بۇگىن ءماجىلىس وتىرىسىندا دەپۋتاتى «AMANAT» پارتياسى فراكتسياسىنىڭ مۇشەسى تەمىر قىرىقباەۆ كولىك ءمينيسترى نۇرلان ساۋرانباەۆقا اۋە كەمەلەرىنىڭ ۇشۋ قاۋىپسىزدىگىن قامتاماسىز ەتۋ تۋرالى جولداعان دەپۋتاتتىق ساۋال جولداپ: «ناۋقاستاردى تاسىمالدايتىن اۋە كەمەلەرى قاۋىپسىزدىك ستاندارتتارىنا ساي كەلمەيدى»، - دەدى.

ءبىز اتالعان دەپۋتاتتىق ساۋالدى وقىرمان تالقىسىنا ۇسىنامىز...

تەمىر قىرىقباەۆ:

– قازاقستان رەسپۋبليكاسىنىڭ اۋماعىندا بۇگىنگى كۇنگە دەيىن 1981 جىلى سەريالىق ءوندىرىسى توقتاتىلعان كەڭەستىك ياك-40 جولاۋشىلار ۇشاعى ءالى دە پايدالانىلىپ كەلەدى.

قازىرگى ۋاقىتتا بۇل اۋە كەمەلەرىنىڭ جاسى 44-تەن 55 جاسقا دەيىن جەتىپ وتىر، ياعني ايماقتىق اۆياتسيانىڭ الەمدىك پاركىنىڭ ورتاشا شەكتى جاسىنان ەكى ەسە ەسكى (15–20 جىلدان اسپاۋ كەرەك).

ياك-40 ۇشاقتارىنىڭ رەسۋرسى تاۋسىلعان، ولار وتكەن عاسىردىڭ 60-شى جىلدارى جاسالعان اي-25 قوزعالتقىشتارىمەن جابدىقتالعان، ال 1980 جىلداردىڭ سوڭىندا بۇل قوزعالتقىشتاردىڭ ءوندىرىسى توقتاتىلعان. 2022 جىلدان باستاپ «موتور سيچ» كاسىپورنى قيراۋعا ۇشىرادى، جابدىقتاردىڭ ءبىر بولىگى دەمونتاجدالدى. وسىلايشا، قازىرگى ۋاقىتتا اي-25 قوزعالتقىشتارى مەن ولارعا ارنالعان سەرتيفيكاتتالعان قوسالقى بولشەكتەردىڭ ءوندىرىسى توقتاتىلعان، ال حالىقارالىق جەتكىزىلىمدەر مۇلدە جوق.

ياك-40 ۇشاقتارى حالىقارالىق ازاماتتىق اۆياتسيا ۇيىمىنىڭ «ICAO» قازىرگى زامانعى شۋ مەن شىعارىندىلارعا قويىلاتىن تالاپتارىنا سايكەس كەلمەيدى. مۇنداي ۇشاقتاردى پايدالانۋ ەۋروپالىق وداق اۋماعىندا 2002 جىلدىڭ 1 ساۋىرىنەن باستاپ تىيىم سالىنعان.

الايدا، ەلىمىزدە قاۋىپسىزدىك ستاندارتتارىنا ساي كەلمەيتىن ياك-40 اۋە كەمەلەرى سانيتارلىق اۆياتسيادا، ياعني پاتسيەنتتەردى تاسىمالداپ ءجۇر، بۇل ادام ومىرىنە قاۋىپ توندىرەدى ەمەس پە؟!

«قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭىنىڭ 4-بابىنا سايكەس نەگىزگى ماقساتتار – ادامنىڭ ءومىرى مەن دەنساۋلىعىن، قورشاعان ورتانى، مەملەكەتتىڭ مۇددەلەرىن قورعاۋ جانە اۋە كەمەلەرىنىڭ ۇشۋ قاۋىپسىزدىگىن قامتاماسىز ەتۋ بولىپ تابىلادى.

«ICAO» حالىقارالىق ستاندارتتارىنا سايكەس كەلمەيتىن ۇشاقتاردىڭ پايدالانىلۋىن جالعاستىرۋ مەملەكەتىمىزدىڭ حالىقارالىق بەدەلىن، ياعني اۋە قاۋىپسىزدىگى قاعيداتتارىنا ادالدىقتى جاريالاعان ەل رەتىندەگى ءيميدجىن تومەندەتەدى.

جوعارىدا ايتىلعانداردى جانە ماسەلەنىڭ الەۋمەتتىك ماڭىزدىلىعىن ەسكەرە وتىرىپ، مىناداي شارالاردى قاراستىرۋدى سۇرايمىن:

ءبىرىنشى. ياك-40 اۋە كەمەلەرى ادام ومىرىنە قاۋىپ توندىرۋىنە بايلانىستى قازاقستان رەسپۋبليكاسىندا بۇل ۇشاقتاردى ودان ءارى پايدالانۋدى توقتاتۋ.

ەكىنشى. وسى جىلدىڭ سوڭىنا دەيىن ياك-40 اۋە كەمەلەرىن كەزەڭ-كەزەڭىمەن پايدالانۋدان شىعارۋ كەستەسىن ۇسىنۋ.

ءۇشىنشى. ەسكىرگەن اۋە كەمەلەرىن «ICAO» حالىقارالىق ستاندارتتارىنا سايكەس كەلەتىن زاماناۋي اۋە كەمەلەرىمەن اۋىستىرۋ باعدارلاماسىن ازىرلەپ، ونى بەكىتۋ.

ءتورتىنشى. قورشاعان ورتاعا جانە مەملەكەتتىڭ مۇددەلەرىنە قاتەر توندىرمەيتىن ۇشاقتارمەن قامتاماسىز ەتۋ.

Abai.kz