جەتىسۋ وبلىسىندا «شوقان ءۋاليحانوۆ: تاريح جانە تۇلعا» اتتى عىلىمي-تاجىريبەلىك كونفەرەنتسيا ءوتتى. ەتنوگراف عالىم، اعارتۋشى، تاريحشى جانە گەوگراف شوقان ءۋاليحانوۆتىڭ 190 جىلدىعىنا ارنالعان شاراعا قىرعىزستان، وزبەكستان، ۇلىبريتانيا مەملەكەتتەرىنىڭ جانە ەلىمىزدىڭ عالىمدارى قاتىستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

كونفەرەنتسيانىڭ اشىلۋىندا كوپشىلىكتى وبلىس اكىمىنىڭ اتىنان قۇتتىقتاعان ورىنباسارى دياس ەسداۋلەتوۆ شوقان ءۋاليحانوۆ مۇراسى تۇرىك حالىقتارىنىڭ تاريحى مەن مادەنيەتىن تانۋعا سەپتىگىن تيگىزەتىنىن اتاپ ءوتىپ، عالىم ەڭبەكتەرىنىڭ جان-جاقتى زەرتتەلۋى كەلەشەك ۇرپاقتىڭ ەنشىسىندە ەكەنىن العا تارتتى.

- شوقان ءۋاليحانوۆ جالعىز قازاقتىڭ عانا ەمەس، بارلىق تۇرىك حالىقتارىنىڭ ماقتانىشى. ونىڭ تۇلعاسى – جالپىۇلتتىق سيپاتقا يە. ونىڭ ءومىرىنىڭ سوڭعى كۇندەرىن جەتىسۋ جەرىندە وتكىزىپ، توپىراق بۇيىرۋى ءبىز ءۇشىن زور مارتەبە ءارى ۇلكەن جاۋاپكەرشىلىك. بيىل عالىم اتىنداعى «التىنەمەل» مۋزەيىنىڭ اشىلعانىنا 40 جىل تولىپ وتىر. 2023 جىلى ەل پرەزيدەنتىنىڭ تاپسىرماسىمەن مۋزەيگە تولىق جوندەۋ جۇمىستارى جۇرگىزىلدى، - دەگەن د.ەسداۋلەتوۆ ايماقتىڭ تاريحي-مادەني ومىرىنەن ورىن العان مۋزەيدىڭ ماڭىزدىلىعىنا توقتالدى.

ءفوتوتىلشى: جەڭىس ىسقاباي.

كونفەرەنتسيا اياسىندا جارىلقاپ بەيسەنبايۇلىنىڭ قايتا باسىلعان «شوقان» كىتابىنىڭ تۇساۋكەسەرى ءوتىپ، پارلامەنت سەناتىنىڭ توراعاسى ماۋلەن اشىمباەۆتىڭ، اقمولا وبلىسىنىڭ اكىمى مارات احمەتجانوۆتىڭ قۇتتىقتاۋ تىلەكتەرى وقىلدى.

ودان سوڭ ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس مامانى، تاريح عىلىمدارىنىڭ دوكتورى، پروفەسسور اۋەزحان شاشاەۆ، قىرعىز رەسپۋبليكاسىنىڭ قايراتكەرى، تاريح عىلىمدارىنىڭ دوكتورى، پروفەسسور شولپان تۇرداليەۆا، وزبەكستاندىق شوقانتانۋشى جازۋشى ۆلاديمير فەتيسوۆ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قازاقستان تاريحى كافەدراسىنىڭ دوتسەنتى، تاريح عىلىمدارىنىڭ كانديداتى فاكيا شامشيدەنوۆا، ۇلىبريتانيالىق ساياحاتشى، جۋرناليست نيك فيلدينگ كەزەكپەن ءسوز الىپ، جاسىن عۇمىرلى عالىمنىڭ ەڭبەكتەرىندەگى ەرەكشەلىكتەردى، ايتىلماعان سىرلاردى، ۇلتتار مەن ۇلىستارعا قاتىستى مالىمەتتەردى جان-جاقتى تالداپ، ءتۇسىندىردى.

ءفوتوتىلشى: جەڭىس ىسقاباي.

كونفەرەنتسيا سوڭى پىكىرتالاس پەن ۇسىنىستارعا ۇلاسىپ، شوقان ەڭبەكتەرىن زەرتتەۋ مەن تانىتۋدى جالعاستىرۋدىڭ ماڭىزدىلىعىن اڭگىمەلەدى.

ايتا كەتسەك، كونفەرەنتسيا الدىندا قاتىسۋشىلار كەربۇلاق اۋدانىنىڭ شانحاناي اۋىلدىق وكرۋگىندە ورنالاسقان ش. ءۋاليحانوۆ اتىنداعى «التىنەمەل» مەموريالدىق مۋزەيىنە بارىپ، گۇل شوقتارىن قويدى. سونداي-اق «تازا قازاقستان» باعدارلاماسى اياسىندا كەشەن اۋماعىنا جاس كوشەتتەر وتىرعىزدى.

Abai.kz