بۇگىن «اق جول» دەموكراتيالىق پارتياسىنىڭ ورتالىق كەڭسەسىندە وتاندىق تاۋار وندىرۋشىلەردىڭ ءتىزىلىمىن ء(وتو) ەنگىزۋ ماسەلەسى تالقىلاندى. جيىنعا ءماجىلىس دەپۋتاتتارىمەن قاتار، بىرنەشە مينيسترلىكتىڭ وكىلدەرى، «اتامەكەن» ۇكپ، سالالىق قاۋىمداستىقتار مەن كاسىپكەرلەر قاتىستى.

«وندىرىستىك ساياسات تۋرالى» زاڭعا سايكەس، بۇرىنعى يندۋستريالىق جانە ست-KZ سەرتيفيكاتتارىنىڭ ورنىنا ءوتو ءتىزىلىمى ەنگىزىلۋى ءتيىس. جاڭا جۇيە قوسىلعان قۇندى ەمەس، تەحنولوگيالىق وپەراتسيالاردى مەڭگەرۋ دەڭگەيىن كريتەري رەتىندە قاراستىرادى. پارلامەنت بۇل ءتاسىلدى قولداعانىمەن، كاسىپكەرلەر ونىڭ ىسكە اسىرىلۋىنا كۇمانمەن قاراپ وتىر.

وقم وكىلدەرى بارلىق دايىندىق جوسپارعا ساي ءجۇرىپ جاتقانىن ايتقانىمەن، بيزنەس وكىلدەرى كريتەريلەردىڭ ادىلەتسىزدىگىن سىنعا الدى. اسىرەسە، 26 كورسەتكىشتىڭ ىشىندە ءوندىرىس پروتسەسىنە قاتىسى جوق سالىقتىق تالاپتار بار ەكەنى، شاعىن جانە ورتا بيزنەستىڭ تەستىلەۋگە مۇلدە قاتىسپاعانى نارازىلىق تۋعىزدى. بۇل جۇيە ءىرى كاسىپورىندارعا عانا ىڭعايلى دەگەن پىكىر باسىم.

داۋلى ماسەلەلەردىڭ ءبىرى – زاۋىتتارعا كامەرا ورناتۋ تالابى. كاسىپكەرلەر بۇل شارا قۇپيا اقپاراتتى اشكەرەلەۋى مۇمكىن ەكەنىن، ءتىپتى ونەركاسىپتىك تىڭشىلىققا جول اشاتىنىن ەسكەرتتى. سونداي-اق، قاۋىمداستىقتار تىزىلىمگە ساراپشىلىق ءرول بەرىلمەگەنىنە قارسى شىقتى.

زاڭعا سايكەس، 2026 جىلدىڭ 1 قاڭتارىنان باستاپ بۇرىنعى سەرتيفيكاتتار كۇشىن جويادى. بىراق جۇيە تولىق ىسكە قوسىلماسا، مىڭداعان ءوندىرۋشى مەملەكەتتىك ساتىپ الۋلارعا قاتىسۋ قۇقىعىنان ايىرىلۋى ىقتيمال.

«اق جول» فراكتسياسى ماسەلەنى باقىلاۋدا ۇستايتىنىن، بيزنەسكە تونەتىن تاۋەكەلدەردى ازايتۋ ءۇشىن بارلىق الاڭداۋشىلىقتاردى ۇكىمەتكە جەتكىزەتىنىن مالىمدەدى.

Abai.kz