقى ساۋدا الاڭىن قۇرۋدى، سونداي-اق ۇلتتىق جوبالاردى حالىقارالىق نارىقتارعا شىعارۋعا ىقپال ەتەتىن پارتيا جانىنان كاسىپكەرلىك كەڭەسىن قۇرۋدى ۇسىندى.

سۋرەتتى تۇسىرگەن: ءالي عالىم.

وسىلايشا، «AMANAT» پارتياسى ەلىمىزدىڭ جەتەكشى ساياسي كۇشى رەتىندە مەملەكەت باسشىسىنىڭ بارلىق ساياسي جانە الەۋمەتتىك-ەكونوميكالىق باستامالارىن تولىق قولدايدى. ماجىلىستەگى پارتيا فراكتسياسى پرەزيدەنت جولداۋىندا قويىلعان مىندەتتەردىڭ زاڭنامالىق تۇرعىدان ورىندالۋىن قامتاماسىز ەتەدى. پارتيا اشىق ديالوگقا دايىن جانە ەل دامۋىنا ۇلەس قوسقىسى كەلەتىن بارلىق ازاماتتارمەن بىرلەسە جۇمىس ىستەۋگە ءازىر.

سونىمەن قاتار ەرلان قوشانوۆ پارتيانىڭ ورتالىق اپپاراتى مەن ايماقتىق فيليالدارىنا جولداۋدى حالىق اراسىندا كەڭىنەن ناسيحاتتاپ، پرەزيدەنت ايتقان رەفورمالاردى جۇزەگە اسىرۋعا قوعامنىڭ بارلىق پروگرەسسيۆتى كۇشتەرىن جۇمىلدىرۋ جونىندە ناقتى تاپسىرمالار بەردى.

Abai.kz