ۇيعىر اۋدانىندا زاماناۋي تسيفرلىق حالىققا قىزمەت كورسەتۋ ورتالىعى پايدالانۋعا بەرىلدى.

جاڭا كەڭسە 600-دەن استام مەملەكەتتىك قىزمەت ءتۇرىن ۇسىنادى. بۇعان دەيىن اۋدان تۇرعىندارى قۇجات راسىمدەۋ ءۇشىن كورشى اۋداندارعا بارۋعا ءماجبۇر بولسا، ەندى بارلىق قاجەتتى قىزمەتتەر ءبىر جەردەن قولجەتىمدى بولىپ وتىر.

اۋدان تۇرعىنى سەليمام ۆاريسوۆا جاڭا كەڭسەنىڭ اشىلۋى تۇرعىندار ءۇشىن ۇلكەن جەڭىلدىك بولعانىن ايتادى: «بۇرىنعى ورتالىق ەسكى، تار ءارى سۋىق بولاتىن. قازىر كەڭسە كەڭ، جارىق، وتە ىڭعايلى. ءبىر اپتا بۇرىن پاسپورتقا ءوتىنىش بەرگەن ەدىم، ءدال بۇگىن دايىن بولىپتى. رەسمي اشىلۋ كۇنىنە تاپ كەلگەنىمە قۋانىشتىمىن»، – دەيدى ول.

جاڭا كەڭسەدە قىزمەت كورسەتۋ پروتسەسى بىرنەشە فۋنكتسيونالدى ايماققا بولىنگەن. مۇندا احاج ءبولىمى، جەر كاداسترى، زەينەتاقى مەن الەۋمەتتىك تولەمدەرگە قاتىستى قىزمەتتەر، سونداي-اق باسقا دا مەملەكەتتىك بولىمدەر ورنالاسقان.

بۇل جۇيە كەلۋشىلەر اعىنىن ءتيىمدى رەتتەۋگە، قىزمەت كورسەتۋ ۋاقىتىن قىسقارتۋعا جانە كەزەك كۇتۋدى ازايتۋعا مۇمكىندىك بەرەدى.

ۇيعىر اۋدانىنىڭ اكىمى بوتا ەلەۋسىزوۆا بۇل نىساننىڭ اشىلۋىن ءوڭىردىڭ تسيفرلىق دامۋ باعىتىمەن تىكەلەي بايلانىستىرادى: «پرەزيدەنتىمىزدىڭ تسيفرلاندىرۋ باعىتىندا بەرگەن تاپسىرماسىنىڭ بىردەن-ءبىر كورىنىسى – وسى ورتالىق. بارلىق قىزمەت ينتەرنەت جەلىسىمەن تولىق قامتىلعان. كەلەشەكتە مۋزەي سالۋ جوسپاردا بار. سونداي-اق كەزەڭ-كەزەڭىمەن تۇرعىن ۇيلەر دە سالىنىپ جاتىر»، – دەدى اكىم.

اۋدان تۇرعىندارى ءۇشىن بۇل جاڭا كەڭسە ماڭىزدى الەۋمەتتىك جوبالاردىڭ ءبىرى بولىپ وتىر. بۇرىن كۇردەلى قۇجات راسىمدەۋ ءۇشىن ەڭبەكشىقازاق اۋدانىنا بارۋعا تۋرا كەلەتىن. ەندى نەگىزگى قىزمەتتەردىڭ بارلىعى ءوز اۋدانىندا كورسەتىلمەك.

جاڭا عيماراتتىڭ جالپى اۋدانى 2000 شارشى مەتردى قۇرايدى. قۇرىلىسىنا 1 ميلليارد تەڭگەدەن استام قاراجات جۇمسالعان. كەڭسە زاماناۋي تالاپتارعا ساي جابدىقتالىپ، تۇرعىندارعا قولايلى جاعداي جاسالعان.

جاڭا تسيفرلىق كەڭسە – ۇيعىر اۋدانى تۇرعىندارىنىڭ ءومىر ساپاسىن ارتتىرۋعا، مەملەكەتتىك قىزمەتتەردى اشىق ءارى ءتيىمدى ۇسىنۋعا باعىتتالعان تاعى ءبىر ناقتى قادام.

Abai.kz