ءماجىلىستىڭ جالپى وتىرىسىندا ونەركاسىپ جانە قۇرىلىس ءمينيسترى ەرسايىن ناعاسپاەۆ جاڭا قۇرىلىس كودەكسىنىڭ جوباسىنداعى ماڭىزدى جاڭالىقتاردى ءبولىستى، دەپ حابارلايدى BAQ.KZ ءتىلشىسى.

ءمينيستردىڭ ايتۋىنشا، بيىل جىل باسىندا وتكەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ قۇرىلىس سالاسىنا بىرقاتار ناقتى تاپسىرمالار بەرگەن. سولاردىڭ ىشىندەگى باستى مىندەتتەردىڭ ءبىرى – جىل سوڭىنا دەيىن قۇرىلىس سالاسىنداعى بارلىق پروتسەستەردى تولىق تسيفرلاندىرۋ جانە بۇل باعىتتا بىرىڭعاي اقپاراتتىق جۇيە ازىرلەۋ.

قازىرگى تاڭدا سالادا بىرنەشە اقپاراتتىق جۇيە جۇمىس ىستەيدى:

• جوسپارلاۋ مەن عيماراتتاردى بۇزۋ پروتسەسى – ايس گگك (گوسگرادكاداستر);
• مەملەكەتتىك ساراپتاما – e-PSD جۇيەسى;
• قۇرىلىس كەزەڭى – e-Qurylys جۇيەسى.

– الايدا بۇل جۇيەلەر ءوزارا بولەك جۇمىس ىستەيدى، ۇيلەسىمدىلىك جوق. وسى ولقىلىقتاردى جويۋ ماقساتىندا جاڭا كودەكس جوباسىندا تسيفرلاندىرۋعا ەرەكشە كوڭىل ءبولىنىپ، بۇل جەكە باعىت رەتىندە قاراستىرىلعان. جوبادا مەملەكەتتىك اقپاراتتىق مودەلدەر بانكىن (گبيم) كەڭەيتۋ نەگىزىندە بىرىڭعاي قۇرىلىس پورتالى قۇرۋ كوزدەلىپ وتىر. بۇل پورتال قۇرىلىس سالاسىنداعى بارلىق قىزمەتتەردى ء“بىر تەرەزە” قاعيداتى بويىنشا ۇسىنادى، – دەدى مينيستر.

پورتالدا بارلىق دەربەس جۇيەگە سىلتەمەلەر بولادى، ال EGOV جۇيەسى ارقىلى بىرىڭعاي اۆتوريزاتسيا ەنگىزىلىپ، قولدانۋشىلارعا دەرەكتەردى ءبىر رەت قانا ەنگىزۋگە مۇمكىندىك بەرىلەدى. وسىلايشا، ءار جۇيەگە بولەك كىرۋ قاجەتتىلىگى جويىلادى.

اقپارات الماسۋ ءۇشىن بىرىڭعاي يدەنتيفيكاتور – نىساننىڭ جەكە سايكەستەندىرۋ ءنومىرى (ۋنو) قولدانىلادى. بۇل ءنومىر نىسانعا العاشقى رۇقسات بەرىلگەن كەزدە بەكىتىلەدى.

ناتيجەسىندە پورتال قۇرىلىس نىسانىنىڭ بارلىق كەزەڭدەرىن قامتىپ، قۇرىلىس جۇمىستارىنىڭ اشىقتىعى مەن ساپاسىنا ەرەكشە نازار اۋدارادى.

سونىمەن قاتار، پورتال ارقىلى سالا ماماندارىن تەستىلەۋ، سەرتيفيكاتتاۋ جانە ولاردىڭ رەەسترى اۆتوماتتى تۇردە جۇرگىزىلەدى.

Abai.kz