بوكستان ۇلىبريتانيانىڭ ليۆەرپۋل قالاسىندا وتكەن الەم بىرىنشىلىگىندە قازاقستان تاريحي جەڭىسكە قول جەتكىزدى. ال ايەلدەر اراسىندا 65 كەلىگە دەيىنگى سالماقتا سىنعا تۇسكەن ايدا ابىكەەۆا 2025 جىلى ەكىنشى مارتە الەم چەمپيونى اتاندى. Olympic.kz سايتىنا بەرگەن سۇقباتىندا بۇرىمدى بوكسشىمىز جارىستىڭ ەستە قالعان ساتتەرىمەن جانە الداعى جوسپارلارىمەن ءبولىستى.

- ءبىر جىلدا ەكى مارتە الەم چەمپيونى اتانۋ قانداي سەزىم؟

- ءبىر جىلدا ەكى دۇركىن الەم چەمپيونى اتانۋ - مەن ءۇشىن ۇلكەن ماقتانىش. جەڭىسكە جەتكەنىمە وتە قۋانىشتىمىن. قاراعاندى وبلىسىنان قىزدار اراسىندا ەكى دۇركىن الەم چەمپيونى بولماعان. سوندىقتان ەكى بىردەي الەم چەمپيوناتىن جەڭىپ العان ءبىرىنشى سپورتشى بولىپ تۇرمىن.

- قىركۇيەك ايىندا وتكەن الەم بىرىنشىلىگىنىڭ ناۋرىز ايىندا وتكەن جارىسقا قاراعاندا ايىرماشىلىعى بار ما؟

- سەربيادا قاتىسۋشى ەلدەر سانى از بولدى دەپ ايتۋعا بولادى. ال وسى World Boxing ۇيىمداستىرعان الەم چەمپيوناتى جوعارى دەڭگەيدە ءوتتى دەسەم بولادى. ءتۇرلى ەلدەن مىقتى سپورتشىلار جينالدى.

- قازاقستاندىق جانكۇيەرلەردىڭ قولداۋى قالاي بولدى؟

- جانكۇيەرلەردىڭ قولداۋى راسىمەن تاماشا بولدى. اسىرەسە الەۋمەتتىك جەلىلەردە جانكۇيەرلەردىڭ قولداۋى سەزىلدى. كۇن سايىن بىزگە حابارلاما جازىپ وتىردى. ايتا كەتسەك، ليۆەرپۋلدە 150-دەن استام جانكۇيەر ءبىزدى قولداۋ ءۇشىن ارنايى كەلگەن. ولار جارىستىڭ العاشقى كۇنىنەن باستاپ، سوڭىنا دەيىن قولداۋ كورسەتتى. ارينە، جانكۇيەرلەردىڭ قولداۋى ءبىزدى جىگەرلەندىرەدى.

- شيرەك فينالدا وليمپيادا چەمپيونىن جەڭدىڭىز. سول جەكپە-جەك جايلى ايتىپ وتسەڭىز.

- ءيا، ءۇشىنشى جەكپە-جەگىمدە تۇركيالىق بۋسەناز سۋرمەنەليمەن كەزدەستىم. ول - وليمپيادا جانە ءۇش دۇركىن الەم چەمپيونى، تاجىريبەلى ءارى وتە مىقتى قارسىلاس. تاكتيكالىق جاعىنان دا، فيزيكالىق تۇرعىدان دا جوعارى دەڭگەيدە دايىندالعان سپورتشى. بۇعان دەيىن، ءۇش اي بۇرىن الەم كۋبوگىندا كەزدەسىپ، ەسە جىبەرگەن ەدىم. سول كەزدە وزىمە: «كەلەسى جولى مىندەتتى تۇردە ەسەڭدى قايتاراسىڭ»، - دەپ ۋادە بەرگەنمىن. ماقسات قويىپ، باپكەرلەرىمىزبەن بىرگە فيزيكالىق ءارى تاكتيكالىق تۇرعىدان تىڭعىلىقتى دايىندالدىق. سونىڭ ناتيجەسىندە كوزدەگەن ماقساتىمىزعا جەتتىك.

- وتكەن الەم بىرىنشىلىگىنەن ەستە قالعان ءسات بولدى ما؟

- ارينە، فينالدىق كەزەڭ ەرەكشە ەستە قالدى. سول كەزدە جانكۇيەرلەردىڭ قولداۋى ەرەكشە بولدى. بۇل - ۇمىتىلماس ءسات. فينالدا قولىمدى جوعارى كوتەرگەندە، كوك تۋىمىزدىڭ كوكتە جەلبىرەگەنى، ءانۇرانىمىزدىڭ شىرقالعان ءساتى ەستە قالدى.

- الداعى جوسپار، ماقساتتارىڭىز جايلى ايتا وتسەڭىز.

- كەلەسى جىلى ازيا ويىندارى بار. سول دودادا جوعارى ناتيجە كورسەتۋ قاجەت. ودان بولەك، 2027 جىلى بىزدە الەم چەمپيوناتى بار. سول جەردە وليمپيادا جولداماسىن جەڭىپ الۋ ءۇشىن بار كۇشىمىزدى سالامىز. الدا ءالى تالاي وقۋ-جاتتىعۋ جيىندارى كۇتىپ تۇر. ءۇش جىل ىشىندە فيزيكالىق جانە تاكتيكالىق تۇرعىدان بارىنشا دايىندالامىز. باستى ماقسات - وليمپيادادا توپ جارىپ، قازاق ەلىنىڭ كوك تۋىن كوكتە جەلبىرەتۋ.

Abai.kz