مادەنيەت جانە اقپارات مينيسترلىگىنىڭ قولداۋىمەن «ش.ايمانوۆ اتىنداعى «قازاقفيلم» كينوستۋدياسى مەن «ۇلتتىق كينونى قولداۋ مەملەكەتتىك ورتالىعى» بىرلەسە وتىرىپ تۇسىرگەن ءارى شىنايى وقيعاعا نەگىزدەلگەن «كاپيتان بايتاسوۆ» كوركەم ءفيلمى 23 قازاننان باستاپ ۇلكەن ەكرانعا جول تارتادى.

ءفيلمنىڭ جەلىسى سوناۋ 2011 جىلدىڭ 12 قاراشاسىندا تاراز قالاسىندا ەلدى ءدۇر سىلكىندىرگەن اۋىر وقيعانى باياندايدى. قارۋ-جاراق دۇكەنىنە جاسالعان قارۋلى شابۋىل سوڭى قايعىلى جاعدايعا ۇلاسىپ، بەيبىت تۇرعىندار اراسىندا ۇلكەن ۇرەي تۋعىزدى. جيحاديزم يدەياسىن ۇستانعان قىلمىسكەر بىرنەشە قارۋلى شابۋىل جاساپ، سونىڭ سالدارىنان قاۋىپسىزدىك جانە قۇقىق قورعاۋ ورگاندارىنىڭ قىزمەتكەرلەرى قازا تاپتى. وقيعا سوڭىندا ول ءوزىن-ءوزى جارىپ جىبەرىپ، قايعىلى جاعدايمەن اياقتالدى.

سول كۇن حالىق جادىندا پوليتسيا كاپيتانى عازيز بايتاسوۆتىڭ ەسىمىمەن ماڭگى ساقتالدى. ول ءوز ءومىرىن قۇربان ەتىپ، ونداعان ادامنىڭ ءومىرىن ساقتاپ قالدى. «كاپيتان بايتاسوۆ» - ءدال سول ەرلىكتىڭ ەستەلىگى. فيلمدە باتىردىڭ رۋحى، وتان الدىنداعى ادالدىعى مەن قىزمەتتىك بورىشىنا دەگەن بەرىك سەنىمى شىنايى بەينەلەنگەن.

دراما مەن ەكشن جانرىنداعى كورەرمەندى تەرەڭ ويعا جەتەلەيتىن كوركەم تۋىندىنىڭ رەجيسسەرى ءارى ستسەناري اۆتورى — داۋرەن قامشىباەۆ.

باستى رولدەردى قازاقستاندىق تانىمال اكتەرلەر ازامات ساتىبالدى، ەركەبۇلان دايىروۆ، اسان ماجيت، دارحان سۇلەيمەنوۆ، قوبىلاندى بولات جانە سامال ەسلياموۆا سومدايدى.

Abai.kz