قازاقستان مەن ۆەنگريا جوعارى وقۋ ورىندارى سۋ رەسۋرستارىن باسقارۋ جانە سۋ ديپلوماتياسىنا باسىمدىق بەرىلگەن قوس ديپلومدى ماگيستراتۋرا باعدارلاماسىن ىسكە قوستى.

مەملەكەت باسشىسىنىڭ حالىققا جولداۋىندا ايتىلعان سۋ ديپلوماتياسى سالاسىنداعى بىلىكتى مامانداردى دايارلاۋ تاپسىرماسىن جۇزەگە اسىرۋ اياسىندا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى ۆەنگريالىق كورۆينۋس ۋنيۆەرسيتەتىمەن بىرلەسە جۇمىس ىستەپ جاتىر. وسى ىنتىماقتاستىق ناتيجەسىندە «سۋ رەسۋرستارىن باسقارۋ جانە سۋ ديپلوماتياسىنا باسىمدىق» بەرىلگەن قوس ديپلومدى ماگيستراتۋرا باعدارلاماسى ازىرلەنىپ، ىسكە قوسىلدى.

بۇدان بولەك، بيىل تامىز ايىندا ەۋروپالىق كوميسسيا Erasmus Mundus Design Measure باعدارلاماسى اياسىندا 60 000 ەۋرو كولەمىندە گرانت ءبولدى. بۇل گرانت سۋ رەسۋرستارى مەن سۋ ديپلوماتياسى بويىنشا ينتەگراتسيالانعان بىرلەسكەن ماگيستراتۋرا باعدارلاماسىن ازىرلەۋ ءۇشىن ەۋروپانىڭ ءۇش جانە ورتالىق ازيانىڭ ءتورت ۋنيۆەرسيتەتىنەن قۇرالعان كونسورتسيۋمعا، ونىڭ ىشىندە قازۇسشيۋ-گە بەرىلدى.

قازان ايىنىڭ سوڭىندا بۋداپەشت قالاسىندا كونسورتسيۋم ساراپشىلارىنىڭ العاشقى وتىرىسى وتەدى. الداعى 15 اي ىشىندە ولار تولىق ازىرلەنگەن باعدارلامانى ەۋروپالىق كوميسسيانىڭ قاراۋىنا ۇسىنۋى ءتيىس. ەگەر باعدارلاما ماقۇلدانسا، جالپى بيۋدجەتى 5 ملن ەۋرونى قۇرايتىن، ال ۇزاقتىعى التى جىلعا سوزىلاتىن ماگيستراتۋرا باعدارلاماسىن بىرلەسىپ جۇزەگە اسىرۋ باستالادى.

ساراپشىلاردىڭ العاشقى وتىرىسىندا سونداي-اق سۋ رەسۋرستارىن باسقارۋ جانە سۋ ديپلوماتياسى جونىندەگى بىرلەسكەن ورتالىق قۇرۋ ۇسىنىلادى. بۇل ورتالىقتىڭ باس كەڭسەسى تاراز قالاسىنداعى قازۇسشيۋ-دە ورنالاسادى.

«بىرلەسكەن ماگيستراتۋرا باعدارلاماسى ورتاق سۋ رەسۋرستارىن بىرلەسە باسقارۋدىڭ زاماناۋي تۇجىرىمدامالارىن قامتيدى. اتاپ ايتقاندا، پايدا ۇلەستىرۋ، حالىقارالىق ىنتىماقتاستىق تەورياسى، سۋدىڭ ساياسي ەكونوميكاسى جانە جانجالداردى تالداۋ سەكىلدى باعىتتار قاراستىرىلادى. باعدارلاما ستۋدەنتتەرگە ەكىجاقتى، ايماقتىق جانە جاھاندىق دەڭگەيدەگى كەلىسسوزدەردى ءتيىمدى جۇرگىزۋگە قاجەتتى پراكتيكالىق داعدىلاردى ۇيرەتەدى»، - دەدى ۋنيۆەرسيتەت رەكتورى كامشات ءتۇسىپوۆا.

سونداي-اق قازۇسشيۋ بازاسىندا عىلىمي مەكتەپتەردى قۇرۋ جانە دامىتۋ ماقۇلداندى. اتاپ ايتقاندا، سۋ رەسۋرستارى ينجەنەرياسى مەكتەبى، سۋمەن جابدىقتاۋ جانە سانيتاريا مەكتەبى، اۋىل شارۋاشىلىعى سۋى جانە يرريگاتسيا جۇيەلەرىن باسقارۋ مەكتەبى، گيدرولوگيا، ەكولوگيا جانە قورشاعان ورتا مەكتەبى، ساۋلەت جانە لوگيستيكا مەكتەبى، ەنەرگەتيكا مەكتەبى، مەملەكەتتىك باسقارۋ ساياساتى جانە مەنەدجمەنت مەكتەبى، قاشىقتان زوندتاۋ جانە جاساندى ينتەللەكت مەكتەبى.

«سۋ رەسۋرستارى جانە يرريگاتسيا مينيسترلىگى قۇرىلعان ساتتەن باستاپ باسقا دا ۋاكىلەتتى ورگاندارمەن بىرلەسە وتىرىپ، سۋ سالاسىنداعى كادرلىق الەۋەتتى ارتتىرۋ بويىنشا كەشەندى جۇمىستار جۇرگىزىپ كەلەدى. قازىرگى تاڭدا سۋ سالاسىنداعى ماماندىقتار بويىنشا شامامەن 2500 ستۋدەنت ءبىلىم الىپ جاتىر. 2024 جىلى سۋ شارۋاشىلىعى كاسىپورىندارىندا پراكتيكادان وتكەن ستۋدەنتتەر سانى 82 بولسا، 2025 جىلى بۇل كورسەتكىش 450-گە جەتتى. سونىمەن قاتار وتاندىق جوعارى وقۋ ورىندارى سۋ ديپلوماتياسى سالاسىنداعى مامانداردى دايارلاۋ باعدارلامالارىن ەنگىزىپ جاتىر»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz