26 قىركۇيەك كۇنى الماتىداعى META ۋنيۆەرسيتەتىندە قازاقستان تاريحىندا تۇڭعىش رەت قازاق تىلىندە وقىتىلاتىن ەكى ديپلومدى MBA باعدارلاماسىنىڭ رەسمي تانىستىرىلىمى ءوتتى.

بۇل شارا جاي عانا جاڭا ءبىلىم بەرۋ جوباسىنىڭ باستالۋى ەمەس، ول قازاقستانداعى ەكونوميكانىڭ دامۋى مەن ۇلتتىق كادرلاردى دايارلاۋداعى وزەكتى ماسەلەلەردى اشىق تالقىلاۋعا سەبەپ بولدى.

ەكونوميكا مەن كادرلار ماسەلەسى:

پانەلدىك پىكىرتالاس بارىسىندا ساراپشىلار قازاقستانداعى ەكونوميكالىق ءوسىمنىڭ باياۋلاۋىنا سەبەپ بولىپ وتىرعان بىرقاتار فاكتورلاردى اتاپ ءوتتى. اتاپ ايتقاندا، كوپتەگەن وندىرىستىك جانە وتاندىق كومپانيالاردىڭ نارىقتاعى ورنىن ساقتاي الماۋى، كەيبىر جوبالاردىڭ توقتاپ قالۋى كاسىبي باسقارۋشىلاردىڭ جەتىسپەۋشىلىگىمەن تىكەلەي بايلانىستى ەكەندىگى ايتىلدى.

كاسىپكەرلەردىڭ پىكىرىنشە، باسەكەگە قابىلەتتى ەكونوميكا ءۇشىن ەڭ اۋەلى مىقتى مەنەدجمەنت قاجەت. قازاقستاندىق كومپانيالار جاقسى ءونىم شىعارا الادى، بىراق كاسىبي باسقارۋ، ستراتەگيالىق جوسپارلاۋ مەن نارىقتىق يكەمدىلىك جەتكىلىكسىز بولعان جاعدايدا ولار ۇزاق مەرزىمدە تابىسقا جەتە المايدى.

قازاق ءتىلىنىڭ ءرولى مەن جاڭا بۋىن مەنەدجەرلەرى:

تالقىلاۋ بارىسىندا قازاق ءتىلىنىڭ بيزنەستەگى ورنى دا ەرەكشە نازارعا الىندى. سوڭعى جىلدارى كوپتەگەن كومپانيالاردا قازاق ءتىلدى مامانداردىڭ ءرولى ارتىپ كەلە جاتقانى اتاپ ءوتىلدى. بۇل ءۇردىس ۇلتتىق تىلدە كاسىبي مەنەدجمەنت مەكتەبىنىڭ پايدا بولۋىن قاجەت ەتكەن.

ساراپشىلاردىڭ ايتۋىنشا، مەملەكەتتىك تىلدە جوعارى ساپالى بيزنەس-ءبىلىمنىڭ بولماۋى ۇزاق جىلدار بويى كاسىبي وسىمگە كەدەرگى كەلتىردى. ەندى Qazaq MBA باعدارلاماسى وسى ولقىلىقتىڭ ورنىن تولتىرىپ، قازاق تىلىندە ويلايتىن، كاسىبي دەڭگەيدە شەشىم قابىلداي الاتىن جاڭا بۋىن مەنەدجەرلەردى دايارلاۋدى ماقسات ەتەدى.

ءىس-شاراعا قاتىسقان كاسىپكەرلەر بۇل باستامانىڭ ەل دامۋى ءۇشىن ماڭىزىن اتاپ ءوتتى.

• دۋلات تاستەكەي (TAS GROUP) قازاقستاندىق بيزنەسكە ۇلتتىق مۇددەنى قورعايتىن جاڭا باسقارۋشىلار قاجەت ەكەنىن ايتتى.
• جالىن جاينارباي (Signtech.kz, الماتى قالاسى ءماسليحاتىنىڭ دەپۋتاتى) بيزنەس-ءبىلىمدى قازاق تىلىندە مەڭگەرۋدىڭ باسەكەلىك ارتىقشىلىقتارى بارىن اتاپ ءوتتى.
• رۋسلان نۇرلىباەۆ (SAVENERGY) حالىقارالىق تاجىريبەنى ۇلتتىق ورتاعا بەيىمدەۋدىڭ ماڭىزىن ءبولىستى.
• قۇمار جۇماحان (اۆتومودا، Avto Space Detailing) قازاق تىلىندە MBA باعدارلاماسىنىڭ تۇلەكتەرى جاڭا بۋىن كوشباسشىلارعا اينالاتىنىنا سەنىم ءبىلدىردى.

META ۋنيۆەرسيتەتىنىڭ رەكتورى، قازاقستانداعى ەڭ جاس ءارى الەمدەگى ەڭ جاس رەكتورلاردىڭ ءبىرى، ايجان ماراتقىزى ءوز سوزىندە عىلىم مەن ساپالى ءبىلىم بەرۋدى دامىتۋعا ارقاشان قولداۋ بىلدىرەتىنىن ايتتى. ول نازارباەۆ ۋنيۆەرسيتەتىنىڭ العاشقى Ph.D. باعدارلاماسىنىڭ تۇلەكتەرىنىڭ ءبىرى رەتىندە ءوز تاجىريبەسىن ءبولىسىپ، جاڭا باستاماعا جوعارى باعا بەردى:

«ماعان بۇل جوبا ەرەكشە قىمبات. ءبىز بۇل باعدارلامانى ىسكە قوسۋعا ۇزاق دايىندالدىق، ۇلكەن ەڭبەكتەن وتتىك. بۇگىن قازاق تىلىندە ساپالى ەكى ديپلومدى MBA باعدارلاماسىن ۇسىنا العانىمىز – ۋنيۆەرسيتەتىمىز ءۇشىن ۇلكەن جەتىستىك. بۇل – قازاقستاندىق ءبىلىم بەرۋ جۇيەسىنىڭ جاڭا بەلەسى. العاشقى تىڭداۋشىلارعا ساتتىلىك تىلەيمىن»، – دەدى ايجان ماراتقىزى.

META ۋنيۆەرسيتەتىنىڭ باستاماسىمەن اشىلعان Qazaq MBA باعدارلاماسى – ۇلتتىق تىلدە كاسىبي مەنەدجەرلەردى دايارلاۋعا باعىتتالعان العاشقى ءارى تاريحي قادام. باعدارلاما تۇلەكتەرىنە بىردەن ەكى ديپلوم الۋ مۇمكىندىگى بەرىلىپ، ولاردى حالىقارالىق دەڭگەيدە باسەكەگە قابىلەتتى باسشىلار قاتارىنا قوسادى.

«قازاقستان ەكونوميكاسىنىڭ بولاشاعى – كاسىبي مەنەدجەرلەردىڭ ساپاسىنا بايلانىستى. بىزگە جاھاندىق دەڭگەيدە ويلايتىن، بىراق ۇلتتىق مۇددەگە قىزمەت ەتەتىن جاڭا بۋىن قاجەت. Qazaq MBA ءدال وسى ميسسيانى اتقارادى»، – دەدى جوبا نەگىزىن قالاۋشى ماقسات حالىق.

Abai.kz